ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާއާ ގުޅިގެން ބ. ދަރަވަންދޫން މިިދިޔަ ބުދަ ދުވަހުގެ ރޭ ހައްޔަރުކުރި ލ. ގަން، ދުންފިނިއުފާ، އަހްމަދު ފާތިހު ފުލުހުންގެ ވަޒީފާގައި އުޅުނުކަން އެ މުއައައްސަސާ އިން މިއަދު ކަށަވަރުކޮށްދީފި އެވެ.
"އަދަދު"އަށް އެނގިފައިވާ ގޮތުގައި އޭނާ މަސައްކަތް ކުރީ ފުލުހުންގެ އިންޓެލިޖެންސްގަ އެވެ.
މިކަމާ ގުޅިގެން ސުވާލުކުރުމުން ފުލުހުންގެ މީޑިއާ އޮފިޝަލް ވިދާޅުވީ ފާތިހު ފުލުހުންގެ ވަޒީފާގައި މަސައްކަތް ކުރި ކަމަށެވެ. އެކަމަކު މަސައްކަތް ކުރި ޑިޕާޓްމެންޓެއް އޮފިޝަލް ވިދާޅެއް ނުވެ އެވެ.
މި އަހަރުގެ ތެރޭގައި އޭނާ ވަޒީފާއިން ވަކިވީ އަމިއްލައަށް، -- ފުލުހުންގެ އޮފިޝަލް
އޭނާ ފުލުހުންގެ ހިދުމަތާ ގުޅުނު ތާރީހެއް އަދި ސާފެއް ނުވެ އެވެ.
ފާތިހު ކެބިން ކްރޫއެއްގެ ވަޒީފާގައި ވެސް އުޅުނެވެ. އެ ވަޒީފާއިން ވަކިވީ ހަރުކަށި ފިކުރުގެ މީހުންނާ އެކު އުޅެން ފަށައި، ބަދަލުވާން ފެށި ވިސްނުމާއެކުގައި ކަމަށް ވެ އެވެ.
ދަރަވަންދުއަށް ގޮސްއުޅެނިކޮށް ހައްޔަރުކުރި ފާތިހުގެ ބަންދަށް 15 ދުވަސް ޖަހައި އޭނާ ވަނީ މާލެ ގެނެސްފަ އެވެ.
އޭނާ އަކީ އެނގިފައިވާ ގޮތުގައި، ނަޝީދު އަވަހާރަކޮށްލަން އައިއީޑީ ގޮއްވާލި ސައިކަލާ ގުޅުން ހުރި މީހެކެވެ. ނީލޯފަރު ހިނގުމުގައި ބޮން ގޮއްވާލީ ކެނެރީގެއިން ނުކުމެވަޑައިގެން ނަޝީދު ހިންގަވާފައި ކާރުކޮޅާ އަރާ ހަމަވިތަނުންނެވެ.
ނަޝީދަށް ދިން ހަމަލާއާ ގުޅިގެން މިހާތަނަށް ފާތިހު ހިމެނޭ ގޮތުން ޖުމްލަ ހަތަރު މީހަކު ވަނީ ހައްޔަރު ކޮށްފަ އެވެ.
އެއީ ބޮންގޮއްވާލުމުގައި އަމަލީ ގޮތުން ބައިވެރިވި ކަމަށް ތުހުމަތު ކުރެވޭ އަދުހަމް އަހުމަދުގެ އިތުރުން، މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އެވެ.
އޭގެ ތެރެއިން ތަހުމީނަކީ ސައިކަލުގެ ވެރި މީހާ ކަމަށް ފުލުހުން ބުނެފައިވެ އެވެ. އެނގިފައިވާ ގޮތުގައި، ސީރިއާއަށް ދާން ޖެހޭ ކަަމަށް ފާޅުގައި ވާހަކަ ދައްކާ ތަހުމީން ވަނީ ނަޝީދަށް އޮންނަ ރުޅިވެރިކަން އޭނާގެ ގާތްމީހުންގެ ގާތުގައި ހާމަކޮށްފަ އެވެ.
އެ ތިން މީހުންނަކީ ވެސް ހަރުކަށި ފިކުރާ ގުޅުން އޮތް މީހުން ކަމަށް ބެލެވޭ ކަމަށް ފުލުހުން ބުނެފައިވެ އެވެ.
