މިދިޔަ މަހު ބޭއްވި ލޯކަލް ކައުންސިލް އިންތިހާބާ ގުޅޭ ހަ ޝަކުވާއެއް ހައިކޯޓުން ބަލައިގަނެ، މާދަމާ ޝަރީއަތްތައް ފެށުމަށް ތާވަލުކޮށްފި އެވެ.
ކައުންސިލް އިންތިހާބާ ގުޅިގެން ޖުމްލަ 16 ޝަކުވާއެއް ހައިކޯޓަށް ހުށަހެޅިއިރު، އޭގެ ތެރެއިން އެ ކޯޓުން ބަލައިގެންފައިވަނީ ހަ މައްސަލައެކެވެ.
ބަލައިގެންފައިވަނީ ހއ. ފިއްލަދޫ، ކ. ތުލުސްދޫ، ލ. މާބައިދޫ، ގއ. ކޮނޑޭ، ށ. ބިލެއްފަހި އަދި ތ. ކަނޑޫދޫ ދާއިރާއާ ގުޅޭ އެއް އިންތިހާބީ ޝަކުވާތަކެވެ. ބަލައިނުގަނެ ބޭރުކޮށްލާފައިވަނީ، ށ. މިލަންދޫ، ޅ. ނައިފަރު، ތ. މަޑިފުށި، ލ. އިސްދޫ، ތ. ކަނޑޫދޫ އަދި މައްޗަންގޯޅި އުތުރު ދާއިރާގެ އިންތިހާބީ ޝަކުވާއެއްގެ އިތުރުން ވ. ފުލިދޫއާ ގުޅޭ ތިން ޝަކުވާއެކެވެ.
މާދަމާ ހައިކޯޓުގައި ފެށުމަށް ހަމަޖެހިފައިވަނީ، ފިއްލަދޫ، ކަނޑޫދޫ، މާބައިދޫ އަދި ތުލުސްދޫއާ ގުޅޭ އިންތިހާބީ ޝަކުވާތަކުގެ މައްސަލަ އެވެ.
ގާނޫނުގައިވާ ގޮތުން، އިންތިހާބީ ޝަކުވާތައް ހައިކޯޓާ ހަަމައަށް ދަނީ އެ ޝަކުވާ އިލެކްޝަން ކޮމިޝަނަށް ހުށަހެޅުމަށްފަހު، އެ ކޮމިޝަންގެ ނިންމުމާމެދު ހިތްހަމަނުޖެހޭނަމަ އެވެ.
ކައުންސިލް އިންތިހާބާ ގުޅިގެން އިލެކްޝަން ކޮމިޝަނަށް ހުށަހެޅި ގިނަ ޝަކުވާތައް އެ ކޮމިޝަނުން ބަލައިގެންފައެއް ނުވާއިރު، އިންތިހާބުގެ ރަސްމީ ނަތީޖާ މިހާރު ވަނީ އިއުލާންކޮށްފަ އެވެ. މި މަހުގެ 17 ވަނަ ދުވަހު އާ ކައުންސިލުން ހުވާ ކުރުމަށް ވެސް ދަނީ ތައްޔާރުވަމުންނެވެ.
