އިރުމަތީ ޔޫރަޕުގައި ރާއްޖޭގެ މަގުބޫލުކަން އިތުރުވެ މެދު އަދި އިރުމަތީ ޔޫރަޕް ގައުމުތަކުން ރެކޯޑް އަދަދަކަށް ޓޫރިސްޓުން އަންނަން ފަށައިފި އެވެ.
ޓޫރިޒަމް މިނިސްޓްރީގެ ހިސާބުތަކަށް ބަލާއިރު މިހާރު ރާއްޖެއަށް ގިނަ ފަތުރުވެރިން އަންނަނީ މެދު އަދި އިރުމަތީ ޔޫރަޕުގެ ގައުމުތަކުންނެވެ.
މިގޮތުން، އަހަރުގެ މިހާތަނަށް ރާއްޖެއަށް އެންމެ ގިނައިން ޓޫރިސްޓުން އަންނަ ދިހަ ގައުމުގެ ތެރެއިން ފަސް ގައުމަކީ މި ސަރަހައްދުގެ ގައުމުތަކެވެ.
އެއާއެކު ރާއްޖެއަށް އެންމެ ގިނައިން ފަތުރުވެރިން އަންނަ ގައުމުތަކުގެ ތެރޭގައި ހިމެނޭ އިރުމަތީ ޔޫރަޕުގެ ގައުމުތަކަކީ ރަޝިއާ، ޔޫކްރެއިން، ކަޒަކްސްތާން، ރުމޭނިއާ އަދި ޗެކް ރިޕަބްލިކެވެ.
ޕެންޑެމިކްގެ ކުރިއަށް ވުރެ އެރައިވަލްސް މާ ރަނގަޅު
އިރުމަތީ ޔޫރަޕުގެ ގައުމުތަކުގެ ތެރެއިން ރަޝިއާ ފިޔަވާ އެހެން ގައުމުތަކުގެ މާކެޓްތަކުން ރާއްޖެއަށް މީގެ ކުރިން މިހާ ގިނަ އަދަދަކަށް ޓޫރިސްޓުން އައިސްފައެއް ނުވެ އެވެ. ޔޫކްރެއިން، ރުމޭނިއާ، ކަޒަކްސްތާން އަދި ޗެކް ރިޕަބްލިޕަކީ ރާއްޖޭގެ ޓޮޕް ސޯސް މާކެޓް ލިސްޓަށް މުޅިން އާ ނަންތަކެވެ.
ތަފާސްހިސާބުތަކުން ފާހަގަވާ ގޮތުގައި ކޮވިޑް-19 ބަލިމަޑުކަމުގެ ހާލަތުގެ ކުރިއަށް ވުރެ މި މާކެޓްތަކުން ރާއްޖެ އަންނަ ފަތުރުވެރިންގެ އަދަދުތައް އިތުރެވެ.
ރެކޯޑްތައް ދައްކާ ގޮތުން 2019 ވަނަ އަހަރު ރާއްޖެއަށް އިރުމަތީ އަދި ސެންޓްރަލް ޔޫރަޕުން އައީ 80،509 ޓޫރިސްޓުންނެވެ. މި އަހަރުގެ ފުރަތަމަ ހަތަރު މަސް ދުވަހުގެ ތެރޭގައި އެކަނިވެސް މި އަދަދުގެ ދެ ގުނައަށް އެ ސަރަހައްދުން ޓޫރިސްޓުން އައިސްފި އެވެ. އަދި، މެއި 12 ވަނަ ދުވަހުގެ ނިޔަލަށް މި އަދަދު ހުރީ 191،738 ގައެވެ.
މެއި 12، 2021 ގެ ނިޔަލަށް އެކި ސަރަހައްދުތަކުން ޓޫރިސްޓުން ޒިޔާރަތްކުރި އަދަދު -- މަސްދަރު: ޓޫރިޒަމް މިނިސްޓްރީ
އިރުމަތީ ޔޫރަޕުގެ އިތުރުން، ހުޅަނގު ޔޫރަޕާއި އުތުރު މެޑިޓްރޭނިއަން ސަރަހައްދަށް ނިސްބަތްވާ ޔޫރަޕުގެ ގައުމުތަކުން ރާއްޖެ އަންނަ ފަތުރުވެރިންގެ އަދަދުތައް ވެސް ރަނގަޅެވެ. ވަކި ބައްރުތަކަށް ބަލާނަމަ، ފެށުނީއްސުރެން ރާއްޖެއަށް އެންމެ ގިނަ އަދަދެއްގެ ޓޫރިސްޓުން އަންނަނީ ޔޫރަޕުންނެވެ.
މަގުބޫލުކަން އިތުރުވީ ވަރުގަދައަށް ޕްރޮމޯޓްކޮށްގެން
މިދިޔަ އަހަރު ރާއްޖޭގެ ބޯޑަރުތައް ބަންދުކުރުމަށް ފަހު އަލުން ހުޅުވާލި ފަހުން އިރުމަތީ ޔޫރަޕުން ގިނަ އަދަދަކަށް ޓޫރިސްޓުން އަންނަން ފެށި އެވެ. އަދި ދަނޑިވަޅުގެ ފައިދާ ފުރިހަމައަށް ހިފުމަށް އެކިއެކި ފަރާތްތަކުން ރާއްޖެ ޕްރޮމޯޓްކުރުމުގެ ހަރަކާތްތައް ކުރިއަށް ގެންދިޔަ އެވެ.
އޭގެ ތެރޭގައި އެމްއެމްޕީއާރްސީން ހިންގި ހަރަކާތްތަކާއި އަމިއްލަ އިސްނެގުމުގައި ވިޔަފާރިވެރިން ހިންގި ހަރަކާތްތައް ފާހަގަކުރެވެ އެވެ. އޭގެ އިތުރުން އެކްސްޕޯތަކާއި އެއާލައިންތަކުން ވެސް ރާއްޖެ ޕްރޮމޯޓްކުރަން މަސައްކަތްތަކެއް ކޮށްފައިވާކަން ފާހަގަކުރެވެ އެވެ.
މި އަހަރު ވެސް މި ސަރަހައްދުގެ ގައުމުތަކަށް އަމާޒުކޮށްގެން ބާއްވާ ބޮޑެތި އެކްސްޕޯތަކާއި ޕްރޮމޯޝަނަލް އިވެންޓުތަކުގެ އެމްއެމްޕީއާރްސީ އާއި ވިޔަފާރިތަކުން ބައިވެރިވާނެ އެވެ. އަދި ބަލްގޭރިއާ، ޕޮލެންޑް، ޗެކް ރިޕަބްލިކް އަދި ރުމޭނިއާގައި ރޯޑްޝޯތަކެއް ބޭއްވުމަށް ވަނީ ރާވާފަ އެވެ.
