މިދިޔަ ބުރާސްފަތި ދުވަހުގެރޭ ބޮމުގެ ޓެރަރިސްޓް ހަމަލާއެއް އަމާޒުވެ، ހޮސްޕިޓަލުގައި ފަރުވާ ހޯއްދަވަމުން ގެންދަވާ ކުރީގެ ރައީސް މުހައްމަދު ނަޝީދު އެ ހަމަލާގެ ފަހުން ފުރަތަމަ ފަހަރަށް އާއްމުންނާ މުހާތަބުކުރައްވައިފި އެވެ.
ދާދި ދެންމެ އަކު ކުރެއްވި ޓްވީޓެއްގައި ލިޔުއްވީ މާތްﷲ ގެ ހެޔޮ ރަހުމަތްފުޅުން ތިޔަބޭފުޅުން ތި އެދިވަޑައިގަންނަވާ ހެޔޮ ވެރިކަން ހޯދައި ދިނުމުގައި ދެމި ހުންނަވާނެ ކަމަށެވެ.
އެކަމަކު މެސެޖުގައި އެންމެ ފުރަތަމަ ބަޔާންކުރައްވާފައި އޮތީ ސިއްހީ ދާއިރާ އަށް ޝުކުރުގެ އަދާކުރެއްވުމެކެވެ. ނަޝީދު ދިރިއުޅުއްވާ ކެނެރީގެ ކައިރީގައި ސައިކަލެއްގައި އައިއީޑީއެއް ގޮއްވާލުމުން އެމަނިކުފާނުގެ ހަށިކޮޅަށް 10 ރޭޒަ ފުއް ވަދެފައިވެ އެވެ. ހަށިގަނޑުގެ މުހިއްމު ގުނަވަންތައް ފޫއަޅުވާލި ރޭޒަ ފުއްތަށް ނަގަން 16 ގަޑިއިރުގެ އޮޕަރޭޝަންތަކެއް ކުރި އެވެ.
"ދިވެހިރާއްޖޭގެ ސިއްހީ ދާއިރާ އަށް މަރުހަބާ އާއި ޝުކުރު،" ނަޝީދު ލިޔުއްވި އެވެ.
ނަޝީދަށް ފަރުވާ ދެއްވި އޭޑީކޭގެ ޑޮކްޓަރުންގެ ޓީމުން މީޑިއާތަކަށް އާއްމުކުރި މައުލޫމާތުން ރައީސް ނަޝީދުގެ ފުރާނަ ސަލާމަތްވީ ހަމަ ކިރިޔާކަން އެނގެ އެވެ.
މެސެޖެއް ނިންމަލާވެއްވީ މިރޭ މުސްލިމުންނާ ބައްދަލުކުރާ ބަރަކާތްތެރި ފިތުރު އީދުގެ ތަހުނިޔާއިންނެވެ.
"ކުޑަ އީދުގެ ތަހުނިޔާ،" ލިޔުއްވި އެވެ.
ނަޝީދަށް ދިން ހަމަލާއާ ގުޅިގެން ތިން މީހަކު ވަނީ ހައްޔަރުކޮށް ބަންދުގެ މުއްދަތު ޖަހައިފަ އެވެ. މި ހަމަލާ އަމާޒުވި ސީދާ ސަބަބެއް އަދި ނޭނގުނަސް ބޮޑަށް ގުޅެނީ ހަރުކަށި ފިކުރާ އެވެ.
