ބުރާސްފަތި ދުވަހުގެ ރޭ ދިން ބޮމުގެ ހަމަލާގައި އޭގައި ހުރި ރޭޒާ ފުއްތައް ރައީސް މުހައްމަދު ނަޝީދުގެ ހަށިކޮޅު ފޫއަޅުވާލި އެވެ. ޑޮކްޓަރުންގެ ޓީމުން ނޭވާ ހިފަހައްޓާލައިގެން ތިބެ ކުރި ސާޖަރީތަކުން، އެމަނިކުފާނުގެ ހަށިކޮޅުން 10 ރޭޒާ ފުއް ނެގިއިރު ފުރާނަސަލާމަތްވީ ހަމަކިރިޔާ އެވެ. ނުވަ އެމްއެމްގެ މި ރޭޒާ ފުއްތައް މީހެއްގެ ހަށިގަނޑަށް އަމާޒުވެއްޖެ ނަމަ މަރުގެ އެތިފަހަރެއްކަން ބޮން ގޮއްވާލި ސަރަހައްދުން ވަޒަންކޮށްލެވެ އެވެ.

ރޭޒާ ފުއްތަކުގެ ނުރައްކަލާއި ގޮވުމާ އެކު ބުރައިގެން ދިޔަ ބާރުމިން، އިމާރާތަކުން ފެންނަން އެބަހުއްޓެވެ.

ދިހަ ވަރަކަށް ފޫޓް ފުޅާމިނުގެ ނީލޯފަރު ހިނގުމުގެ ހުޅަނގު ކަންމަތީގައި ހަދަމުންދާ އިމާރާތުގެ [އެމެޓީ ފިހާރަ ކުރިން ހުރި ގެ] ވަށައިގެން ހުރީ ވަރުގަދަ ބޯ ޓިނު ޖަހައި ބަންދުކޮށްފަ އެވެ. ނަމަވެސް، ގޮއްވާލި ބޮމާ އެކު ބުރައިގެން ދިޔަ ބާރަ ރޭޒާ ފުކެއް، އެ ޓިނުތައް ފޫއަޅުވާލާފައިވެ އެވެ. ފިހާރަތަކުގެ ބޯ ބިއްލޫރިތައް ތެޅި، ވަޒަނެއް އެރިހެން ވަނީ ލޯވަޅު ހެދިފަ އެވެ.

ބޮމުގެ ބާރު ގޮވުމުން، ޖެހިގެން ހުރި "ޝޯ މާލް" ފިހާރައިގެ ބޭރު ސީލިންގުން ބައެއް ވަނީ ވެއްޓިފަ އެވެ. ބިއްލޫރިގަނޑަށް ރޭޒާ ފުކެއް އަރައި ލޯވަޅެއް އެޅިފައިވެ އެވެ.

ރޭޒާ ފުކަކުން ޑްރެސްއަޕް ފިހާރައިގެ ބިއްލޫރިގަނޑު ތޮރުފާލާފައި - ފޮޓޯ: ހުސެއިން ޝަޔާހު / އަދަދު

ބޮމުގެ ގޮވުމާއި ރޭޒާފުކުގެ ބާރުމިން އެންމެ ރަނގަޅަށް ވަޒަން ކޮށްލެވެނީ، ގޮއްވާލި ސައިކަލާ، ގާތްގަނޑަކަށް 100 ވަރަކަށް ފޫޓް ދުރުމިނުގައި، މަޖީދީ މަގުގެ ދެކުނު ފަޅީގައި ހުރި ޑްރެސް އަޕް ފިހާރައިންނެވެ. ފިހާރައަށް އެރި "ވަޒަންތަކުން" ބޯ ބިއްލޫރިގަނޑުތަކުގެ އަށް ތަނެއް ފޫވައްޓާލާފައިވެ އެވެ.

"އަޑު ވަރަށް ބާރު. ހީވީ ވަޒަންތަކެއް އަރަމުން ދިޔަހެން. ކަންފަތަށް، ބޮލަށް ވަރަށް ތަދުވޭ،" ޑްރެސް އަޕް ފިހާރައިގެ ބަނގްލަދޭޝްގެ މުވައްޒަފަކު ބުންޏެވެ.

