ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން އުޅޭ ކަމުގެ މައުލޫމާތެއް ޑިފެންސް މިނިސްޓަރު މާރިޔާ އަހްމަދުދީދީއާ ހިއްސާކުރެއްވުމުން ފިޔަވަޅު އެޅުއްވި ހެއްޔެވެ؟
ރައްޔިތުންނަކަށް ޖަވާބު ސާފެއް ނޫނެވެ؛ ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބް ވިދާޅުވި ގޮތުން ނަމަ ނަޝީދަށް ހަމަލާއެއް ދޭން އުޅުނު ކަމަށް ލިބިވަޑައިގަތް މައުލޫމާތާ ގުޅިގެން މިނިސްޓަރާ ވާހަކަ ދެއްކެވި އެވެ.
ސެކިއުރިޓީންނާ އެކު ނަޝީދު ހުންނަވަނިކޮށް އަވަހާރަކޮށްލަން ދިން ބޮމުގެ ހަމަލާއާ ގުޅިގެން ފެންމަތިވި މި ވާހަކައިން މިނިސްޓަރުގެ އިސްތަށިފުޅުގައި ބޮޑު ތުހުމަތެއް އެޅިއްޖެ އެވެ. ވެރިކަން ހިންގާ ޕާޓީގެ އެތެރެއިންނާއި ބޭރުން މާރިޔާގެ އިސްތިއުފާއަށް ދަނީ ގޮވަމުންނެވެ. އެކަމަކު އެއްޗެއް ވިދާޅު ނުވެ ހިމޭނުން ހުންނެވުމުން މިނިސްޓަރާއި މުޅި މުއައްސަސާއަށް އަމާޒުވާ ފާޑުކިއުންތައް ދަނީ އިތުރުވަމުންނެވެ.
ނަޝީދަށް އަމާޒުކޮށް ސައިކަލެއްގައި ހަރުކޮށްގެން ބޮމެއް ގޮއްވާލާފައި ވަނީ މި މެއި މަހުގެ ހަ ވަނަ ދުވަހެވެ. ހަމަލާއަށްފަހު ނަޝީދުގެ ފުރާނަ ސަލާމަތް ކުރުމަށް ޑޮކްޓަރުން 16 ގަޑިއިރުގެ އޮޕަރޭޝަނެއް ކުރި އެވެ. މިހާރު އެމަނިކުފާނު ހުންނެވީ އިތުރު ފަރުވާއަށް ޖަރުމަނުގަ އެވެ.
ބޮން ގޮއްވުމުގެ ކުރިންނާއި ފަހުން ސިފައިން އަމަލުކޮށްފައިވާ ގޮތުން އެ މުއައްސަސާއަށް ގިނަ ފާޑުކިއުންތަކެއް އާންމުންނާއި ސިޔާސީ އެކި މީހުންގެ ފަރާތްތަކުން އަމާޒުވި އެވެ. އެ ފާޑުކިއުންތަކުން މުއައްސަސާގެ އަގު ހިފެހެއްޓޭވަރުގެ ދިފާއުތަކެއް ހާމާނުކުރުމުން ތުހުމަތުތައް ދަނީ ބޮޑުވަމުންނެވެ.
ފާޑުކިޔާ ފަރާތްތަކަށް އެންމެ ބޮޑު މައްސަލައަކަށްވީ ނަޝީދަށް ބަޔަކު ހަމަލާދޭން އުޅޭކަން ރައްޔިތުން މަޖިލީހުގެ މެމްބަރު އިލްޔާސް ލަބީބް، ޑިފެންސް މިނިސްޓަރު މާރިޔާ އަހުމަދު ދީދީއާ ހިއްސާ ކުރައްވާފައި އޮތް ނަމަވެސް ހަމަލާ ނުހުއްޓުވުމުންނެވެ.
ގިނަ ބައެއްގެ ސުވާލަކީ ނަޝީދުގެ ސަލާމަތީ ކަންކަން ބަލާ އެމްއެންޑީއެފުން، އެ ހަމަލާގެ މައުލޫމާތު ލިބުމުން އެޅީ ކޮން ފިޔަވަޅެއްތޯ އެވެ؟ ނުވަތަ މައުލޫމާތާ ގުޅިގެން ފިޔަވަޅެއް އެޅިތޯ އެވެ؟
ހަމަލާގެ މައުލޫމާތު މިނިސްޓަރާ ހިއްސާކޮށްފައި އޮތް ކަން ހާމަވުމުގެ ކުރިން ސިފައިން ބުނަމުންދިޔައީ ރައީސް ނަޝީދަށް ދިން ހަމަލާއާ ގުޅޭ އެއްވެސް މައުލޫމާތެއް ލިބިފައިނުވާ ކަމަށެވެ. ނަމަވެސް އަބަދުވެސް ނަޝީދަށް އޮތް ތުރެޓުތަކުގެ މައުލޫމާތު ލިބެމުން އަންނަ ކަމަށް ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލް ވިދާޅުވި އެވެ.
