ނުރައްކާތެރި ޓެރަރިސްޓު ހަމަލާއާ ގުޅިގެން ލިބިވަޑައިގެންނެވި ޒަހަމްތަކަށް މިވަގުތު ޖަރުމަނުގައި ފަރުވާ ހޯއްދަވަމުން ގެންދަވާ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު, ރައްޔިތުންގެ މަޖިލީހުގެ މި އަހަރުގެ ދެ ވަނަ ދައުރު މިއަދު ފެށި ޖަލްސާއަށް، ހާއްސަ މެސެޖެއް ފޮނުއްވައިފި އެވެ.
މި އަހަރުގެ ދެވަނަ ދައުރުގެ ފުރަތަމަ ޖަލްސާގައި ރިޔާސަތުގައި އިންނެވި މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވަނީ މަޖިލީހުގެ އަމީންއާއްމު މެދުވެރި ކުރައްވައި، ރައީސް ނަޝީދު ފޮނުއްވި މެސެޖު އިއްވަވައި ދެއްވައިފަ އެވެ.
ހަމަލާއަށް ފަހު ނަޝީދުގެ ފުރަތަމަ މެސެޖުގައި ނަޝީދު ވިދާޅުވީ އެމަނިކުފާނު އަވަހާރަކޮށްލަން ދިން ޓެރަރިސްޓު ހަމަލާއަށްފަހު އުފެދިފައިވާ ބިރުކަމުގެ ތެރޭގައި އެއްވެސް ފަސްޖެހުމެއް ނެތި މަޖިލީހުގެ މެމްބަރުންގެ މަސްއޫލިއްޔަތުތައް އަދާކުރާނެ ކަމުގެ ފުރިހަމަ ޔަގީންކަން އެބަ އޮތް ކަމަށެވެ.
އަދި ވިދާޅުވީ އިސާހިތަކު މަޖިލީހުގެ މަސައްކަތްތަކުގައި މެމްބަރުންނާ އެކު ބައިވެރިވެވަޑައިގަންނަވާނެ ކަމަށެވެ.
"ރާއްޖޭގެ ލޮބުވެތި ރައްޔިތުންނާ އަޅުގަނޑު ބައްދަލުކުރާނަން. މާތްﷲގެ ރަހުމަތްފުޅާއެކު ތިޔަ ބޭފުޅުން އެދިވަޑައިގަންނަވާ ގޮތަށް އަޅުގަނޑުގެ މަސްއޫލިއްޔަތު އަދާކުރުމުގައި ހިތްވަރާއެކު ދެމި ހުންނާނަން،" އެ މެސެޖުގައި ރައީސް ނަޝީދު ވިދާޅުވި އެވެ.
ރައީސް ނަޝީދުގެ ފުރާނަ ސަލާމަތްކުރަން އޭޑީކޭ ހޮސްޕިޓަލުގެ ޑޮކްޓަރުންގެ ހާއްސަ ޓީމަކުން ގިނަ ސާޖަރީތައް ކުރި އެވެ.
މިއަދުގެ ޖަލްސާގައި ނަޝީދަށް ދިން ހަމާލާއާ ގުޅިގެން ރިޔާސަތުން ހުށަހަޅާ ވަރުގަދަ ގަރާރެއް ވެސް އޮތީ އެޖެންޑާކޮށްފަ އެވެ.
އެ ގަރާރުގެ އިތުރުން މާދަމާގެ ޖަލްސާއަށް ރައީސް ނަޝީދަށް ދިން ހަމަލާއާގުޅޭ ހާއްސަ މައްސަލަ ދިރާސާ ކުރުމަށް މަޖިލީހުގެ ސަލާމަތީ ހިދުމަތްތަކާބެހޭ (241) ކޮމިޓީން ނިންމިގޮތުގެ ރިޕޯޓު ވެސް ވަނީ އެޖެންޑާކޮށްފަ އެވެ.
އެ ހަމަލާގެ މައްސަލަ ބެލުމަށްފަހު 241 ކޮމިޓީން ނިންމާފައިވަނީ ހަމަލާދިން އިރު ރައީސް ނަޝީދަށް ދެމުންދިޔަ ސެކިޔުރިޓީ ބްރީޗުވި ގޮތުގެ އިންކުޔަރީއެއް، ބޭރުގެ މާހިރުންގެ އެހީތެރިކަމާއެކު އެންމެ ފުޅާމިނެއްގައި ހެދުމަށެވެ.
ނަމަވެސް، ފަލަސްތީނުގެ ރައްޔިތުންނަށް އަމާޒުކޮށް އިޒްރޭލުން ދެމުންދާ އުދުވާނު ހުއްޓުވުމަށް ދިވެހި ސަރުކާރުން ފިޔަވަޅުތައް އެޅުމަށް ގޮވާލައި އިދިކޮޅުން އިސްވެ ކުއްލި މައްސަލައެއް ހުށަހަޅާފައިވާއިރު، އެ މައްސަލަ ބަލައިގަނެ، މިވަގުތު ދަނީ އެއަށް ބަހުސްކުރެވެމުންނެވެ.