ބޮން ހަރުކުރި ސައިކަލް ވެސް އޮތީ ފުނޑުފުނޑުވެފަ އެވެ.

ރޭޒާފުކެއް ޓިނުގަނޑަކަށް އަރާ ގެއްލުންވެފައި: ގޮވާފައިވަނީ ބާރުގަދަ ގޮވުމެއް - ފޮޓޯ: ހުސެއިން ވަހީދު \ އަދަދު

އެ ހަމަލާގައި ނަޝީދުގެ އިތުރުން ހަތަރު މީހަކު ޒަހަމްވި އެވެ. އެކަމަކު އެ ހަތަރު މީހުންނާއި އެ ވަގުތު އެ ސަރަހައްދުގައި ހަރަކާތްތެރިވަމުން ދިޔަ އެއްވެސް މީހަކަށް އެ ހާދިސާގައި ފުރާނައަށް ނުރައްކާވާ ފަދަ ގެއްލުމެއް ނުލިބުމަކީ ވަރަށް ބޮޑު ނަސީބެކެވެ. ރޭޒާ ފުއްތައް ދަތުރުކޮށްފައި ހުރި ބާރުމިނަށް ބަލާއިރު، އެތައް ބަޔަކަށް ބޮޑެތި އަނިޔާތައް ވުމުގެ ފުރުސަތު އޮތް ކަން އެ ސަރަހައްދަށް ވެފައި އޮތް ވަރުން ފެންނަން އެބަހުއްޓެވެ.

އެމްއެންޑީއެފުން ބުނާ ގޮތުގައި އެ އައިއީޑީ ހަދާފައި ވަނީ ރާއްޖޭގައި ލިބެން ހުރި ތަކެތިންނެވެ. އޭގެ ބާރުމިން، 2007 ގައި ސަލްޓަންޕާކު ގޮއްވާލަން ބޭނުންކުރި އައިއިޑީއަށް ވުރެން އެތައް ދަރަޖައެއް ބާރުގަދަ ކަމަށް ވެސް ބުންޏެވެ.

ރޭޒާފުކެއް އަރައި ބިއްލޫރިގަނޑު ތަޅައިގެން ގޮސްފައި - ފޮޓޯ: ހުސެއިން ޝަޔާހު / އަދަދު

އެ ސަރަހައްދުން "އަދަދު"އާ ވާހަކަ ދެއްކި ބައެއް މީހުން ގަބޫލުކުރާ ގޮތުގައި، ދުރާލައި ތައްޔާރުވެގެން ދިން ކަމަށް ބެލެވޭ ހަމަލާގެ ބާރުމިން ދަށްވުމުގައި ނަސީބާ ގުޅިފައިވާ ކަންތައްތަކެއް ވެސް ވަނީ ހިނގައިފަ އެވެ.

ބޮން ހަރުކުރި ސައިކަލް ބަހައްޓާފައި ހުރީ ނީލޯފަރު ހިނގުމާއި މަޖީދީ މަގަށް ވާގޮތަށް ހުރި "ޝޯ މާލް" ފިހާރައިގެ ކަންމަތީގަ އެވެ. ބަންޕަރު މައްޗަށްވާ ގޮތަށް ކަތިކޮށެވެ. އެ ސައިކަލްގެ ކައިރީގައި އިތުރު ސައިކަލެއް ޕާކުކުރުމަކީ ބޮމުން ގެއްލުން ދޭން ބޭނުންވި ވަރަށް ނުދެވުމުގެ ސަބަބެއް ކަމަށް ދެކެ އެވެ. ހަމަލާ ދޭން އަތަމާ ޕެލަސް ކުރިމަތީގައި ހުރި ވ. ތިނަދޫ އަދްހަމް އަހްމަދު ރިމޯޓަށް ފިއްތާލަން ތައްޔާރުވެގެން ހުއްޓައި އެވަގުތު ރެސްޓޯރެންޓުން ނުކުތް ބައެއްގެ ސަބަބުން އޭނާއަށް ނަޝީދު ވަޑައިގަތް މަންޒަރު ފެންނަން ހުރަހަކަށްވިކަން އާންމުކޮށްފައިވާ ވީޑިއޯއިން ފާހަގަވެ އެވެ.

