ޓޯކިޔޯ (މެއި 12) - މި އަހަރު ޖަޕާނުގައި ބާއްވަން މަސައްކަތް ކުރަމުން އަންނަ "ޓޯކިޔޯ އޮލިމްޕިކްސް 2020" އެ ތާރީހުގައި ކުރިއަށްދާނެ ކަމާ މެދު ޖަޕާނުގެ މަޝްހޫރު ގިނަ އެތުލީޓުން ސުވާލު އުފައްދައިފި އެވެ.
ކޮވިޑް-19ގެ ކޭސްތައް ގިނަވަމުންދާތީ ޖަޕާނުގައި ފާއިތުވި ތިން މަހެއްހާ ދުވަސްތެރޭ ސްޓޭޓް އޮފް އިމަޖެންސީ ވަނީ އެކި ފަހަރު މަތިން އިއުލާނުކޮށްފަ އެވެ. އަދި މީގެ ފަސް ދުވަސް ކުރިން ޖަޕާނުގައި ސްޓޭޓް އޮފް އިމަޖެންސީ ދަމަހައްޓަަން ނިންމިއިރު، އަންނަ ޖުލައި މަހު 23 ވަަނަ ދުވަހު ފަށަން ތާވަލުކޮށްފައިވާ އޮލިމްޕިކްސް އަށް މާ ގިނަ ދުވަހެއް ނެތެވެ.
މިދިޔަ ހުކުރު ދުވަހު ޖަޕާނުގެ އޮންލައިން ޕެޓިޝަނެއްގައި 23،000 އަށް ވުރެން ގިނަ މީހުން ސޮއިކޮށް ވަނީ އޮލިމްޕިކްސް ފަސްކުރަން ގޮވާލައިފަ އެވެ. އޭގެ ފަހުން އެކި ވެބްސައިޓްތަކުގައި ނެގުނު ޕޯލްތަކުގައި 59 ޕަސެންޓަށް ވުރެ ބޮޑުކޮށް އުޅެނީ އޮލިމްޕިކްސް ބޭއްވުމާ ދެކޮޅު ވިސްނުމުގެ މީހުންް ކުރީގަ އެވެ.
އެކަމަކު ޖަޕާނުގެ ސަރުކާރުގެ ވިސްނުމަކީ ސަލާމަތީ ފިޔަވަޅުތައް ހުރިހާ ގޮތަކުން ވަރުގަދަ ކޮށްގެން ވިޔަސް އޮލިމްޕިކްސް ކުރިއަށް ގެންދިއުމެވެ. އެކަން ސަރުކާރުގެ އިސް އޮފިޝަލުން އަންނަނީ އެ ގައުމުގެ މީޑިއާ އަށް ކަށަވަރު ކޮށްދެމުންނެވެ. ސަބަބަކީ މިދިޔަ އަހަރު ގޭމްސް ފަސްކުރުމުން ވެސް ބޮޑު މާލީ ގެއްލުމެއް ވެފައިވާއިރު، އަނެއްކާ ވެސް ގޭމްސް ފަސްކުރަން ޖެހިއްޖެނަމަ ފޫނުބެއްދޭވަރުގެ ގެއްލުންތަކަކާ ކުރިމަތިލާން ޖެހޭ މީހުންގެ ނިސްބަތް ގިނަވުމެވެ.
ފަހަކަށް އައިސް ޖަޕާނުގެ ގިނަ ކުޅުންތެރިން އަންނަނީ ކޮވިޑްގެ ހާލަތު އެ ގައުމުގައި އޮތް ގޮތުން އޮލިމްޕިކްސް ނުބޭއްވޭނެ ކަމަށް ބުނަމުންނެވެ. އޭގެތެރޭގައި ފުޓްބޯޅަ ކުޅުންތެރިންނާއި މަޝްހޫރު ޓެނިސް ކުޅުންތެރިންގެ އިތުރުން އެހެން ކުޅިވަރުތަކުގައި ވެސް ފާހަގަކޮށްލެވޭ އެތުލީޓުން ވެސް ހިމެނެ އެވެ. އެންމެ ބޮޑަށް އޮލިމްޕިކްސް ބޭއްވޭނެ ކަމާ މެދު ސުވާލު އުފެއްދި ދެ ކުޅުންތެރިންނަކީ ޓެނިހުގެ ދުނިޔޭގައި ވިދަމުން އަންނަ ޖަޕާނުގެ ކެއި ނިޝިކޯރީ އާއި ނައޯމީ އޮސާކާ އެވެ.
