މާލޭ މަގުމަތިން އަންހެނަކު ޖަހައިގަނެ، އޭނާ ގަދަކަމުން ގެއަކަށް ވައްދައި ރޭޕް ކުރަން އުޅުމުގެ ތުހުމަތުގައި ހައްޔަރު ކުރި ދެ މީހުންގެ މައްޗަށް ދައުވާކޮށްފި އެވެ.
މައްސަލާގައި ދައުވާކޮށްފައިވަނީ ހދ. ނޭކުރަންދޫ، ވިނަރެސް، އާދަމް ވިޝާނާއި ހދ. ވައިކަރަދޫ، މިލާފަރު، އަލީ ރަޝީދުގެ މައްޗަށެވެ. އެ ދެ މީހުންގެ މައްޗަށް އިއްޔެ ދައުވާކޮށް ކުރިމިނަލް ކޯޓަށް ވަނީ ފޮނުވާފަ އެވެ.
ޕްރޮސިކިއުޓާ ޖެނަރަލްގެ އޮފީހުން ބުނި ގޮތުގައި، ދެ މީހުންގެ މައްޗަށް އުފުލާފައިވަނީ ހުއްދަ ނޫން ގޮތެއްގައި މީހަކު ހިފެހެއްޓުމުގެ ދައުވާ އާއި އަނިޔާއެއް ދިނުމުގެ ކުށުގެ ދައުވާ އެވެ.
މި ދެ މީހުން ވެސް މިހާރު ތިބީ ބަންދުން ދޫކޮށްލާފަ އެވެ.
ބަންދުން ދޫކޮށްލީ ޕްރޮސިކިއުޓާ ޖެނަރަލްގެ އޮފީހުން އެދުމުގެ މަތިން ޝަރުތުތަކަކާއެކު އެވެ. އެގޮތަށް އެދުނު ދުވަހު ކުރިމިނަލް ކޯޓުން ވަނީ އެމީހުންގެ މައްޗަށް ފުލުހުން ހައްޔަރުކުރަން ކުރި ތުހުމަތުތަކާއި މައްސަލާގެ ފެކްޓްސްއަށް ބަލާއިރު ގޯސްކޮށް ކަމަށެވެ.
އެމީހުން ހައްޔަރުކުރިއިރު ފުލުހުން އެމީހުންގެ މައްޗަށް ތުހުމަތުކުރީ މާރާމާރީ އާއި ކިޑްނެޕް އަދި ގަދަކަމުން ޖިންސީ ގުޅުން ހިންގުމުގެ ތުހުމަތެވެ.
އަންހެން މީހާ މަގުމަތިން ޖަހައިގެނެގެން ގަދަކަމުން ގޯޅިއެއް ތެރެއަށް ވައްދާ މަންޒަރު ފެންނަ ސީސީޓީވީ ފުޓޭޖް ވަނީ އާންމުވެފަ އެވެ. މިކަން ހިނގީ، މިސްކިތުން މީހުން ތަރާވީސް ނަމާދުން ފޭބި ގަޑިއަށް ވެފައި އަންހެން މީހާ ސަލާމަތްކޮށްފައިވަނީ މިސްކިތުން ފޭބި ބަޔަކު ގޮހެވެ.
