ރޭ ފުލުހުން ހިންގި ހާއްސަ އޮޕަރޭޝަނެއްގައި ހައްޔަރު ކުރި ލ.ގަން، ދުންފިނި އުފާ، އަހުމަދު ފާތިހުގެ ބަންދަށް 15 ދުވަސް ޖަހައިފި އެވެ.
އޭނާގެ ބަންދަށް 15 ދުވަސް ޖަހާފައިވަނީ ބ. އޭދަފުށީ މެޖިސްޓްރޭޓް ކޯޓުންނެވެ. އޭގެފަހުން އޭނާ ވަނީ މާލެ ގެނެސްފަ އެވެ.
ފާތިހަކީ، ކުރީގެ ރައީސް މުހައްމަދު ނަޝީދު އަވަހާރަކޮށްލަން މި މަހުގެ ހަ ވަނަ ދުވަހު ބޮމެއް ގޮއްވާލައި ދިން ހަމަލާއާ ގުޅުންހުރި މީހެއްކަން ފުލުހުން މިއަދު ވަނީ ހާމަކޮށްފަ އެވެ. އެހެންކަމުން މިއީ އެ މައްސަލައިގައި ހައްޔަރު ކުރި ހަތަރު ވަނަ މީހާ އެވެ.
ފާތިހު ދަރަވަންދޫއަށް ދިޔައީ މީހަކާ ކައިވެނިކުރަން މި މަހުގެ 10 ވަނަ ދުވަހު ކަމަށްވެ އެވެ. އެހެންކަމުން އޭނާ ހައްޔަރު ކުރީ ކަރަންޓީނުގައި ހުއްޓަ އެވެ.
ރައީސް ނަޝީދަށް ހަމަލާދީފައި ވަނީ ވޭވު ސައިކަލެއްގަ އައިއީޑީއެއް ހަރުކުރުމަށްފަހު އެމަނިކުފާނު ސައިކަލާ އެންމެ ކައިރިވި ވަގުތު ބެލުމަށްފަހު ރިމޯޓު ބޭނުންކޮށް ބޮން ގޮއްވާލައިގެންނެވެ.
ރޭޒަރު ފުއްތަކެއް ލައިގެން ގޮއްވާލި އެ ބޮމުގެ މައްސަލައިގައި ކުރިން ހައްޔަރުކޮށްފައި ވަނީ ބޮން ގޮއްވާލި ކަމަށް ތުހުމަތު ކުރެވޭ އަހުމަދު އަދުހަމް، 25، އާއި މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ސައިކަލުގެ ވެރި މީހާ ތަހުމީން އަހްމަދު، 32 އެވެ.
މި ތިން މީހުންގެ ބަންދަށް ވެސް ކުރިމިނަލް ކޯޓުން މީގެކުރިން ވަނީ 15 ދުވަސް ދީފަ އެވެ.
ބޮމުގެ ހަމަލާގައި ރައީސް ނަޝީދު ރަށް ބޮޑަށް އަނިޔާވެވަޑައިގެންނެވި އެވެ. ގާތްގަނޑަކަށް 16 ވަރަކަށް ގަޑިއިރުގެ އޮޕަރޭޝަނަކަށްފަހު ނަޝީދުގެ ހަށިކޮޅުން 10 ރޭޒަރު ފުއް ޑޮކްޓަރުން ނެގި އެވެ. އަދި ހަށިކޮޅުގައި ބޮން ހަރުކޮށްފައި ހުރި ސައިކަލުގެ ޕުލާސްޓިކު ކޮޅެއް ވެސް ތާށިވެފައި އޮތެވެ.
އިތުރު ފަރުވާއަށް ނަޝީދު ވަނީ ޖަރުމަނަށް ފުރާވަޑައިގެންފަ އެވެ.