ރާއްޖޭގައި މިހާތަނަށް ދެވުނު އެންމެ ނުރައްކާތެރި ބޮމުގެ ހަމަލާގައި ރޭޒާ ފުއްތަކުން ނަޝީދުގެ އެތެރެހަށީގެ ގުނަވަންތައް ތޮރުފާލާފައި ހުރުމުން، އެ ފުއްތައް ނެގުމަށް އޭޑީކޭ ހޮސްޕިޓަލްގައި ކުރި އޮޕަރޭޝަންތައް 16 ގަޑިއިރަށް ދެމިގެން ދިޔަ އެވެ. ޑޮކްޓަރުން ވިދާޅުވި ގޮތުގައި ފުރާނައަށް ނުރައްކާވާ މިންވަރަށް ނަޝީދަށް ހުރީ ޒަހަމްވެފަ އެވެ. ނަމަވެސް ކާމިޔާބު އޮޕަރޭޝަންތަކަށް ފަހު އެމަނިކުފާނުގެ ހާލުކޮޅު މިހާރު ރަނގަޅު ވަމުން އަންނަ ކަމަށް އާއިލާއިން ބުނެ އެވެ.

ބޮން ގޮއްވާލި މައްސަލައާ ގުޅުން ހުރި ހަތަރު މީހަކު ފާހަގަ ކުރެވިފައިވާ ކަމަށް ފުލުހުން ބުނެފައިވާއިރު، މިހާތަނަށް ތިން މީހަކު ހައްޔަރުކޮށްފައިވެ އެވެ.

"މިވަރުގެ ބާރު އަޑެއް ނީވޭ، ހީވީ ތަން ފަޅައިގެން ދިޔަހެން"

ނަޝީދަށް އަމާޒުކުރި ހަމަލާގައި އައިއީޑީ ހަރުކުރި ސައިކަލް ޕާކުކޮށްފައި ހުރި ހެދުން ފިހާރައިގެ ވެރިޔާ، މޫސާ ބާރީ އާއި އޭނާގެ އެކުވެރިޔާ އަލީ މުސްތާގުގެ އޮލަ ވާހަކައިގައި ތިބެވުނީ ކައުންޓަރު ކައިރީގަ އެވެ. މާ ގިނައިރުތަކެއް ނުވެ އެވެ. ތަޖުރިބާކުރަން ޖެހުނީ ހަޔާތުގެ އެންމެ ބިރުވެރި ވަގުތު ކޮޅެވެ.

"މުޅިތަން ފަޅައިގެން ދިޔަހެން ހީވީ. ދެން ނޭނގެ ވީނުވީއެއް ވެސް. ހީވީ ފުރާޅު ވިއްސައިގެން ދިޔަހެން،" ބުރާސްފަތި ދުވަހުގެ ރޭ 8:27 ގައި އެ ފިހާރައިގެ ބުޑުން ގޮއްވާލި ބޮމުގެ ބާރުމިނާއި އެ ބިރުވެރި ވަގުތުކޮޅު ބާރީ ސިފަކޮށް ދިނެވެ.

"ތިރިޔަކުން ނޫން އަޑުއައީކީ. މަތިން ކަހަލަ ގޮތަކަށް. ފުރާޅު މައްޗަށް އެއްޗެހިތަކެއް ފައިބައިގަތީހެން ހީވީ،"

ލިބިގެންދިޔަ ޝޮކާއި ބިރުވެރިކަމާ އެކު ބަލައިލެވުނުއިރު، ފިހާރައިގެ ބޭރުން ސީލިން ފުނޑުފުނޑުވެގެން ފައިބަނީ އެވެ. ވީގޮތެއް ސާފު ނުވިޔަސް، ބާރުގަދަ އެ ގޮއްވާލުމުގެ ދުންގަނޑުގެ ތެރެއިން ނަޝީދުގެ ކާރުކޮޅު ފެނުމުން، އެއީ އެ މަނިކުފާނަށް ދިން ހަމަލާއެއްކަން ބާރީއަށް ގަބޫލުކުރެވުނެވެ.