"އޮލިމްޕިކްސް އަކީ 100 މީހުން ބައިވެރިވެލައިގެން ކުޅޭ ކުޅިވަރު މުބާރާތެއް ނޫން. ވިލޭޖެއްގައި 10،000 އަށް ވުރެ ގިނަ މީހުން ތިބެެގެން ކުރިއަށްދާ ކުޅިވަރެއް. އެހެންވީމަ ކޮވިޑް ފަދަ ބަލިމަޑުކަމެއްގެ ނުރައްކާ މުޖުތަމައުއެއްގައި އޮއްވައި ކިހިނެއް މުބާރާތް ކުރިއަށްދާނީ. އަހަންނަށް ޔަގީނެއް ނޫން ޝެޑިއުލްގައި އެވާ ގޮތަށް ކުރިއަށްދާނެ ކަމަށް،" ޖަޕާނުގެ އެއް ވަނަ ފިރިހެން ޓެނިސް ކުޅުންތެރިޔާ ނިޝިކޯރީ ބުންޏެވެ.
ޖަޕާނުގެ ނައޯމީ އޮސާކާ މެޗެއްގެ ތެރެއިން.-- ފޮޓޯ: ގެޓީ އިމޭޖަސް
ދާދި ފަހުން ބީބީސީ އަށް ދިން އިންޓަވިއުއެއްގައި ޖަޕާނުގެ އެއް ވަނަ އަންހެން ޓެނިސް ކުޅުންތެރިޔާ އަދި ޓެނިހުގެ ދުނިޔޭގައި ބޮޑު ކުރިއެރުމެއް ހޯދަމުން އަންނަ ނައޯމީ ބުނީ އޭނާގެ ނަޒަރުގައި އަދިވެސް އޮލިމްޕިކްސް ބޭއްވިދާނެ ކަމުގެ ޔަގީންކަން އެއްވެސް ބަޔަކަށް ނުދެވޭނެ ކަމަށެވެ.
"އާންމުންގެ ކަންބޮޑުވުން ވަރަށް ބޮޑު. ކުޅިވަރު ކުރިއަށްދާނީ ސަޕޯޓަރުންނާ އެކު. ދެން އަނެއްހެން ބަލާއިރު ކޮވިޑްގެ ކޭސްތައް ވެސް އިތުރުވާއިރު އަހަންނަށް ނުވިސްނޭ އޮލިމްޕިކްސް ބޭއްވޭނެ ގޮތެއް،" ނައޯމީ ބުންޏެވެ.
ޖަޕާނުގެ މީޑިއާ ރިޕޯޓްތައް ބުނާގޮތުން ޓޯކިޔޯ އޮލިމްޕިކްސްގެ އޮގަނައިޒިން ކޮމިޓީން އަންނަނީ އޮލިމްޕިކްސް އާއި ޕެރަލިމްޕިކްސް އަށް އަމާޒުކޮށް ސިއްހީ އެހީތެރިންގެ ގޮތުގައި 10،000 ޕްރޮފެޝަނަލުން ދުނިޔޭގެ އެކި ކަންކޮޅުތަކުން ހޯދަން މަސައްކަތް ކުރަމުންނެވެ. އެކަމުގެ އެހީ އަށް އިންޓަނޭޝަނަލް އޮލިމްޕިކް ކޮމިޓީ (އައިއޯސީ)ގައި ވެސް ޖަޕާނުން އެދިފައިވާ ކަމަށް މީޑިއާ ރިޕޯޓްތައް ބުނެ އެވެ.
އެކަމަކު މިހާތަނަށް އޮގަނައިޒިން ކޮމިޓީން ބޭނުންވާ އަދަދާ ގާތަށް ވެސް މެޑިކަލް ޕްރޮފެޝަނަލުން ހަމަޖެހިފައިނުވާ އެންމެ ބޮޑު ސަބަބަކީ އެއްވެސް ގައުމަކަށް އެއްކޮށް ކޮވިޑްގެ ހާލަތުން އަރައިގަނެވިފައިނުވާތީ ގައުމު ދޫކޮށް ދާން ގިނަ ސިއްހީ ފަރާތްތަކުން ބޭނުންނުވުމެެވެ. މިއީ ވެސް މިހާރު އޮތް ތާރީހުގައި އޮލިމްޕިކްސް ބޭއްވުމަށް އޮތް ބޮޑު ގޮންޖެހުމެއް ކަމަށް ޖަޕާނުގެ މީޑިއާތަކުން ރިޕޯޓްކުރެ އެވެ.
