އިމާރާތަކުން މީހަކު ވެއްޓުމުގެ ދެ ހާދިސާއެއް ކައިރިކައިރީގައި ހިނގައިފި އެވެ.
ފުރަތަމަ ހާދިސާ ހިނގާފައިވަނީ ރޭ މެންދަމު، 3:00 ހާއިރު ހުޅުމާލޭ ނިރޮޅުމަގުހެ ހަވަނަ ނަންބަރު ގޯޅީގަ އެވެ. ފުލުހުން ބުނި ގޮތުގައި އެ ގޯޅީގައި ޒަހަމްތަކާއެކު މީހަކު ވެއްޓިފައި އޮތް ކަމުގެ މައުލޫމާތު ލިބިގެން އެތަނަށް ފުލުހުން އެޓެންޑްވި ކަމަށެވެ.
އުމުރުން 21 އަހަރުގެ އެ މީހާ އައިޖީއެމްއެޗް ހޮސްޕިޓަލަށް ގެންގޮސް ފަރުވާދެމުންދާއިރު، ހޮސްޕިޓަލަށް ގެންދިޔައިރު އެމީހާގެ ހޭވެރިކަން ނެތް ކަމަށް ފުލުހުން ބުންޏެވެ.
އެމީހާ ވެއްޓިފައި އޮތް މަންޒަރު ފެންނަ ވީޑިއޯތަކެއް ސޯޝަލް މީޑިއާގައި އާންމުވެފައިވާއިރު، އޭގެން ފެންނަ ގޮތުން އޭނާ އޮތީ ބޮކްސާ ފިޔަވައި އިތުރު އެއްޗެއް ގަޔަށް ލައިގެނެއް ނޫނެވެ. ގިނަ ޒަހަމްތަކެއް ލިބިފައިވާ ކަމަށް ބެލެވޭއިރު ގިނަ އަދަދެއްގެ ލޭ ފައިބާ ހުއްޓެވެ.
ވީޑިއޯތަކުން ފެންނަ ގޮތުގައި އޭނާ ހަރަކާތްކުރެ އެވެ. އަދި، އަޅަމުންދިޔަ ވޭންތަކަށް ކެތްނުކުރެވިގެން އުޅޭ މަންޒަރު ފެނެ އެވެ.
އޭނާ ވެއްޓިފައިވަނީ ގެސްޓްހައުސްއެއްގެ ތިންވަނަ ބުރިން ކަމަށް މައުލޫމާތު ލިބޭއިރު އެ ގެސްޓްހައުސްގެ ޓެރެސްގައި ވެސް ލޭހުރި ކަމަށް މައުލޫމާތު ލިބިފައިވެ އެވެ.
ދެވަނަ ހާދިސާ ހިނގާފައިވަނީ، މާލޭގެ އިތާ ގޯޅިގަ އެވެ. ފުލުހުން ބުނި ގޮތުގައި އެ ގޯޅިއަށް ވެއްޓިފައި އޮތް މީހަކު އައިޖީއެމްއެޗް ހޮސްޕިޓަލަށް ގެންގޮސް ފަރުވާ ފަށާފައިވާ ކަމަށެވެ. މިރޭ 1:00 ގައި ހިނގާފައިވާ އެ ހާދިސާއާ ގުޅޭ އިތުރު މައުލޫމާތެއް ފުލުހުން ނުދެ އެވެ.
މައުލޫމާތު ލިބިފައިވާ ގޮތުގައި މަގުމައްޗަށް އެމީހާ ވެއްޓިފައިވަނީ ކުރީގެ ރައީސް މައުމޫން އަބްދުލްގައްޔޫމް ދިރިއުޅުއްވާ އެންދެރިމާގެއާ ޖެހިގެން ހުންނަ އެންދެރިކުރި ގެއިންނެވެ. އެމީހާ ވެއްޓުނު ގޮތެއް ސާފު ނުވާއިރު، އެ ސަރަހައްދުގައި ގިނަ އަދަދެއްގެ ލޭ ފައިބާފައި ހުއްޓެވެ. ވެއްޓި އަނިޔާވެފައިވަނީ 33 އަހަރުގެ ދިވެހި ފިރިހެނަކަށެވެ.
ދެ މައްސަލާގެ ތަހުގީގު ހިންގަމުންދާއިރު، އިތުރު މައުލޫމާތެއް ހާމަކުރެވޭނީ ތަހުގީގަށްފަހު ކަމަށް ފުލުހުންގެ މީޑިއާ އޮފިޝަލް ވަނީ ވިދާޅުވެފަ އެވެ.