އެމަނިކފާނަކީ ރާއްޖޭގެ އެންމެ ހައި ރިސްކު ބޭފުޅާކަން ވެސް އެ ރޭ ސިފައިން އާއްމުކުރި އެވެ.
ނަޝީދު އަވަހާރަކޮށްލަން ހަމަލާއެއް ރާވަމުންދާކަމުގެ މައުލޫމާތު ޑިފެންސް މިނިސްޓަރަށް އެރުވި ކަމަށް ރައްޔިތުންގެ މަޖިލީހުގެ މެމްބަރަކު ވިދާޅުވުމުން އާންމުންގެ ހިތުގައި ވަރަށް ގިނަ ސުވާލުތަކެއް އުފެދުނެވެ. އެންމެ ބޮޑު ސުވާލަކީ އެވަރުގެ މައުލޫމާތެއް އެނގެތިބެމެ ވެސް ހަމަލާ ނުހުއްޓުވުނީ ކީއްވެތޯ އެވެ؟ މި ސުވާލަށް ޖަވާބު ނުލިބުމުން ގިނަ މީހުން ދެން އުފައްދާ ސުވާލަކީ ސިފައިން މިފަދަ މަސައްކަތްތައް ކުރުމަށް ސިފައިން ގާބިލްތޯ އެވެ؟
ފާޑުކިއުން އިތުރަށް އަމާޒުވާން މެދުވެރިވި ސަބަބަކީ ރައީސް ނަޝީދު އޭޑީކޭ ހޮސްޕިޓަލުގައި އޮއްވާ އެތަނުގެ ފާހަނާއެއް ތެރެއިން ބަޑިއެއް ފެނުމެވެ. ފުލުހުން ބޭއްވި ނޫސްވެރިންގެ ބައްދަލުވުމެއްގެ ތެރެއިން އެކަން ހާމަކުރީ ނޫސްވެރިއެކެވެ.
ސިފައިން ފަހުން ބުނެފައި ވަނީ ފާހަނާ ތެރެއިން ފެނުނު ފިސްތޯލަކީ ސިފައިންގެ މީހެއްގެ ބަޑިއެއް ކަމަށެވެ. އަދި ބަޑި އެތަނުގައި ބަޑި ބޭއްވި ސިފައިންގެ މީހާ މަސައްކަތުން އެކަހެރިކޮށް މައްސަލަ ތަހުގީގު ކުރަމުންދާ ކަމަށް ވެސް ބުންޏެވެ.
އެކަމަކު، ޓެރަރިސްޓު ހަމަލާއެއްގައި ޒަހަމްވެވަޑައިގެން، ރައްޔިތުންގެ މަޖިލީހުގެ ރައީސްގެ ފުރާނަ ސަލާމަތް ކުރުމަށް އޭޑީކޭގައި ފަރުވާ ދެމުންދިޔައިރު، ހޮސްޕިޓަލުގެ މުވައްޒަފަކަށް ފާހަނާ ތެރެއިން ބަޑިއެއް ފެނުމަކީ ކުޑަ މައްސަލައެއް ނޫނެވެ.
އެހެންކަމުން ބަޑި ފެނުނު މައްސަލައިގައި ސިފައިން އިސް ނަގައިގެން އެކަން އާންމުންނާ ހިއްސާ ނުކުރުމުން އާންމުންގެ ފަރާތުން ގިނަ ފާޑުކިޔުން އަމާޒުވި އެވެ.
ރައީސް ނަޝީދު އަވަހާރަކޮށްލަން ބޮން ގޮއްވި ފަހުން ސިފައިން ނޫސްވެރިންނާ ބައްދަލު ކުރީ އެންމެ ފަހަރަކު މެއި، 7، ގަ އެވެ. އެ ބައްދަލުވުމުގައި ވެސް ނޫސްވެރިންގެ ސުވާލުތަކަށް އެކަށީގެންވާ ޖަވާބު ނުދެއްވައި ސިފައިންގެ ލީޑާޝިފުން ވިދާޅުވާން މަސައްކަތްކުރީ ނަޝީދުގެ ސަލާމަތަށް އެ މުއައްސަސާ އިން ކުރަން ޖެހޭ ހުރިހާ ކަމެއް ކޮށްފައިވާ ކަމެވެ. މުއައްސަސާގެ ޒިންމާ ފުރިހަމަ ގޮތުގައި އަދާވިތޯ ކަށަވަރުކުރަން ނޫސްވެރިންނަށް އިތުރު ސުވާލުކުރާނެ ފުރުސަތު ނުދީ ވަކި ހިސާބަކުން ނިންމާލީ އެވެ. އޭރު ސުވާލުކުރުމުގެ އެންމެ ފުރުސަތެއް ނުލިބޭ ނޫސްވެރިން ވެސް ތިއްބެވެ.
