އެސެޓް ރިކަވަރީ ކޮމިޝަނުން ރައްޔިތުންގެ މަޖިލީހަށް ފޮނުވާފައިވާ ހިޔާނާތުން މަންފާވި ކަމަށް ބުނާ ލިސްޓުގެ ސައްހަ ކަމާ މެދު މަޑުއްވަރީ ދާއިރާގެ ޕީއެންސީ މެމްބަރު އާދަމް ޝަރީފް އުމަރު މިއަދު ސުވާލު އުފައްދަވައިފި އެވެ.
ހިޔާނާތުގެ ލިސްޓު އާއްމުކުރަން ކުރިއަށް ގެންދާ ކޮމިޓީގައި އިދިކޮޅު މެމްބަރު ވިދާޅުވީ އެސެޓް ރިކަވަރީ ކޮމިޝަން ނަޒާހަތްތެރިކަމަށް ބަލައިގަނެވެން ނެތް ކަމަށެވެ. އެ ކޮމިޝަނުގެ މަސައްކަތް، ދެ އަހަރާ ބައި ވި އިރު ވެސް އެކަށީގެންވާ ގޮތެއްގައި ނުހިނގާ އޮތުމަށް ފަހު މަޖިލީހަށް ފޮނުވީ ރަނގަޅު ލިސްޓެއް ކަމާ މެދު އޭނާ ޝައްކު އުފެއްދެވި އެވެ.
އޭނާ ދެކެވަޑައިގަންނަވާ ގޮތުގައި ހިޔާނާތް ތަހުގީގުކުރުމުގެ ނަމުގައި އެ ކޮމިޝަނަށް ދައުލަތުގެ ބަޖެޓުންކުރީ ބޭކާރު ހަރަދުތަކެކެވެ.
އާދަމް ޝަރީފް ވަނީ މިއަދު ލިސްޓު އާއްމުކުރިއަސް ސަރުކާރުން އެކަށީގެންވާ ގޮތެއްގައި ފިޔަވަޅު އަޅާނެތޯ ވެސް ސުވާލު އުފައްދައި ފާޑުކިއުން އަމާޒުކޮށްފަ އެވެ. ހިޔާނާތުގައި ހިމެނޭ މީހުންނަށް ލުއިތަކެއް ދީފައި ވަނީ މި ސަރުކާރުން ކަަމަށް ވިދާޅުވެ އިޝާރާތް ކުރެއްވީ އެކަމުގައި އިސްކޮށް އުޅުއްވި ކުރީގެ ނައިބު ރައީސް އަހްމަދު އަދީބު ގޭބަންދަށް ބަދަލުކުރި މައްސަލައަށެވެ.
އޭނާ ވިދާޅުވީ ހިޔާނާތުގެ ފައިސާ ބޭނުންކުރި މީހުންނަށް އަދަބު ލިބި ގެއްލުނު ފައިސާ ހޯދުމަކީ ރައްޔިތުން އެދޭ ގޮތް ކަމަށެވެ. އެކަމަކު ކޮމިޓީން އާއްމުކުރި ލިސްޓުގައި ދައުލަތުގެ އެކި މަގާމްތަކުގައި ތިބި 116 ފަރާތެއް ހިމެނުނަސް އެކަމާ މެދު ސަރުކާރުން ފިޔަވަޅު ނާޅާނެ ކަމަށް ވިދާޅުވި އެވެ.
"މިހާތަނަށް ފެނުނީ އެމްއެމްޕީއާރުސީއާ ގުޅޭ ކަންކަން މި ސަރުކާރުގައި ދޯހަޅިކޮށް ދިޔަ ތަން،" އާދަމް ޝަރީފް ވިދާޅުވި އެވެ.
ހިޔާނާތުގެ ހެކީގެ ގޮތުގައި ބޭނުންކުރެވިދާނެ 70،000 ޓެކްޓް މެސެޖް އޮތް ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެފައިވާކަން ފާހަގަކުރައްވައި އެ މަސައްކަތް ދޫކޮށްލެއްވީތޯ ވެސް އާދަމް ޝަރީފް ވަނީ ކޮމިޓީގައި އައްސަވައިފަ އެވެ.
އާދަމް ޝަރީފްގެ ސުވާލުތަކާއި ތުހުމަތުތަކަށް ޖަވާބުދާރީވެވަޑައިގަންނަވަމުން ކޮމިޓީގެ މުގައްރިރު އިމްތިޔާޒް ފަހުމީ (އިންތި) ވިދާޅުވި ގޮތުގައި ކޮމިޓީގެ ލިސްޓާ ގުޅިގެން ސަރުކާރުން އަޅަން ޖެހޭ ފިޔަވަޅުތައް އަޅާނެ ކަމުގެ ޔަގީންކަން އެބައޮތެވެ. ކޮމިޓީން އަދި މަޖިލީހުން ވެސް މަސައްކަތް ކުރިއަށް ގެންދާނީ ހިޔާނާތުން މަންފާވި މީހުންނާއި ދައުލަތަށް ގެއްލުނު ފައިސާ އަވަހަށް ހޯދޭނެ މިސްރާބަކާ ދިމާލަށް ކަމަށް ވިދާޅުވި އެވެ.
ޖުޑިޝަރީ ކޮމިޓީ އާއި ސަލާމަތީ ހިދުމަތްތަކާ ބެހޭ ކޮމިޓީން އާއްމުކުރަން ނިންމީ މުޅި ލިސްޓާއި ދައުލަތުގެ މަގާމުތަކުގައި ތިބި މީހުންގެ ނަންތައް ހިމެނޭ ލިސްޓް ވަކިންނެވެ. ދައުލަތުގެ މަގާމްތަކުގައި ތިބި 119 މީހެއްގެ ނަން ލިސްޓުގައި އެބައޮތެވެ. މި މީހުންގެ މައްސަލަތަކަށް އިސްކަންދީގެން ކުރިއަށް ގެންދަން ވަނީ ނިންމައިފަ އެވެ.
