މެންޗެސްޓާ (މާޗް 5) - އިނގިރޭސި ޕްރިމިއާ ލީގުގައި ރޭ ނޮޓިންހަމް ފޮރެސްޓާ 2-2 އިން މެންޗެސްޓާ ސިޓީ އެއްވަރުވުމުގެ ފައިދާ އާސެނަލުން ނެގިއިރު، އެއް ކުޅުންތެރިއަކު މަދުކޮށް މެޗުގެ ބޮޑުބައި ކުޅުނު ނިއުކާސަލް ޔުނައިޓެޑުން 2-1 އިން މެންޗެސްޓާ ޔުނައިޓެޑް ބަލިކޮށްފި އެވެ.
ރޭ އާސެނަލުން މެޗުގެ ނުވަ ވަނަ މިނިޓްގައި ބުކާޔޯ ސަކާ ޖެހި ހަމައެކަނި ގޯލުން 1-0 އިން ބްރައިޓަން ދަނޑުގައި މޮޅުވި އެވެ. މި ނަތީޖާއާ އެކު، ސިޓީ އަށް ރޭ މޮޅުނުވެވުމުން، އާސެނަލުން ވަނީ މި ވަގުތަށް އެއް ވަނައިގައި ހަތް ޕޮއިންޓަށް ލީޑުފުޅާކޮށްފަ އެވެ.
އާސެނަަލަށް 30 މެޗުން 67 ޕޮއިންޓް ލިބިފައިވާއިރު، ސިޓީ އަށް 29 މެޗުން ވަނީ 60 ޕޮއިންޓް ލިބިފަ އެވެ. ތިން ވަނައިގައި އޮތް ޔުނައިޓެޑަށް 29 މެޗުން 51 ޕޮއިންޓް ލިބިފައިވާއިރު، ހަތަރެއްގައި އޮތް އެސްޓަން ވިލާ އަށް 29 މެޗުން 51 ޕޮއިންޓް ލިބިފައިވެ އެވެ. ފަސް ވަނައިގައި އޮތީ ރޭ އެސްޓަން ވިލާ އަތުން 4-1 އިން މޮޅުވި ޗެލްސީ އެވެ. ފަސް ވަނައިގައި އޮތް ޗެލްސީ އާއި ހަ ވަނައިގައި އޮތް ލިވަޕޫލަށް 29 މެޗުން ލިބިފައިވަނީ 48 ޕޮއިންޓެވެ.
ސިޓީން ރޭގެ މެޗުގައި ލީޑުނެގީ އެންޓޮއިން ސެމެންޔޯ ޖެހި ގޯލުންނެވެ. ދެ ވަނަ ހާފުގައި މޯގަން ގިބްސް-ވައިޓް ޖެހި ލަނޑުން ފޮރެސްޓުން ފުރަތަމަ އެއްވަރުކުރިއިރު، ރޮޑްރީ ވަނީ ސިޓީ އަށް ލީޑުނަގައިދީފަ އެވެ. އެކަމަކު، އޭރިއާބޭރުން އެލިއަޓް އެންޑަސަން ޖެހި ޝޮޓަކުން ވައްދާލި ލަނޑާ އެކު ފޮރެސްޓުން އެއްވަރުކުރީ އެވެ. ސިޓީން ފަހު ވަގުތާ ހަމައަށް ވެސް ގޯލެއް ޖަހައި، މޮޅުވެވޭތޯ ކުރި މަސައްކަތް ކާމިޔާބެއްނުވި އެވެ.
ފުރަތަމަ ހާފުގެ އިތުރު ވަގުތުގެ ފުރަަތަމަ މިނިޓްގައި، ނިއުކާސަލްގެ ޖޭކަބް ރަމްސޭ، ޕެނަލްޓީ ހޯދަން ޑައިވްއެއް ކުރުމުން، އޭނާ އަށް ދެ ވަނަ ރީނދޫ ކާޑާ އެކު ރަތެއް ދެއްކި އެވެ. އެކަމަކު، އޭގެ ހަތަރު މިނިޓް ފަހުން، ޔުނައިޓެޑްގެ ބްރޫނޯ ފެނާންޑޭސް އެ ޓީމުގެ އޭރިއާތެރެއިން، ނިއުކާސަލްގެ އެންތަނީ ގޯޑަން އަށް ކުރި ފައުލަށް ދިން ޕެނަލްޓީ ވައްދާލައި، އެ ޓީމަށް ލީޑުނަގައިދިނެވެ. ނިއުކާސަލުން ލީޑުނެގި ނަމަވެސް، ކުރީގައި އޮވެގެން ހާފު ނިންމައިނުލެވުނެވެ. ހިލޭ ޖެހުމަކުން ފެނާންޑޭސް ނެގި ހުރަހެއް ކަސެމީރޯ ބޮލުން ގޯލަށް ބޯޅަ ފޮނުވާލައި އެ ޓީމަށް އެއްވަރުކޮށްދިނެވެ.
މެޗުން ނިއުކާސަލް މޮޅުވި ލަނޑަކީ، ވިލިއަމް އޮސޫލާ ޖެހި އިންޑިވިޖުއަލީ މޮޅު ލަނޑެކެވެ. އަރިމަތިން ލިބުނު ބޯޅައެއް އޮސޫލާ ވަނީ ގޯލުގެ ދުރު ކަނަށް ފޮނުވާލައިފަ އެވެ. މިއީ ވަގުތީ ކޯޗު، މައިކަލް ކެރިކް ހަވާލުވި ފަހުން އެ ޓީމު ކުޅުނު އަށް މެޗުގެ ތެރެއިން ބަލިވި ފުރަތަމަ ފަހަރެވެ.
އެސްޓަން ވިލާގެ ޑަގްލަސް ލުއީޒް، މެޗުގެ ދެ ވަނަ މިނިޓްގައި އެ ޓީމަށް ލީޑުނަގައިދިން ނަމަވެސް، ޗެލްސީން ވަނީ ފަހަތުން އަރައި ހަތަރު ލަނޑު ޖަހައިގެން މޮޅުވެފަ އެވެ. އޭގެ ތެރެއިން ތިން ލަނޑު ޖަހައި، ޗެލްސީގެ ޖޮއާއޯ ޕެޑްރޯ ވަނީ ހެޓްރިކެއް ހަދައިފަ އެވެ. އަނެއް ލަނޑު ޖެހީ ކޯލް ޕާމާ އެވެ.
ލީގުގައި ރޭ ފުލަމް ދަނޑުގައި ވެސްޓް ހޭމް ވަނީ 1-0 އިން މުހިންމު މޮޅެއް ހޯދައިފަ އެވެ.
