ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާގެ ތުހުމަތުތަކަށް އެ މައްސަލައިގައި ހައްޔަރުކޮށްފައިވާ ތިން މީހުން ވެސް ކްރިމިނަލް ކޯޓުގައި މިއަދު އިންކާރުކޮށްފި އެވެ.
ރައީސް ނަޝީދު ކެނެރީގެއިން ނުކުމެވަޑައިގެން ކާރުކޮޅާ އަރާ ހަމަވިތަނާ، ސައިކަލެއްގައި ހަރުކޮށްފައި ހުރި އައިއީޑީއެއް ގޮއްވާލައިގެން ހައްޔަރުކުރީ މުޖާޒް އަހުމަދު، 21، އާއި ތަހުމީން އަހުމަދު، 32، ގެ އިތުރުން އަހުމަދު އަދުހަމް ރަޝީދު، 25، އެވެ.
މީގެތެރެއިން އަދުހަމަކީ ރިމޯޓަކުން އައިއީޑީ ގޮއްވާލި ކަމަށް ތުހުމަތުވާ މީހާ އެވެ. އެ ގޮއްވާލުމަށް ފަހު އަދުހަމް ގޮސް ބައްދަލުކުރީ މުޖާޒްއާ ކަމަށް ފުލުހުން، މިއަދު ސީސީޓީވީ ފުޓޭޖްތައް އާއްމުކުރުމަށް ފަހު ބުނެފައިވެ އެވެ. ތަހުމީނަކީ، ގޮއްވާލި ސައިކަލްގެ ވެރިމީހާ އެވެ.
މި ތިން މީހުންގެ ބަންދުގެ މުއްދަތު އިތުރުކުރަން މިއަދު ކުރިމިނަލް ކޯޓުގައި ކުރިއަށް ދިޔަ ބަންދު މަޖިލީހުގައި ނެރުނު ކޯޓު އަމުރުތައް "އަދަދު"އަށް ލިބިފައިވާއިރު، އޭގެން އެނގޭ ގޮތުގައި ތިން މީހުންގެ ބަންދަށް ވެސް 15 ދުވަސް ޖަހާފައިވަނީ އެ މީހުންގެ މައްޗަށް ތުހުމަތު ކުރެވޭ މިންވަރަށް އެކަށީގެންވާ ހެކި ފުލުހުން ހުށަހަޅާފައިވުމުން އެކަމަށް ރިއާޔަތްކޮށެވެ.
ނަމަވެސް، ބަންދު މަޖިލީހުގައި ތިން މީހުން ވެސް ވަނީ ތުހުމަތުތަކަށް އިންކާރުކޮށްފަ އެވެ. އެގޮތުން، މަޖިލީހުގައި އަދުހަމް ހަމައެކަނި ބުނެފައިވަނީ އޭނާއާ އެއްވެސް ގުޅުމެއް ނޯންނާނެ ކަމާއި އިތުރަށް ދައްކާނެ ވާހަކައެއް ނެތް ކަމަށެވެ.
ތަހުމީން ބުނެފައިވަނީ އޭނާގެ ނަމުގައި ސައިކަލެއް ރަޖިސްޓާކޮށްފައި ނޯންނާނެ ކަމަށެވެ. އެކަމަކު، ކޯޓު އަމުރުގައި ބުނެފައިވަނީ ފުލުހުންގެ ފަރާތުން ހުށަހަޅާފައިވާ ލިޔުމުގައި އޭނާގެ ސައިކަލް ރަޖިސްޓްރީކޮށްފައިވާކަން އެނގޭ ކަމަށް ވިދާޅުވި އެވެ.
ބަންދު މަޖިލީހުގައި މުޖާޒު ބުނެފައިވަނީ، އޭނާގެ މައްޗަށް ތުހުމަތުކުރާ ކުށް އޭނާ ކޮށްފައި ނުވާނެ ކަމަށެވެ. އޭނާގެ ވަކީލް ބުނެފައިވަނީ މުޖާޒުއާ ބައްދަލުވެފައިނުވާތީ މާބޮޑު މައުލޫމާތެއް ނެތް ކަމަށެވެ.
ނަމަވެސް، ކޯޓު އަމުރުގައި ކަނޑައެޅީ، ފުލުހުން ހުށަހަޅާފައިވާ ހެއްކަށް ބަލާއިރު ތިން މީހުންގެ މައްޗަށް ވެސް ތުހުމަތު ކުރެވޭ މިންވަރުވާ ކަމަށެވެ. އަދި، އެ މީހުންނަކީ މުޖުތަމައުގެ ސަލާމަތަށް ނުރައްކާވާ ފަދަ ބައެއްކަން ފުލުހަށް ކޯޓުގައި ވުޖޫދުކޮށްދެވިފައިވާ ކަމަށް ވެސް އަމުރުގައިވެ އެވެ. ތިން މީހުންގެ ބަންދަށް ވެސް 15 ދުވަސް ޖެހީ އެކަމަށް ރިޔާއަތްކޮށެވެ.
ބޮމުގެ ހަމަލާއާ ގުޅިގެން ފުލުހުން ބޭއްވި ޕްރެސް ކޮންފަރެންސްތަކުގައި އާއްމުކުރި ގޮތުގައި ހައްޔަރުކޮށްފައިވާ ތިން މީހުންނަކީ ވެސް ހަރުކަށި ފިކުރުމުގެ މީހުން ކަމަށް ތުހުމަތު ކުރެވެ އެވެ. ނަމަވެސް މިހާތަނަށް ޓެރަރިސްޓު އެއްވެސް ނެޓުވޯކަކާ ހައްޔަރު ކުރި މީހުންނާ ގުޅުމެއް އޮތްކަން ތަހުގީގަށް އެނގިފައި ނެތް ކަމަށް ފުލުހުން ބުންޏެވެ.
ނަޝީދަށް ދިން ބޮމުގެ ހަމަލާގެ ގެއްލުން ބޮޑު ކުރުމަށް ބޮމުގެ ތެރެއަށް ހުރީ ބެއަރިން ބޯލްސް ނުވަތަ ރޭޒަރު ފުށް އަޅައިފަ އެވެ. އޭގެ 11 ދަގަނޑު ބޯޅަ ނަޝީދުގެ ހަށިކޮޅުން ޑޮކްޓަރުން ނެންގެވި އެވެ. ނަޝީދުގެ އިތުރުން އެ ހަމަލާގައި އެމަނިކުފާނުގެ ތިން ބޮޑީގާޑުންނާއި މަގުމަތިން ދިޔަ ދިވެއްސަކާއި އިނގިރޭސިވިލާތުގެ މީހަކަށް އަނިޔާވި އެވެ.
