އެތަންސް، ގްރީސް (މާޗް 5) - މެންޗެސްޓާ ޔުނައިޓެޑްގެ ޑިފެންޑަރު، ހެރީ މެގުއާ އަށް ގްރީސް ކޯޓަކުން ކޮށްފައިވާ ސަސްޕެންޑެޑް ހުކުމެއް އިސްތިއުނާފް ކުރުމުން ލުޔެއް ލިބިއްޖެ އެވެ.
ގްރީކުގެ ޓޫރިސްޓް މަންޒިލް މައިކޯނޯސްގައި، 2020 ވަނަ އަހަރު ޗުއްޓީ ހޭދަކުރިއިރު ހިނގާދިޔަ މާރާމާރީގައި މެގުއާ މައްޗަށް ކުށް ސާބިތުވެ، އޭނާ އަށް ދިނީ 21 މަހާއި 10 ދުވަހުގެ ސަސްޕެންޑެޑް ޖަލު ހުކުމެކެވެ. މާނަ އަކީ ހުކުމް ތަންފީޒުކުރަން ޖެހޭނީ އެ ފަދަ ކުށެއް ތަކުރާރުކޮށްފިނަމަ އެވެ.
މި މައްސަލަ ސީރޯސް ކޯޓުން ބެލިއިރު، މެގުއާގެ މައްޗަށް ސާބިތުވި ކުށްތަކުގެ ތެރޭގައި ސަރުކާރުގެ އޮފިޝަލަކާ މާރާމާރީ ހިންގުމުގެ އިތުރުން ރިޝްވަތު ދޭން އުޅުން ހިމެނެ އެވެ.
ކޯޓުގައި މައްސަލަ ކުރިއަށްދިޔައިރު ބާ އަށް ދިޔަ ފުލުހުން ވަނީ ހާއްސަކޮށް މެގުއާއާ ދެކޮޅަށް ގިނަ ހެކި ހުށަހަޅައިފަ އެވެ. އެއް ފުލުހަކު ވަނީ މެގުއާ ޕޮލިސް ސްޓޭޝަނަށް ގެނައުމުން އޭނާ ދެއްކި ވާހަކަތައް ކޯޓުގައި ކިޔައިދީފަ އެވެ. އެ ގޮތުން، މެގުއާ ވަނީ އޭނާ އަކީ ކާކުކަން ނޭނގެނީތޯ ފުލުހުން ގާތުގައި އަހައިފަ އެވެ. އަދި، އޭނާ އަކީ ޔުނައިޓެޑްގެ ކެޕްޓަން ކަމަށާއި އޭނާ އަތުގައި ވަރަށް ބައިވަރު ފައިސާ އެބަހުރި ކަމަށާއި މައްސަލަ ނުޖައްސައި ދޫކޮށްލާނަމަ ބޭނުންވަރަކަށް ފައިސާ ދޭން ތައްޔާރަށް ހުރި ކަމަށް މެގުއާ ބުނެފައިވާ ކަމަށް ފުލުހުން ވަނީ ކޯޓުގައި ބުނެފަ އެވެ.
މެގުއާގެ ވަކީލު ވަނީ މި ހުރިހާ ވާހަކަތަކަށް ދެކޮޅު ހަދައިފަ އެވެ. އޭނާ ބުނީ މައްސަލަ ގޯސްވީ ބާ ތެރޭގައި ތިބި ބަޔަކު މެގުއާގެ ކޮއްކޮއާ ދިމާކޮށް އޭނާ އަށް އަނިޔާކުރުމުން ކަމަށެވެ. އަދި، ފުލުހުންނާ ދެމެދު ހިނގި ހަމަނުޖެހުމުގައި ފުލުހުން ވަނީ ގަސްދުގައި މެގުއާގެ ފަޔަށް އަނިޔާކޮށްފައި ކަމަށް ވަކީލު ބުނެފައިވެ އެވެ. އަދި މި މައްސަލައިގައި ފުލުހުންގެ ފަރާތުން ފެނުނީ ވަރަށް ޕްރޮފެޝަނަލް އުސޫލުތަކާ ހިލާފު އަމަލުތަކެއްކަން މެގުއާގެ ވަކީލު ފާހަގަކޮށްފައިވެ އެވެ. އެ ގޮތުން ފުލުހަކު ވަނީ މެގުއާ އަށް ދެން ފުޓްބޯޅަ ނުކުޅެވޭ ވަރު ކުރާނެ ކަމަށް ބުނެ އޭނާ ފައިގައި ވަރަށް ގިނައިން ޖަހާފައި ކަމަށް ވަކީލު ބުނެ އެވެ.
މި މައްސަލަ އިސްތިއުނާފު މަރުހަލާގައި، ހަތަރު ފަހަރު ކޯޓުގައި ތާވަލުކުރިއިރު، އެންމެ ފަހުން މައްސަލަ ނިމުނީ ދާދި ފަހުން، ފުރިހަަމަ ތަހުގީގެއް ހިންގުމަށްފަހު އެވެ. އަދި، މެގުއާގެ މައްޗަށް ސާބިތުވި ކުށް މަދުވުމާ އެކު، ހުކުމްގެ މުއްދަތު 15 މަހަށް ވަނީ ކުޑަކޮށްފަ އެވެ.
ރިޕޯޓްތައް ބުނާގޮތުން، މެގުއާގެ ގާނޫނީ ޓީމުން މިހާރު ނިންމާފައި އޮތީ މި މައްސަލަ ސުޕްރީމް ކޯޓަށް ގެންގޮސް، އެއްވެސް ކުށެއް ނުކުރާ މީހެއްގެ ގޮތުގައި މި ކަމުން ސަލާމަތްވުމަށެވެ. މި މައްސަލަ ކޯޓުން ބޭރުން ހައްލުކުރަން ތަކުރާރުކޮށް، އެކި ފަރާތްތަކުން މަސައްކަތް ކުރި ނަމަވެސް އެ ގޮތަށް މެގުއާ ބޭނުމެއްނުވި އެވެ.