އެ ޝަކުވާ ކުރުމުން، ނޫސްވެރިންގެ ބައްދަލުވުމަށްފަހު ނޫސްވެރިންނަށް ޝަމާލް ވިދާޅުވީ ފަހުން އިތުރު ނޫސްވެރިންގެ ބައްދަލުވުންތަކެއް ބާއްވާނެ ކަމަށާއި ބޭނުންވާ ހުރިހާ ސުވާލުތަކެއް ކުރުމުގެ ފުރުސަތު ދެއްވާނެ ކަމަށެވެ.
ނަމަވެސް އޭގެ ފަހުން މިހާތަނަށް ސިފައިން ރަސްމީ ސިފައެއްގައި ނޫސްވެރިންނާ ބައްދަލު ނުކުރާއިރު އެތަނުގެ ރަސްމީ ތަރުޖަމާނު ވެސް ނޫސްވެރިންގެ ސުވާލުތަކަށް ޖަވާބެއް ނުދެއްވަ އެވެ. ހަމައެކަނި ޖަވާބެއް ދެއްވީ ބަޑި ފެނުނު މައްސަލަ އާންމުންނާ ހަމައަށް ތިލަވުމުން އެކަމުގައި ނޫސްވެރިންނަށް ފޮނުވި ކުޑަކުޑަ ސްޓޭޓްމަންޓެކެވެ.
ނަޝީދަށް އަމާޒުކޮށް ބޮން ގޮއްވާލާފައި ވަނީ އެމަނިކުފާނު ދިރިއުޅުއްވާ ގ. ކެނެރީގެ ހުންނާ ނީލޯފަރުމަގާއި މަޖީދީމަގު ގުޅޭ ކަންމަތީގައި ސައިކަލެއްގަ ބޮން ހަރުކޮށްގެނެވެ. ހަމަލާގެ ސަބަބުން ނަޝީދު ވަރަށް ބޮޑަށް ޒަހަމްވެވަޑައިގެންނެވި އެވެ.
ބެއަރިން ބޯލްސްތަކެއް އަޅައިގެން ވަރަށް ބާރުގަދަކޮށް ހަދާފައިވާ ބޮން ރިމޯޓު ބޭނުންކޮށްގެން ގޮއްވާލާފައި ވަނީ އެމަނިކުފާނު ބޮމާ އެންމެ ކައިރިވެވަޑައިގެންނެވި ވަގުތު ބެލުމަށްފަހު އެވެ.
އޭޑީކޭގެ ޑޮކްޓަރުން ނަޝީދުގެ ހަށިކޮޅުގައި ގާތްގަނޑަކަށް 16 ގަޑިއިރުގެ ސާޖަރީތަކެއް ހެދި އެވެ. ބޮމުގެ ތެރެއަށް އަޅާފައި އޮތް 10 ބެއަރިން ބޯލްސް އެމަނިކުފާނުގެ ހަށިކޮޅުން ނެގި އެވެ. އަދި ބޮން ހަރުކޮށްފައި ހުރި ސައިކަލުގެ ޕްލާސްޓިކު އެތިކޮޅެއް ވެސް ހަށިގަނޑުން ފެނުނެވެ.
ބޮން ގޮއްވާލި މައްސަލައިގައި މިހާތަނަށް ފުލުހުން ވަނީ ހަތަރު މީހަކު ހައްޔަރުކޮށްފަ އެވެ. އަހުމަދު އަދުހަމް، 25، އާއި މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އަދި ދަރަވަންދޫއިން ލ.ގަން، ދުންފިނި އުފާ، އަހުމަދު ފާތިހު، 23، އެވެ.
އޭގެ ތެރެއިން އަދުހަމަކީ ބޮން ގޮއްވާލި ކަމަށް ތުހުމަތު ކުރެވޭ މީހާ އެވެ. ތަހުމީނަކީ ސައިކަލުގެ ވެރި މީހާ އެވެ. ދެން ތިބި މީހުން ހަމަލާއާ ގުޅެނީ ކޮން ގޮތަކުންކަން ފުލުހުން އަދި ހާމަކޮށްފައެއް ނުވެ އެވެ.
