މެންޗެސްޓާ (އޭޕްރީލް 30) - ޔުއެފާ ޔޫރޮޕާ ލީގުގެ ސެމީ ފައިނަލްގައި ރޭ ރޯދަ އަށް ހުރެ މެންޗެސްޓާ ޔުނައިޓެޑްގެ ފްރާންސް މިޑްފީލްޑަރު ޕައުލް ޕޮގްބާ ދެއްކި ކުޅުމަށް ގިނަ ބަޔަަކު ތައުރީފުކޮށްފި އެވެ.
ދީނީ ކަންކަމަށް ލޯބިކުރާ ކުޅުންތެރިއެއްގެ ގޮތުގައި ފާހަަގަކުރެވޭ ޕޮގްބާ ރޭ ރޯމާ އަތުން 6-2 އިން ޔުނައިޓެޑް މޮޅުވި މެޗުގައި ވަނީ ދެ ވަނަ ހާފުގައި ޔުނައިޓެޑަށް ގޯލެއް ޖަހައިދީފަ އެވެ. ދެ ވަަނަ ހާފުގެ މެދުތެރެއިން ރޯދަ ވިއްލުމަށް ފަހު ޕޮގްބާ މުޅި މެޗު ފުރިހަމަކުރި އެވެ.
އުމުރުން 28 އަހަރުގެ ޕޮގްބާއާ ބެހޭގޮތުން އިނގިރޭސި މީޑިއާ، ބީޓީ ސްޕޯޓްސްގެ ޕްރެޒެންޓަރު ރެޝްމިން ޗޯދުރީ ކުރި ޓްވީޓެއްގައި ބުނެފައިވަނީ ރޯމާ މެޗަށް ޕޮގްބާ ނުކުތީ ރޯދަ އަށް ހުރެ ކަމަށާއި މެޗަށް ފަހު ކެއުމަށް ފަހު އިންޓަވިއުދޭން ޕޮގްބާ އައީ އެނާޖީ ޑްރިންކެއް ބޮމުން ކަމަށެވެ. އަދި ރޯދަ އަށް ހުރެ މެޗު ކުޅެނީ ކިހިނެއްތޯ ރެޝްމިން ސުވާލުކުރުމުން ޕޮގްބާ ޖަވާބުގައި ބުނީ "ﷲ ވަނީ އަހަރެމެންނާ އެކުގައި" މިހެނެވެ.
ޔުނައިޓެޑް އިން ކޮށްފައިވާ ޕޮގްބާގެ ޕޯސްޓް.
ރެޝްމިންގެ މި ޓްވީޓަށް ޔުނައިޓެޑްގެ ކުރީގެ ޑިފެންޑަރު ރިއޯ ފާޑިނަންޑް ވަނީ ރިޕްލައިކޮށް މިއީ ރަނގަޅުކަމެއްކަން ފާހަގަކޮށްފަ އެވެ. އަދި ސޯޝަލް މީޑިއާގައި ވަނީ ރޯދަ އަށް ހުރެ ޕޮގްބާ ޔޫރަޕްގެ މުބާރާތެއްގެ ސެމީ ފައިނަލް އަދި ޕްރެޝަރު މެޗެއްގައި ދެއްކި ކުޅުމަށް ތައުރީފުކޮށްފަ އެވެ. އަދި ޔުނައިޓެޑްގެ ރަސްމީ ސޯޝަލް މީޑިއާ އެކައުންޓްތަކުން ވެސް ވަނީ އެކަން ފާހަގަކޮށް ޕޮގްބާ ދެއްކި ހިތްވަރަށް ތަރުހީބު ދީފަ އެވެ.
ގިނީގެ ދެމަފިރިއަކަށް ފްރާންސުގައި 1993 ވަނަ އަހަރު އުފަންވި ޕޮގްބާ އަކީ އާންމުކޮށް ފުޓްބޯޅަ ސީޒަން ނިންމާލުމަށް ފަހު އުމްރާ އެއް ވުމަށް ސައުދީ އަރަބިއްޔާ އަށް ދާ ކުޅުންތެރިއެކެވެ.
މި ދުވަސްކޮޅުގައި ޔޫރަޕްގެ ފުޓްބޯޅަ ސީޒަންގެ މުހިއްމު މެޗުތައް ކުރިއަށްދާތީ ގިނަ ކުޅުންތެރިންތަކެއް އަންނަނީ ރޯދަ އަށް ހުރެ މެޗު ކުޅެމުންނެވެ. އެގޮތުން ދާދި ފަހުން ލެސްޓާ ސިޓީގެ ޑިފެންޑަރު ވެސްލީ ފޮފާނާ ރޯދަ ވިއްލަން ވެގެން އިނގިރޭސި ޕްރިމިއާ ލީގުގެ މެޗެއް ވަނީ ވަގުތު ކޮޅަކަށް ހުއްޓާލައިފަ އެވެ. މިއީ މި ގޮތަށް ދެ ޓީމު އެއްބަސްވެގެން ޕްރިމިއާ ލީގުގެ މެޗެއްގެ ތެރެއިން ރޯދަ ވިއްލަން ކުޅުންތެރިއަކަށް ވަގުތު ކޮޅެއް ދިން ފުރަތަމަ ފަަހަރެވެ. ފޮފާނާ ވަނީ އޭނާ އަށް އެ ފުރުސަތު ދިނީތީވެ އެ މެޗުގައި އިދިކޮޅަށް ކުޅުނު ކްރިސްޓަލް ޕެލަސް އާއި ލީގަށް ޝުކުރު އަދާކޮށްފަ އެވެ.
