ހއ. ފިއްލަދޫ ކައުންސިލްގެ އިންތިހާބީ ރައީސް ހުވާ ކުރުން ފަސްކުރުމަށް ހައިކޯޓުން އަމުރުކޮށްފި އެވެ.
ހައިކޯޓުން އެގޮތަށް އަމުރުކޮށްފައިވަނީ އެ އިންތިހާބާ ގުޅިގެން އެ ކޯޓަށް ހުށަހަޅާފައިވާ އިންތިހާބީ ޝަކުވާއަކާ ގުޅިގެންނެވެ.
ފިއްލަދޫގެ އިންތިހާބުގައި ކައުންސިލްގެ ރައީސް ކަމުގެ ގޮނޑި އެމްޑީޕީގެ ކެންޑިޑޭޓް ފަތުހުﷲ ހަސަން، ވާދަވެރި ޕީޕީއެމްގެ ކެންޑިޑޭޓް މުހައްމަދު އިރުޝާދުގެ މައްޗަށް ކުރި ހޯދާފައިވަނީ އެންމެ ވޯޓަކުންނެވެ.
އިންތިހާބީ ޝަކުވާ ހައިކޯޓަށް ހުށަހަޅާފައިވަނީ އިރުޝާދުގެ ފަރާތުންނެވެ.
މީގެކުރިން ހައިކޯޓުން ވަނީ ގއ. ކޮނޑޭ ކައުންސިލްގެ އިންތިހާބީ ރައީސް ހުވާކުރުން ފަސްކުރުމަށް ވެސް އަމުރުކޮށްފަ އެވެ.
ހުވާކުރުން ފަސްކުރަން އަމުރުކޮށްފައިވަނީ އިންތިހާބީ ޝަކުވާއާ މެދު އެ ކޯޓުން ގޮތެއް ކަނޑައެޅެންދެނެވެ.
"އިންތިހާބީ ޝަކުވާގެ މައްސަލަ ނިމުމުގެ ކުރިން ކައުންސިލް ރައީސްގެ މަގާމުގެ ގާނޫނީ ހުވާކުރުމަކީ އެ ވޯޓާ ގުޅިގެން މައްސަލަ ހުށަހަޅާފައިވާ ފަރާތާއި އިންތިހާބުގައި ވާދަކުރި އެހެން ފަރާތްތަކުގެ ހައްގަށް އުނިކަމެއް އަތުވެދާނެ ކަމެއް ކަމަށް ބެލެވޭ،" އަމުރުގައިވެ އެވެ.
އޭޕްރީލް މަހު ބޭއްވި އިންތިހާބުން އިންތިހާބުވި ކައުންސިލަރުން ހުވާކުރުމަށް ހަމަޖެހިފައިވަނީ މާދަމާ އެވެ.
ހައިކޯޓުގައި އިންތިހާބީ ހަތް ޝަކުވާއެއްގެ މައްސަލަ ކުރިއަށްދެ އެވެ. އެއީ، ކޮނޑޭ އަދި ފިއްލަދޫގެ އިތުރުން ލ. މާވަށު، ކ. ތުލުސްދޫ، ލ. މާބައިދޫ، ށ. ބިލެއްފަހި އަދި ތ. ކަނޑޫދޫ ދާއިރާއާ ގުޅޭ އެއް އިންތިހާބީ ޝަކުވާތަކެވެ.
ގާނޫނުގައިވާ ގޮތުން، އިންތިހާބީ ޝަކުވާތައް ހައިކޯޓާ ހަަމައަށް ދަނީ އެ ޝަކުވާ އިލެކްޝަން ކޮމިޝަނަށް ހުށަހެޅުމަށްފަހު، އެ ކޮމިޝަންގެ ނިންމުމާމެދު ހިތްހަމަނުޖެހޭނަމަ އެވެ.
ކައުންސިލް އިންތިހާބާ ގުޅިގެން އިލެކްޝަން ކޮމިޝަނަށް ހުށަހެޅި ގިނަ ޝަކުވާތައް އެ ކޮމިޝަނުން ބަލައިގެންފައެއް ނުވާއިރު، އިންތިހާބުގެ ރަސްމީ ނަތީޖާ މިހާރު ވަނީ އިއުލާންކޮށްފަ އެވެ.
