ލަންޑަން (މެއި 13) - ޗެލްސީގެ ކޯޗުކަމުން މިދިޔަ ޖެނުއަރީ މަހު ވަކިކުރި ފްރޭންކް ލަމްޕާޑަށް މި ސީޒަނަށް ފަހު ކްރިސްޓަލް ޕެލަސްއާ ހަވާލުވާން ހުށަހެޅުމެއް ލިބިފައިވާ ކަމަށް އިނގިރޭސި މީޑިއާ ތަކުން ރިޕޯޓްކޮށްފި އެވެ.
ޗެލްސީ ކޯޗުކަމާ ހަވާލުވިތާ 17 މަސް ފަހުން ލަމްޕާޑް މަގާމުން ވަކިކުރީ މިދިިޔަ ޖެނުއަރީ މަހުގެ 25 ވަނަ ދުވަހު އެވެ. ލަމްޕާޑް އޭރު ވަނީ ރަނގަޅު ޕްރޮޖެކްޓެއް ލިބިއްޖެނަމަ ވަރަށް އަވަހަށް ކޯޗިން އަށް އެނބުރި އަންނާނެ ކަމަށް ބުނެފަ އެވެ.
އިނގިރޭސި މީޑިއާ ރިޕޯޓްތައް ބުނާގޮތުން ލަމްޕާޑާ ޕެލެސް ހަވާލުކުރަން އެ ކްލަބްގެ މެނޭޖްމަންޓުން ޝައުގުވެރިވެ އެވެ. އަދި އެކަން މިހާރު ލަމްޕާޑަށް ވެސް ވަނީ ހިއްސާކޮށްފަ އެވެ. ލަންޑަނަށް ނިސްބަތްވާ ޕެލެސްއާ ހަވާލުވުމާ މެދު ލަމްޕާޑް ގޮތެއް ނިންމާނީ މި ވަގުތު އެ ޓީމުގައި ހުރި ކޯޗު ރޯއީ ހޮޖްސަންއާ މެދު ޕެލެސްގެ މެނޭޖްމަންޓުން ރަނގަޅު ގޮތެއް ނިންމުމުންނެވެ.
ބައެއް މީޑިއާތަކުން ރިޕޯޓްކުރާގޮތުގައިި ލަމްޕާޑް ބޭނުންވަނީ ހޮޖްސަން އަމިއްލަ ރުހުމުގައި ޕެެލެސް ދޫކޮށްލައިފިނަމަ އެ ޓީމާ ހަވާލުވާށެވެ. ހޮޖްސަން ގަދަކަމުން މަގާމުން ދުރުކޮށްފިނަމަ އެ ޓީމާ ހަވާލުވާން ލަމްޕާޑް ބޭނުމެއް ނުވެ އެވެ. ކުރިން މަޝްހޫރު ގިނަ ކްލަބްތަކަށް ކޯޗުކޮށްދީފައިވާ ހޮޖްސަންގެ ކޯޗުކަމުގައި ލަމްޕާޑް ވަނީ އިންގްލެންޑްގެ ގައުމީ ޓީމަށް ކުޅެފަ އެވެ.
ޑާބީ ކައުންޓީން 2018 ވަނަ އަހަރު ކޯޗިން ކެރިއަރު ފަށައި ފަހުން 2019 ވަަނަ އަހަރު ޗެލްސީއާ ހަވާލުވެ، ލަމްޕާޑް ފުރަތަމަ ސީޒަން ކަމަށްވާ މިދިޔަ ސީޒަނުގައި އެއްވެސް ކުޅުންތެރިއަކު ސޮއިނުކުރެ އެވެ. އެއީ އޭރު ކުޅުންތެރިން ނުގެނެވޭގޮތަށް ފީފާ އިން ޗެލްސީ އަށް އަދަބުދީފައި އޮތުމުންނެވެ. ތިބި ޒުވާން ކުޅުންތެރިން ލައިގެން ލަމްޕާޑް ވަނީ ފުރަތަމަ ސީޒަނުގައި ރަނގަޅު މަސައްކަތްތަކެއް ކޮށް ލީގުގެ ގަދަ ހަތަރެއްގެ ތެރޭގައި ނިންމައި އެފްއޭ ކަޕްގެ ފައިނަލުގައި ކުޅެފަ އެވެ.
ބޮޑު ހަރަދުތަކެއް ކޮށްގެން އާ ކުޅުންތެރިންތަކެއް ގަނެ، މި ސީޒަން ފެށިގެން ޗެލްސީން ރަނގަޅު ރެކޯޑެއް ދަމަހައްޓަމުން އަ އެވެ. ޗެލްސީގެ ފޯމަށް އަސަރުކުރީ ޑިސެމްބަރު މަހުގެ ތެރޭގަ އެވެ. އެ ހިސާބުން ލަމްޕާޑް އަތުން ޓީމުގެ ފުރިހަމަ ކޮންޓްރޯލް ގެއްލި އެންމެ ފަހުން ގާތްގާތުގައި ގިނަ މެޗުތަކަކުން ބަލިވެ ޕްރެޝަރު ބޮޑުވުމުން ލަމްޕާޑް މަގާމުން ވަކިކުރީ އެވެ.
ލަމްޕާޑަށް ސްކޮޓްލެންޑްގެ ސެލްޓިކްގެ ކޯޗުކަން ވެސް ލިބުނު ކަމަށް އިނގިރޭސި މީޑިއާތަކުން މީގެ ކުރިން ރިޕޯޓްކޮށްފައިވެ އެވެ. އެކަމަކު ސްކޮޓްލެންޑްގެ އޮފިޝަލަކު ވަނީ އެ ގައުމުގެ މީޑިއާ އަށް ދިން އިންޓަވިއުއެއްގައި އެ ކްލަބުން ލަމްޕާޑާ އަދި މިހާތަނަށް އެއްވެސް ވާހަކައެއް ދައްކާފައިނުވާނެ ކަމަށް ބުނެފަ އެވެ.
