ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާގެ ތަހުގީގަށް އެހީތެރިކަން ފޯރުކޮށްދިނުމުގެ ޝައުގުވެރިކަން ޔޫއޭއީއިން ވެސް ފާޅުކޮށްފި އެވެ.
ރައީސް ނަޝީދުގެ ގެކޮޅު ކައިރީގައި އައިއީޑީއެއް ގޮއްވާލައި ދިން ހަމަލާގެ ތަހުގީގުގައި މިހާތަނަށް ތިން މީހަކު ހައްޔަރުކޮށްފައިވާއިރު، އެ ތަހުގީގުގައި އޮސްޓްރޭލިއާގެ ފުލުހުންނާއި އިނގިރޭސިވިލާތުގެ އެކްސްޕާޓުން ވެސް ދަނީ ހަރަކާތްތެރިވަމުންނެވެ.
މިވަގުތު ޖަރުމަންގައި ސިއްހީ ފަރުވާ ހޯއްދެއްވުމަށް ހުންނެވި، ރައީސް ނަޝީދު މިއަދު ކުރެއްވި ޓްވީޓެއް ވިދާޅުވެފައިވާ ގޮތުގައި، ޔޫއޭއީގެ ފެޑްރަލް ނޭޝަނަލް ކައުސިލްގެ ސްޕީކާ ވަނީ އެމަނިކުފާނަށް ގުޅުއްވައި ހާލު ބައްލަވާފަ އެވެ. އަދި، ހަމަލާގެ ތަހުގީގަށް އެހީތެރިކަން ފޯރުކޮށްދިނުމަށް ހުށަހަޅުއްވާފަ އެވެ.
"ޔޫއޭއީގެ އެކްސްޕަޓީސް ވެގެންދާނީ ހަމަލާއަށް ފަންޑުކުރި މީހުން ހޯދުމަށް އެހީއަކަށް،" ރައީސް ނަޝީދު ވިދާޅުވެފައިވެ އެވެ.
ރައީސް ނަޝީދަށް ދިން ހަމަލާގައި އެމަނިކުފާނުގެ ފުރާނަ ކިރިޔާ ސަލާމަތްވިއިރު، މިހާތަނަށް އެކަމުގެ އަޑީގައި ތިބީ ކޮން ބައެއް ކަމެއް ހޯދިފައެއް ނުވެ އެވެ.
ނަމަވެސް، ކޮމިޝަނާ އޮފް ޕޮލިސް މުހައްމަދު ހަމީދު ވަނީ ހަމަލާގެ ފަހަތުގައި ތިބި މީހުން އިންސާފުގެ ކުރިމައްޗަށް ގެންނާނެ ކަމުގެ ޔަގީންކަން ދެއްވާފަ އެވެ. އެކަމުގެ ޔަގީންކަން ޕްރޮސިކިއުޓާ ޖެނަރަލް ހުސެއިން ޝަމީމް ވެސް ދެއްވި އެވެ.
އެ ތަހުގީގު ކުރިއަށް ދަނީ ރަނގަޅަށް ކަމަށް ވެސް ޝަމީމް ވިދާޅުވެފައިވެ އެވެ.
ނަމަވެސް، އެމްޑީޕީގެ ބައެއް މަޖިލިސް މެންބަރުން މިހާރު އަންނަނީ ތަހުގީގު ލަސްކަމުގެ ކަންބޮޑުވުން ފާޅު ކުރައްވަމުންނެވެ.