"ބޭރަށް ނުކުތް އިރު ކާރަށް އަރުވަނީ. ފުރަތަމަ އަޅުގަނޑަށް އޭރު ނޭނގޭ އެއީ ނަޝީދު ކަމެއް [ކާރުކޮޅުގައި ގެންދިޔައީ] ވެސް،" ބާރީ ކިޔައި ދިނެވެ.

ފިހާރައެއްގެ ބިއްލޫރިގަނޑު ރޭޒާފުކެއް އަރައި، ތަޅައިގެން ގޮސްފައި - ފޮޓޯ: ހުސެއިން ޝަޔާހު \ އަދަދު

ނަޝީދު ޒަހަމްވުމާއި، ޒަހަމްވެ މަގުމައްޗަށް ވެއްޓިފައި ތިބި މީހުން ބާރީއަށް ފެނުމުން ބިރު އިތުރަށް ބޮޑުވި އެވެ. ދެވަނަ ގޮވުމެއް ވެސް ގޮއްވާލައިފާނެ ކަމަށް ވެސް ހީކުރެވުނެވެ. ނަމަވެސް، ދިން މި ހަމަލާގައި ޒަހަމްވި މީހުންނަށް އެހީތެރިވުމަށް ބާރީ މަސައްކަތްކުރި އެވެ. ނަޝީދުގެ ކާރުކޮޅުގެ ޑްރައިވަރު ވެއްޓިފައި އޮއްވައި، މީހުންގެ އެހީތެރިކަމާ އެކު ބާރީގެ ފިހާރައިގެ ތެރެއަށް އޭނާ ވެއްދި އެވެ. އެމްބިއުލާންސް އަންނަ ދެން ޑްރައިވަރު ބާއްވާފައި އޮތީ އެ ފިހާރައިގެ ތެރޭގަ އެވެ.

ޑްރެސް އަޕް ފިހާރައިގެ ވެރިޔާ މުސްތާގުގެ ތަޖުރިބާ ކިޔައި ދެނީ -- ފޮޓޯ: ހުސެއިން ޝަޔާހު / އަދަދު

މި ނުރައްކާތެރި ވަގުތު ކޮޅުގައި ބާރީއާ އެކު ހުރި މުސްތާގަށް އެވަރުގެ ބާރު އަޑެއް މީގެ ކުރިން އިވިފައެއް ނެތެވެ.

"އެއީ އާދަޔާ ހިލާފު ބާރު އަޑެއް،" އޭނާ ބުންޏެވެ.

"ފުރަތަމަ ހިތަށް ނާރައި މިއީ މިވަރުގެ ކަމެކޭ. ޝޮކާއެކު ހުރެވުނީ. މާލޭގައި މިވަރުގެ ކަމެއް ހިނގާފާނެ ކަމަށް ހިއެއް ނުކުރަން."

ނަޝީދުގެ ކާރުކޮޅު ޕާކުކޮށްފައި ހުންނަނީ މަޖީދީ މަގުގައި ހުންނަ އަތަމާ ޕެލަސްއާ ޖެހިގެން ހުރި މުސްތާގުގެ ޑްރެސް އަޕް ފިހާރައިގެ ދޮރުމަތީގަ އެވެ. ގޮވުމުގެ ކުރިން އެއްވެސް ކަހަލަ އާދަޔާހިލާފު ކަމެއް އޭނާ އަށް ފާހަގަކުރެވިފައެއް ނެތެވެ.

ބޮން ގޮވައި، ޓިނުގަނޑަށް ރޭޒާފުއްތައް އަރާފައިވާ ތަންތަން ފެންނަ ފޮޓޯއެއް - ފޮޓޯ: އަހުމަދު އިހްސާން / އަދަދު