މެންޗެސްޓާ (މެއި 18) - އިނގިރޭސި ޕްރިމިއާ ލީގުގައި މިރޭ ފުލަމްއާ 1-1 އިން އެއްވަރުވި މެޗަށް ފަހު މެންޗެސްޓާ ޔުނައިޓެޑްގެ ޕައުލް ޕޮގްބާ އާއި އަމަދު ޑިއާލޯ ފަލަސްތީނުގެ ދިދަ އެ ކްލަބްގެ ސަޕޯޓަރުންގެ ކުރިމަތީގައި ވިހުރުވާލުމާ އެކު ގިނަ ބައެއް އެ ދެ ކުޅުންތެރިންނަށް ތައުރީފުކޮށްފި އެވެ.
މި ދުވަސްވަރު އިޒްރޭލުން ފަލަސްތީނަށް ދެމުންދާ ލާއިންސާނީ ހަމަލާތަކުގެ ސަބަބުން ގިނަ ފުޓްބޯޅަ ކުޅުންތެރިން އަންނަނީ އިޒްރޭލާ ދެކޮޅަށް އަޑުއުފުލަމުންނެވެ.
އިނގިރޭސި އެފްއޭ ކަޕް ފައިނަލުގައި ޗެލްސީ ބަލިކޮށް ލެސްޓާ ސިޓީން ބޭއްވި އުފާފާޅުކުރުމުގެ ތެރޭގައި އެ ޓީމުގައި ހިމެނޭ މުސްލިމް ދެ ކުޅުންތެރިން ކަމަށްވާ ހަމްޒާ ޗޯދުރީ އާއި ވެސްލީ ފޮފާނާ ފަލަސްތީނުގެ ދިދައެއް ގެންގުޅުނު ނަމަވެސް އެ ކުޅުންތެރިންނަށް އަދަބުނުދޭން އިނގިރޭސި އެފްއޭ އިން ނިންމައިފަ އެވެ.
މިރޭގެ މެޗަކީ މިދިޔަ އަހަރުގެ މާޗް ނުވައެއްގެ ފަހުން ޔުނައިޓެޑް ދަނޑަށް ސަޕޯޓަރުން ވައްދައިގެން ކުޅުނު ފުރަތަމަ މެޗެވެ. އެ މެޗަށް ފަހު މުސްލިމް ދެ ކުޅުންތެރިން ކަމަށްވާ ޕޮގްބާ އާއި ޑިއޯލާ އެކުގައި ވަނީ ފަަލަސްތީނުގެ ދިދަ ހިފައިގެން ސަޕޯޓަރުންގެ ކުރިމަތީގައި އެ ދެ ކުޅުންތެރިންގެ ޝުއޫރުފާޅުކޮށްފަ އެވެ.
ޔުނައިޓެޑްގެ ކޯޗު އޮލެ ގުނަ ސޯލްޝެއާ ބުނީ ކުޅުންތެރިން އަމިއްލަ ވިސްނުމުގައި ދެކޭގޮތް ދައްކުވައިދޭން އެފަދަ ކަންކަން ކުރުމުގެ މިނިވަންކަން އޮންނަން ޖެހޭ ކަމަށާއި އޭގެ އެއްވެސް މައްސަލައެއް ނެތް ކަމަށެވެ.
ޕޮގްބާ އޭނާގެ ސޯޝަލް މީޑިއާގައި ލިޔެފައިވަނީ ހަމަނުޖެހުންތަކުން ދުނިޔެ ސަލާމަތްކުރަން މަސައްކަތްކުރުމަށާއި ފަލަސްތީނަށް ހެޔޮދުއާ ކުރުމަށެވެ.
ގިނީގެ ދެމަފިރިއަކަށް ފްރާންސުގައި 1993 ވަނަ އަހަރު އުފަންވި މިހާރު އުމުރުން 28 އަހަރުގެ ޕޮގްބާ އަކީ ދިނީ ކަންކަމަށް ލޯބިކުރާ ކުޅުންތެރިއެކެވެ. ރޯދަ ހިފައިގެން މެޗުތައް ކުޅުމާއި ފުޓްބޯޅަ ސީޒަން ނިންމާލުމަށް ފަހު އުމްރާ އެއް ވުމަށް ސައުދީ އަރަބިއްޔާ އަށް ދިއުމަކީ އާންމުކޮށް ޕޮގްބާ ކުރާ ކަމެކެވެ.
އައިވަރީ ކޯސްޓް ދަރިކޮޅަށް ނިސްބަތްވާ އުމުރުން 18 އަހަރުގެ ޑިއާލޯ ޔުނައިޓެޑަށް ބަދަލުވީ މިދިޔަ ޖެނުއަރީ މަހުގަ އެވެ. އެއީ އިޓަލީގެ އެޓަލަންޓާ ދޫކޮށް 25 މިިލިއަން ޔޫރޯ އަށެވެ. ޑިއާލޯ މިރޭގެ މެޗުގައި ކުޅެން އެރީ ބަދަލު ކުޅުންތެރިއެއްގެ ގޮތުގަ އެވެ.
ޔުނައިޓެޑުން މިރޭ ރެލިގޭޓްވެފައިވާ ފުލަމްއާ އެއްވަރުވިއިރު، އެ ޓީމު މި ވަނީ ޖެހިޖެހިގެން ތިން މެޗު އަމިއްލަ ދަނޑުގައި މޮޅެއް ނުލިބި ނިންމާލަން ޖެހިފަ އެވެ. ޔުނައިޓެޑް ވަނީ މިދިޔަ ހަފްތާގައި ލިވަޕޫލާއި ލެސްޓާ ސިޓީ އަތުން އަމިއްލަ ދަނޑުގައި ބަލިވެފަ އެވެ. ޔުނައިޓެޑް ދެ ވަނައިގައި އޮތީ 37 މެޗުން 71 ޕޮއިންޓާ އެކު އެވެ. މިރޭ ޔުނައިޓެޑްގެ ލަނޑު ޖެހީ ހާފްގެ މެދެއްހާ ހިސާބުން އެޑިންސަން ކަވާނީ އެވެ. ފުލަމް އަށް އެއްވަރުކޮދްދިނީ ޖޯ ބްރަޔަން އެވެ.
