އޭއެފްސީ ކަޕް ކުޅެން މާލެ އައިސް ތިބި އިންޑިއާގެ ބެންގަލޫރު އެފްސީގެ ބައެއް ކުޅުންތެރިންނާއި އޮފިޝަލުން ޕްރޮޓޮކޯލާ ހިލާފުވި މައްސަލައިގައި މައާފަށް އެދޭ ކަމަށާއި އެ ކުޅުންތެރިންނާ މެދު ހަރުކަށި ފިޔަވަޅު އަޅާނެ ކަމަށް އެ ކްލަބުގެ ސީއީއޯ ޕާތު ޖިންދާލް ވިދާޅުވެއްޖެ އެވެ.
މުބާރާތުގެ ޕްލޭއޮފުގައި އަންގާރަ ދުވަހު ރާއްޖޭގެ ކްލަބް އީގަލްސްއާ ދެކޮޅަށް ކުޅެން އަންނަން ބެންގަލޫރަށް ދިވެހި ސަރުކާރުން ހުއްދަ ދިނީ އޭއެފްސީ އާއި އެޗްޕީއޭގެ ހަރުކަށި ފިޔަވަޅުތަކަށް ތަބާވާނެ ކަމުގެ ޔަގީންކަން ހޯދުމަށް ފަހު އެވެ.
އެކަމަކު ހޮޓެލް ޖެންގައި ތިބި އެ ޓީމުގެ ބައެއް ކުޅުންތެރިން އިއްޔެ ޕްރޮޓޮކޯލާ ހިލާފުވެ މަގުމަތީގައި އުޅުނެވެ. އެއާ އެކު ސްޕޯޓްސް މިނިސްޓަރު އަހުމަދު މަހުލޫފު ވަނީ އެ ޓީމު ވަގުތުން އެނބުރި ގައުމަށް ދާން ޖެހޭނެކަމަށް އަންގަވައިފަ އެވެ.
އެފްއޭއެމުން މިހާރު ވަނީ އޭއެފްސީ ކަޕުގެޕްލޭއޮފާއި ގްރޫޕް ސްޓޭޖު މެޗުތައް ރާއްޖޭގައި ހޯސްޓް ކުރެވެން ނެތްކަން ކްލަބްތަކަށް އަންގައިފަ އެވެ. މެޗުތައް ކުރިއަށް ގެންދާނެ ގޮތެއް ކަނޑައަޅާނީ އޭއެފްސީންނެވެ.
ބެންގަލޫރުގެ ސީއީއޯ ޖިންދާލް މިއަދު ކުރި ޓްވީޓެއްގައި ވިދާޅުވީ، އެ ކްލަބުގެ ބިދޭސީ ތިން ކުޅުންތެރިންނާއި އޮފިޝަލުންގެ ކިބައިން ފެނުނު، ބަހަނާއެއް ދެއްކެން ނެތް އަމަލަށް ކްލަބުގެ ފަރާތުން މައާފަށް އެދޭ ކަމަށެވެ.
"އެ ތިން ކުޅުންތެރިން/އޮފިޝަލުންނާ މެދު ހަރުކަށި ފިޔަވަޅު އަޅާނަން،" މިފަދަ ކަމެއް ތަކުރާރުނުވާނެ ކަމުގެ ޔަގީންކަން ދެމުން އޭނާ ވިދާޅުވެފައިވެ އެވެ.
އެކަމަކު މިއީ މެނޭޖްމަންޓުގެ ފެއިލްވުމެއް ކަމަށް ނުދެކި، ހާލަތުގެ ޒިންމާ ނުނަގައި ކުޅުންތެރިންގެ ބޮލުގައި މިކަން އެޅުވުމުން އޭނާ އަށް އިންޑިއާގައި އަންނަނީ ފާޑުކިޔަމުންނެވެ. ޖިންދާލް އަކީ އިންޑިއަން ސުޕަ ލީގު ކްރިކެޓް މުބާރާތުގައި ވާދަކުރާ ދިއްލީ ކެޕިޓަލްސްގެ ވެސް ސީއީއޯ އެވެ.
