ލަންޑަން (މާޗް 6) - އިނގިރޭސި ޕްރިމިއާ ލީގުގައި ރޭ ޓޮޓެންހަމް ހޮޓްސްޕާސް އިން ކުޅުނު މެޗުގައި 3-1 އިން ކްރިސްޓަލް ޕެލަސް އަތުން ބަލިވެ، ރެލިގޭޝަން ޒޯނަށް ވެއްޓުމުގެ ބިރު ބޮޑުވެއްޖެ އެވެ.
ރޭގެ ނަތީޖާ އަށް ފަހު ޓޮޓެންހަމް އޮތީ ރެލިގޭޝަން ޒޯނަށް ވުރެން އެއް ޕޮއިންޓް ކުރީގަ އެވެ. ލީގުގެ 16 ވަނައިގައި އޮތް ޓޮޓެންހަމް އަށް 29 މެޗުން 29 ޕޮއިންޓް ލިބިފައިވާއިރު، 17 ވަނައިގައި އޮތް ނޮޓިންހަމް ފޮރެސްޓާއި 18 ވަނައިގައި އޮތް ވެސްޓް ހޭމް ޔުނައިޓެޑަށް ވަނީ 29 މެޗުން 28 ޕޮއިންޓް ލިބިފަ އެވެ.
އަމިއްލަ ދަނޑުގައި ރޭ ކުޅުނު ޓޮޓެންހަމް އިން ރޭގެ މެޗުގައި ލީޑު ނެގި އެވެ. އެ ގޮތުން، މެޗުގެ 34 ވަނަ މިނިޓްގައި އާޗީ ގްރޭ ދިން ބޯޅައަކުން މި ލަނޑު ޖެހީ ޑޮމިނިކް ސޮލާންކޭ އެވެ. އެކަމަކު، އޭގެ ހަަތަރު މިނިޓް ފަހުން، ޕެލަސްގެ އިސްމާއިލާ ސާ އަށް ކުރި ފައުލަކަށް ޓޮޓެންހަމްގެ މިކީ ވެން ޑަ ވީން އަށް ރަތެއް ދެއްކުމާ އެކު މުޅި މެޗުގެ އޮއެވަރު ބަދަލުވި އެވެ.
ޕެލަސް އިން 40 ވަނަ މިނިޓްގައި ޕެނަލްޓީއަކުން ސާ ޖެހި ގޯލުން އެއްވަރުކުރިއިރު، ފުރަތަމަ ހާފުގެ އިތުރު ވަގުތުގެ ތެރޭގައި ދެ ލަނޑު ޖަހައި، ލީޑަކާ އެކު މެޗުގެ ކޮންްޓްރޯލް ނެގި އެވެ. މި ދެ ލަނޑު ޖެހީ، ސާ އާއި ޖޯގެން ސްޓްރޭންޑް ލާސަން އެވެ.
މި ނަތީޖާއާ އެކު، ޓޮޓެންހަމް އަށް މޮޅެއް ނުލިބި ލީގުގައި ޖެހިޖެހިގެން 11 މެޗު މި ވަނީ ނިމިފަ އެވެ. ޕްރިމިއާ ލީގުގެ 20 ޓީމުގެ ތެރެއިން މި އަހަރު ފެށި ފަހުން، ލީގުގައި މޮޅެއް ނުލިބި އޮތް ހަމައެކަނި ޓީމަކީ ޓޮޓެންހަމް އެވެ.
