"މަ ރަނގަޅޭ!!"
ރައްޔިތުންގެ މަޖިލީހުގެ ރައީސް، މުހައްމަދު ނަޝީދު އަވަހާރަކޮށްލަން އައިއީޑީއެއް ގޮއްވާލައި ވަރުގަދަ ޓެރަރިސްޓް ހަމަލާއެއް ދިން ފަހުން މި ވޭތުވެދިޔަ 40 ގަޑިއިރަކީ އާއިލާ އަށް ވަރަށް ހިތްދަތި ވަގުތު ކޮޅެކެވެ.
ބޮން ގޮއްވާލުމާ އެކު ހަށިކޮޅުގެ އެކި ތަންތަނަށް ރޭޒާ ފުއްތަށް ވަދެ ލިބުނު ފުން ޒަހަމްތަކުން ފުރާނަ ސަލާމަތް ކުރަން ގިނަ ސާޖަރީތަކެއް ހެދި އެވެ. ކާމިޔާބު ސާޖަރީތަކަށްފަހު، އެމަނިކުފާނު އޮންނެވީ މިއަދު ހެނދުނާ ހަމައަށް އޮންނެވީ ވެންޓިލޭޓަރުގަ އެވެ.
ވެންޓިލޭޓަރުން ނެގުމާ އެކު އެމަނިކުފާނާ ބައްދަލު ކުރެއްވީ މަންމާފުޅު އާބިދާ މުހައްމަދާއި ބައްޕާފުޅު އަބްދުއްސަތާރެވެ. އެމަނިކުފާނުގެ ހާލުކޮޅު ފެނިވަޑައިގެން ހެދި އެންމެ ހިތްދަތިވެފައި ތިބޭނީ އެ ދެ ބޭފުޅުން ކަން އެނގިވަޑައިގަންނަވާތީ ފުރަތަމަ ވެސް ދެއްވީ ހިތްވަރެވެ. ހޮސްޕިޓަލުން އެނބުރި ވަޑައިގަންނަވާނީ ކުރިއަށް ވުރެން ވެސް މާ ވަރުގަދަކޮށް ކަމެވެ.
ދެ ބޭފުޅުންގެ ގާތު، ރައީސް ނަޝީދު ވިދާޅުވީ "މަ ރަނގަޅޭ،" ކަމަށެވެ.
ރައީސް ނަޝީދުގެ ކޮއްކޯފުޅު ނާޝިދާ އަބްދުއްސައްތާރު ވިދާޅުވީ ރިކަވަރީއާ މެދު ޑޮކްޓަރުން ތިބީ ވަރަށް ހިތްހަމަޖެހިފައި ކަމަށާއި ވެންޓިލޭޓަރުގެ އެހީއާ ނުލައި، އަމިއްލަފުޅަށް ނޭވާލައްވަމުން ގެންދަވާ ކަމަށެވެ.
"ވާހަކަ ދެކެވުނު، ޔަގީންކަން ދިނީ ކުރިއަށް ވުރެ ވަރުގަދަކޮށް އެނބުރި އަންނާނެކަން،" ނާޝިދާ ވިދާޅުވި އެވެ.
ރައީސް ނަޝީދުގެ ސިއްހީހާލުކޮޅާ ގުޅޭ އެންމެ ފަހު ތަފްސީލް އޭޑީކޭ ހޮސްޕިޓަލުން އަދި ހާމަކޮށްފައެއް ނުވެ އެވެ.
ނަޝީދު އަވަހާރަކޮށްލަން އައިއީޑީ ގޮއްވާލީ ދިރިއުޅުއްވާ ގެކޮޅު ކައިރީގައި ހުރި ސައިކަލުގެ މަޑިދަށުގައި ބާއްވައިގެންނެވެ. ކެނެރީގެ ހުންނަ ނީލޯފަރުހިނގުމުން އެމަނިކުފާނު ހިންގަވާފައި މަޖީދީ މަގުގައި އޮތް ކާރުކޮޅާ ހަމައަށް 8:27 ގައި ފޯރުމާ އެކު އައިއީޑީ ގޮއްވާލުމުން ލިބުނު ޒަހަމްތަކާ އެކު ބިންމައްޗަށް ވެއްޓިވަޑައިގަތީ އެވެ. އެކުގައި ތިއްބެވި ސެކިއުރިޓީންނަށް ވެސް އަނިޔާވި އެވެ.
އެމްއެންޑީއެފުން ބުނީ އެމަނިކުފާނު ހޮސްޕިޓަލަށް ގެންދިޔަ މަގުމަތީގައި ސެކިއުރިޓީން ހާލު އެއްސެވުމުން "މެއާ ދިމާލަށް ތަދުވާ" ކަމަށް ވިދާޅުވި ކަމަށެވެ.
އެމަނިކުފާނުގެ ހާލުކޮޅާ ގުޅޭ ގޮތުން "އަދަދު"އަށް އެނގިފައިވާ ގޮތުގައި، އައިއީޑީ ގޮއްވާލުމާ އެކު ހަށިކޮޅު ތޮރުފާލައި، ފުންކޮށް 11 ދިމާއަކަށް އެ ރޭޒަރުފުއްތައް ވަދެފައި ހުއްޓެވެ.
އެމަނިކުފާނު ހޭނައްތައިގެން ސާޖަރީތައް ކުރަން ޖެހުނީ މި ރޭޒަފުއްތަށް ނަގާށެވެ. މި ޒަހަމުތަކުގެ ސަބަބުން ނަޝީދުގެ ސިއްހީ ހާލަތަށް ކުރާނޭ އަސަރެއް އަދި ސާފެއް ނުވެ އެވެ.
އާއިލާއިން ބުނެފައިވާ ގޮތުގައި އެމަނިކުފާނުގެ ހާލުކޮޅު މިހާރު 'ސްޓޭބަލް' ކަމަށާއި ދެން އޮތީ ރިކަވަރީ އެވެ.
އައިއީޑީއަށް މޮހޮރާއި ރޭޒަފުއްތައް އަދި ތޫނު އެތިކޮޅުތައް ލަނީ އެ ހަމަލާ އަމާޒުކުރާ މީހާ ނުވަތަ ބަޔަކަށް ލިބޭ ގެއްލުން ބޮޑު ކުރަން ކަން "އަދަދު"އާ ވާހަކަ ދެއްކެވި ތަޖުރިބާކާރަކު ވިދާޅުވެފައިވެ އެވެ.
