އަންހެނަކު ކޮންމެ ފަދަ ދޮގެއް ވެސް ހަދާފާނެ ކަމަށާއި ގެވެށި އަނިޔާ ހުއްޓުވުމުގެ ގާނޫނު ވެސް އޮތީ ހައްދެއް ނެތް މިންވަރަށް އަންހެނުން ހިމާޔަތްކޮށްދީފައިވާ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް މިއަދު ވިދާޅުވެއްޖެ އެވެ.
ޖުމްހޫރީ ޕާޓީގެ ލީޑަރު ގާސިމް މިގޮތަށް ވިދާޅުވީ ކެނދިކުޅުދޫ ދާއިރާގެ މެމްބަރު އަހްމަދު އީސާއަށް ކުރާ ގެވެށި އަނިޔާގެ މައްސަލައިގެ ތުހުމަތާ ގުޅިގެން ރައްޔިތުންގެ މަޖިލީހުގެ މެމްބަރުން ތިއްބަވާ ވަޓްސްއެޕް ގްރޫޕަކަށް ފޮނުއްވި މެސެޖެއްގަ އެވެ.
އެއީ ގާސިމްގެ މެސެޖެއް ކަން "އަދަދު"އަށް ވަނީ ކަށަވަރުވެފަ އެވެ.
އީސައާ ދެކޮޅަށް މައްސަލަ ހުށަހެޅުއްވީ ކުރީގެ އަނބިކަބަލުން އަސްރާ ނަސީމެވެ. އެ މައްސަލައިގެ ތަހުގީގަށް ފުލުހުންނަށް ބަޔާން ދެއްވުމަށް ފަހު އަސްރާ ފޭސްބުކްގައި ލިއުއްވި ގޮތުގައި އަނިޔާގެ އެ ތަޖުރިބާއަކީ ދުވަހަކު ވެސް ކުރިމަތިވެދާނެ ކަމަށް ހީކުރެއްވި ކަމެއް ނޫން ކަަމަށެވެ.
އޭނާ އާއި ދެ އަހަރު ނުވާ ދަރިފުޅަށް އަނިޔާކުރި ކަމަށް ވަނީ އިއްޔެ ރޭ ދަންވަރެވެ. މި މައްސަލަ ފުލުހުން ވެސް އަންނަނީ ތަހުގީގު ކުރަމުންނެވެ.
އީސައާ ގުޅޭ ގޮތުން ގާސިމް ވާހަކަ ދައްކަވަން ފެއްޓެވީ އީސަ، ދަރިފުޅާ އެކު ހުންނެވި ފޮޓޯއެއް އެ ގްރޫޕަށް ފޮނުއްވުމަށް ފަހު އެވެ.
ގާސިމް ވިދާޅުވީ "މިފަދަ ލޯބިވާ ކުއްޖަކާ މެދު އެފަދަ އަމަލެއް ހިންގަފާނެ ކަމަށް ގަބޫލުކުރަން ވަރަށް ދަތި" ކަމަށެވެ. މިގޮތަށް މި ވިދާޅުވީ އަނބިކަނބަލުން ނަސްރާ ނަސީމަށް އީސަ އަނިޔާކުރިއިރު ދަރިފުޅަށް ވެސް އަނިޔާ ދޭން އުޅުނު ކަމަށް ތުހުމަތު ކުރަނިކޮށެވެ.
ގާސިމް ވިދާޅުވި ގޮތުގައި "އަންހެނަކު ކޮންމެ ފަދަ ދޮގެއް ވެސް ހަދާފާނެ" އެވެ. މިހެން ވިދާޅުވުމަށް ފަހު ބްރެކެޓުގައި އަދި ފިރިހެނުން ވެސް ޖަހާފައިވެ އެވެ.
އެހެންވެ މައްސަލަ ތަހުގީގު ކުރަން ޖެހޭނީ ވަރަށް އިންސާފުން ކަމަށް ވިދާޅުވި އެވެ.
"އަޅުގަނޑު ގަބޫލުކުރާ ގޮތުގައި ގެވެށި އަނިޔާގެ ގާނޫނު އެވަނީ ހައްދެއް ނެތް މިންވަރަށް އަންހެން ބޭފުޅުން ހިމާޔަތްވާ ގޮތަށް،" ގާސިމް ވިދާޅުވި އެވެ.
އޭނާ ވިދާޅުވީ މީހަކު ހައްޔަރުކުރެވޭނީ ހަތަރު ކަމެއް ފުރިހަމަވެގެން ކަމަށެވެ. ނޫން ނަމަ ގާނޫނުއަސާސީއާ ހިލާފުވާނެ ކަަމަށެވެ.
"މީހަކު ބުނާހާ ބަހަކަށް އެއްވެސް މީހަކު ހައްޔަރުކޮށްގެން ނުވާނެ. އެއީ އިންސާފުން ބޭރުން އެއްފަރާތަކަށް ދެވޭ ބޮޑު އަނިޔާއެއް ވީމާ އަޅުގަނޑު ގަބޫލުކުރާ ގޮތުގައި މި ތަހުގީގު ކުރެވެން ވާނީ ހަމަ އެކަކު ވެސް ބަންދުނުކޮށް ބަހައްޓައިގެން އަދުލުވެރިކަމާ އެކު،" ގާސިމް ވިދާޅުވި އެވެ.
ގާސިމް މިގޮތަށް ވާހަކަ ދެއްކެވިއިރު އީސަގެ މައްސަލަ ބަލައިދޭން ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ ވަނީ މަޖިލީހުގެ ޖެންޑާ އެންޑް ހިއުމަން ރައިޓްސް ކޮމިޓީއަށް ހުށަހަޅައިފަ އެވެ. އިޖުތިމާއީ ކޮމިޓީން އީސަ ވަކިކުރަން ކޮމިޓީ ވެސް ބޭއްވި އެވެ. އެކަމަކު ކޯރަމް ހަމަނުވެގެން އޭނާ ވަކިނުވީ އެވެ.
އެކަމަކު ކޮމިޓީގެ ފަހުން އީސަ ވަނީ މަގާމުން އިސްތިއުފާ ދެއްވައިފަ އެވެ.
