ކޮވިޑްގެ ހާލަތު ގޯސްވެފައިވާ މި ހާލަތުގައި މާލެ ސަރަހައްދުގެ ހުސް ބިންތަކަށް ގިނަ އަދަދެއްގެ ކުޑަކުދިން އެއްވެ މަޑި އެރުވުން ފަދަ ކަންކަން ކުރާތީ، އެކަންކަން ނުކުރުމަށް ފުލުހުން އިލްތިމާސް ކޮށްފި އެވެ.
އެޗްއީއޯސީން ރޭ ބޭއްވި ނޫސްވެރިންގެ ބައްދަލުވުމުގައި ޗީފް ސުޕްރިޑަންޓް އޮފް ޕޮލިސް އަބްދުﷲ ޝަރީފް ވިދާޅުވީ ޕާކްތަކާއި މައިދާންތައް ބަންދު ކޮށްފައިވީ ނަމަވެސް، ގިނަ އަދަދެއްގެ ކުޑަކުދިންނާއި ބިދޭސީންގެ އިތުރުން އާއްމުން ވެސް އެ ސަރަހައްދުތަކަށް އެއްވާ ކަމަށެވެ. އެގޮތަށް އެއްވާ މީހުންނަށް ކޮންމެ ދުވަހަކު ވެސް ނަސޭހަތްތެރިވާން ޖެހޭ ކަމަށް ވެސް ވިދާޅުވި އެވެ.
"އެންމެ ކަންބޮޑުވާ އެއްކަމަކީ ކުޑަކުދިން ހަވީރު ގަޑީގައި ވަރަށް ބޮޑަށް މަގުމައްޗަށް ނުކުންނަކަން ފާހަގަ ކުރެވޭ. ބެލެނިވެރިން އެ ކުދިން ގޮވައިގެން މަޑިއެރުވުމުގައި ގިނަ ވަގުތުތަކެއް ހުސްބިންތަކުގައި ހޭދަ ކުރާތަން އަޅުގަނޑުމެންނަށް ފެނޭ،" ޝަރީފް ވިދާޅުވި އެވެ.
ސުޕްރިޑަންޓް އޮފް ޕޮލިސް އަބްދުﷲ ޝަރީފް: އާއްމު ތަންތަނަށް ގިނަ ބަޔަކު އެއްވާތީ ކަންބޮޑުވުން ފާޅުކުރެއްވި-- ފޮޓޯ: އެޗްއީއޯސީ
ކޮވިޑުން ރައްކާތެރިވުމުގެ ގޮތުން މާލެ ސަރަހައްދުގައި ކޮންމެ ރެއެއްގެ 9 އިން ފަތިހު 4 އަކަށް އަންނަނީ ކާފިއު ހިންގަމުންނެވެ. އަދި ކުޅިވަރު ކުޅޭ މައިދާންތަކާއި ޕާކްފަދަ ތަންތަނުގެ އިތުރުން ސިނަމާތައް ވެސް ވަނީ ބަންދުކޮށްފަ އެވެ.
އޭނާ ވިދާޅުވީ މާލޭގައި އެންމެ ގިނަ މީހުން އުޅޭ ބާޒާރު މަތީގައި ގައިދުރުކަމެއް ނެތި އުޅެމުން ދާ ކަމަށެވެ. އަދި ގިނަ އަދަދަކަށް ބިދޭސީންނާއި ދިވެހިން ވެސް ބާޒާރު މަތީގައި މާސްކް ނާޅާ އުޅޭ ކަމަށް ވެސް ވިދާޅުވި އެވެ.
"އަޅުގަނޑުމެން ކޮންމެ ދުވަހަކު ވެސް އެޓެންޑް ކުރަން ޖެހޭ ކަންކަން މިއީ،" ޝަރީފް ވިދާޅުވި އެވެ.
ޝަރީފް ވިދާޅުވީ ކޮވިޑުން ރައްކާތެރިވުމަށް އަޅާފައިވާ ފިޔަވަޅުތަކާ ހިލާފުވާ މީހުން ހޯދައި ޖޫރިމަނާކޮށް ފިޔަވަޅު އަޅަމުން އަންނަ ކަމަށެވެ.
ވޭތުވެދިޔަ 24 ގަޑިއިރުގެ ތެރޭގައި ރާއްޖޭން ކޮވިޑަށް ޕޮޒިޓިވްވީ 590 މީހުންނެވެ. އިއްޔެ އެ އަދަދު ހުރީ 600 އިން މަތީގަ އެވެ. މިވަގުތު ހޮސްޕިޓަލުގައި 230 މީހުންނަށް ފަރުވާ ދެމުން އަންނައިރު ބަލީގައި 83 މީހަކު ވަނީ މަރުވެފަ އެވެ.
