އެމްއެމްއޭއިން އަންގާފައިވާ ގޮތަށް ބޭންކު ހުޅުވައިގެން ތިން ދުވަހު ހިދުމަތް ދިން ނަމަވެސް، ހަފުތާ ބަންދު ނޫން އަނެއް ދެ ދުވަހު ބޭންކުގެ އަސާސީ ހިދުމަތްތައް ލިބޭނެ ކަމަށް ބޭންކް އޮފް މޯލްޑިވްސް (ބީއެމްއެލް)އިން ބުނެފި އެވެ.
މި ހިނގާ ހަފުތާގެ ނިޔަލަށް ބޭންކު ހުޅުވައިގެން ހިދުމަތް ދޭނީ ހޯމަ، އަންގާރަ އަދި ބުރާސްފަތީގަ އެވެ. މި ދުވަސްތަކުގައި ބޭންކުން ހިދުމަތްދޭ ގަޑިތަކަކީ ހެނދުނު 8:30 އިން ފެށިގެން މެންދުރު 12:30 އަށެވެ. މިއީ އެހެން ބޭންކުތަކަށް ވުރެ ބައި ގަޑި އިރު އިތުރެވެ.
ހަފުތާގެ ތެރޭގައި ބޭންކުން ދޭ އަސާސީ ހިދުމަތްތަކަކީ:
- ރާއްޖޭން ބޭރަށް ފައިސާ ފޮނުވުން
- ބީއެމްއެލް ޗެކް ޕްރޮސެސް ކުރުން
- ޕޭރޯލް ހިދުމަތް
މި ހިދުމަތްތަކަށާއި ލޯކަލް ބޭންކް ޓްރާންސްފާތަކަށް އެ ދުވަހެއްގެ 11:00 ގެ ކުރިން ހުށައަޅައިގެން ދުވަހުން ދުވަހަށް ޕްރޮސެސް ވާނެ ކަމަށް ބީއެމްއެލްއިން ބުންޏެވެ. އަދި ބީއެމްއެލްގެ އެކައުންޓްތަކުގެ މެދުގައި ކުރެވޭ މުއާމަލާތެއް ނަމަ އެ ދުވަހެއްގެ 12:00 ގެ ކުރިން ހުށައެޅުމުން ވާނެ އެވެ.
ބޭންކު ބަންދުކޮށްފައި ހުންނަ ދެ ދުވަހު މި ހިދުމަތްތަކަށް އެދެން ޖެހެނީ ބޭންކުގެ އޮންލައިން ޕޯޓަލްތަކާއި އެޕް މެދުވެރިކޮށެވެ. އަދި ޗެކުތައް އޭޓީއެމްއަށް ޑިޕޮސިޓް ކުރުމުން ޕްރޮސެސްކޮށް ދޭނެ އެވެ.
ބޭންކު ހުޅުވާފައި ހުންނަ ދުވަސްތަކުގައި މި ހިދުމަތްތައް ހޯދަން އޮންލައިން ޓޯކަންއަށް އެދެވޭނެ އެވެ. ބީއެމްއެލްއިން ޓޯކަން ދޫކުރަނީ ހެނދުނު 8:30 އިން ފެށިގެން މެންދުރު 12:00 އަށެވެ. ޓޯކަން ދޫކުރަނީ ކިއުބީ އެޕުންނެވެ.
ހަފުތާގެ ތެރޭގައި ބޭންކުން މެދުކެނޑުމެއް ނެތި މި ހިދުމަތްތައް ދޭން ނިންމި ސަބަބާ ގުޅޭގޮތުން ބީއެމްއެލްގެ ޕަބްލިކް ރިލޭޝަންސް މެނޭޖަރު މުހައްމަދު ސައީދު "އަދަދު" އަށް ވިދާޅުވީ، އެގޮތަށް ނިންމީ ކުރިއަށް އޮތް ދުވަސްތަކުގެ ތެރޭގައި މުވައްޒަފުންގެ މުސާރަ އާއި ގުޅޭ ކަންކަން ކުރުމުގައި ލުއިފަސޭހަ ގޮތްތަކެއް ބޭންކުގެ ކަސްޓަމަރުންނަށް ހަމަޖައްސައި ދިނުމުގެ ބޭނުމުގައި ކަމަށެވެ.
ބޭންކުގެ އެހެނިހެން ހިދުމަތްތައް ދެނީ އެޕޮއިންޓްމަންޓު އުސޫލުންނެވެ. މި އެޕޮއިންޓަމްންޓްތަށް ދޫކުރަނީ ބޭންކުގެ ވެބްސައިޓުންނެވެ. އެޕޮއިންޓްމަންޓް އުސޫލުން ބީއެމްއެލްއިން ދޭ ހިދުމަތްތަކަކީ އެކައުންޓް އޯޕެނިން ސެންޓާ، ލޯން ސެންޓާ އަދި ބިޒްނަސް ސެންޓާތަކުން ކަސްޓަމަރުންނަށް ފޯރުކޮށްދޭ ހިދުމަތްތަކެވެ.
