އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑޭ) މަރަން ގޮވާލި، ނ. ކުޑަފަރީ ސްކޫލުގެ އިސްލާމް ޓީޗަރު މިއަދު ސަސްޕެންޑް ކޮށްފި އެވެ.
އިސްލާމް ކިޔަވައިދޭ މުހައްމަދު އަޝްރަފް، ވައްޑޭ މަރަން ގޮވާލީ ލޯކަލް ކައުންސިލް އިންތިހާބުގެ ކެމްޕެއިންގައި ރައީސް އަބްދުﷲ ޔާމީންގެ ވެރިކަމުގައި މަރަށް މަރުހިފުމަށް ލީތަލް އިންޖެކްޝަން ބޭނުންކުރަން ކެބިނެޓްގައި މަޝްވަރާ ކޮށްފައިވާ ކަމަށް ވިދާޅުވެ އެކަމަށް ވައްޑޭ ފާޑުކީ މައްސަލައިގަ އެވެ.
އެ އެކަން ކުރަން އުޅުނު މީހުން ވައްޑޭ އޭރު ސިފަ ކުރެއްވީ "ސިކު" ބައެއްގެ ގޮތުގަ އެވެ.
އެކަމާ ގުޅިގެން ޓީޗަރު މުހައްމަދު އަޝްރަފް ފޭސްބުކްގައި ލިޔެފައިވަނީ ވައްޑޭ ތައުބާވާން އަންގައި އޭނާ އެކަން ނުކޮށްފިނަމަ މަރާލަން ޖެހޭ ކަމަށެވެ.
"މި ސިކު މުރުތައްދު ކަލޭގެއަށް ތައުބާވުމަށް އަންގައި، އެކަން ނުކޮށްފިނަމަ މަރާލަން ޖެހޭ. ދީނަކީ މިފަދަ މީހުން ކުޅޭ އެއްޗަކަށް ހަދާތަން ބަލަން މުސްލިމް ގައުމެއްގެ ރައްޔިތުން ތިބެގެން ނުވާނެ!" އަޝްރަފް ފޭސްބުކްގައި ލިޔެފައިވެ އެވެ.
ކުޑަފަރީ ސްކޫލްގެ ޕްރިންސިޕަލް އަހުމަދު ހުސައިން "އަދަދު" އަށް ވިދާޅުވީ އެ މައްސަލަ ބަލައި ވަކި ގޮތެއް ނިމެންދެން އަޝްރަފް 30 ދުވަހަށް މިއަދުން ފެށިގެން ސަސްޕެންޑް ކޮށްފައިވާ ކަމަށެވެ.
އެކަމާ ގުޅޭގޮތުން ވައްޑޭ މިއަދު ވިދާޅުވީ ދަރިންނަށް އިސްލާމް ކިޔަވައިދޭ ޓީޗަރެއްގެ ވިސްނުން އެގޮތަށް ހުރުމަކީ ކަންބޮޑުވާ ކަމެއް ކަމަށެވެ.
"ކުޑަކުދިންނަށް ކިޔަވައިދޭ މީހެއްގެ ވިސްނުން އެހެރީ މީހުންނާ ދޭތެރޭގައި. ދެއްކި ވާހަކައެއް ވެސް އޮޅުން ނުފިލާ، ދޭހަވެސް ނުކޮށް، ދޭހަ ކުރަން ނުވެސް އުޅޭ،" ވައްޑޭ ވިދާޅުވި އެވެ.
މަރަން މަރުހިފުމާ ގުޅޭގޮތުން ވައްޑޭ ދެއްކެވި ވާހަކައާ ގުޅިގެން ގިނަ ބަޔަކު އޭނާއަށް ފާޑުކިޔައި ވަނީ އިންޒާރު ދީފަ އެވެ.
އިންޒާރުތަކުގެ ސަބަބުން ވައްޑޭ މިހާރު އުޅެމުން ދަނީ ސިފައިންގެ ސެކިއުރިޓީއާއެކު އެވެ.
