ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ދިރިއުޅުއްވާ ގެކޮޅު ހުންނަ ނީލޯފަރު މަގަކީ ހަނި ގޯޅިއަކަށްވެފައި، އެ މަގުގައި ސައިކަލު ޕާކުކޮށްފައި ހުންނާތީ، އެމަނިކުފާނަށް ސެކިޔުރިޓީ ފޯރުކޮށްދެން ދަތިކަމަށް އެމްއެންޑީއެފުން ބުނެފައިވާކަން ހާމަވެއްޖެ އެވެ.
އެކަން ހާމަވީ، އެމަނިކުފާނު ދިރިއުޅުއްވާ ގ. ކެނެރީގެ އިން ނުކުމެވަޑައިގެން ރޭ ކާރަށް އަރާވަޑައިގެންނެވި ވަގުތުކޮޅާ ދިމާކޮށް ނީލޯފަރުމަގުގައި ރޭ އެއްޗެއް ގޮއްވާލައިގެން ހަމަލާ ދީފައިވަނިކޮށެވެ.
"އަދަދު"އަށް އެނގިފައިވާ ގޮތުގައި ނީލޯފަރު މަގުގައި ޕާކު ނުކުރެވޭ ގޮތް ހަދައި ދިނުމަށް އެދި އެމްއެންޑީފުން އެދިފައިވަނީ މާލޭ ސިޓީ ކައުންސިލްގަ އެވެ.
އަދި އެކަން ކުރުމަށްޓަކައި، އެ މަގުގައި ޕާކު ކުރާ ސައިކަލުތަކަށް ބިއްލޫރުގެއިން ޕާކިން ޒޯނެއް ހަދައި ދިނުމަށް ސިޓީ ކައުންސިލުން ހައުސިން މިނިސްޓްރީ ގައި އެދި މިދިޔަ މާޗް މަހުގެ 23 ވަނަ ދުވަހު ފޮނުވާފައިވާ ސިޓީގެ ކޮޕީއެއް "އަދަދު"އަށް ލިބިފައިވާއިރު އެ ސިޓީގެ ސައްހަކަން ވެސް ވަނީ ކަށަވަރުވެފަ އެވެ.
އެމްއެންޑީއެފުން އެގޮތަށް އެދިފައިވަނީ، ރައީސް ނަޝީދަށް ހަމަލާދޭން އުޅޭކަމުގެ ސީދާ މައުލޫމާތެއް ލިބިގެން ކަމެއް ސާފެއް ނުވެ އެވެ.
ނަމަވެސް، އެ ހަމަލާއާ ގުޅިގެން މިއަދު މެންދުރު ފުލުހުން ބޭއްވި ނޫސްވެރިންގެ ބައްދަލުވުމުގައި ޕޮލިސް ކޮމިޝަނަރު މުހައްމަދު ހަމީދު ވިދާޅުވީ ރައީސް ނަޝީދަށް ދިން ހަމަލާއާ ގުޅޭ އިންޓެލިޖެންސް މައުލޫމާތެއް އެއްވެސް ފަރާތަކުން ލިބިފައިނުވާ ކަމަށެވެ.
އެ ހަމަލާދިން ފަހުން މިހާރު 24 ގަޑިއިރަށް ވުރެ ގިނައިރުވެފައިވާއިރު، އެކަމާ ގުޅޭ އެއްވެސް ތަފްސީލީ މައުލޫމާތެއް އެމްއެންޑީއެފުން ދީފައިނުވާތީ ގިނަ ބަޔަކު ދަނީ ސުވާލު އުފައްދަމުންނެވެ.
ރައީސް ނަޝީދަށް ދިން ހަމަލާއަކީ އެމަނިކުފާނު އަވަހާރަކޮށްލަން ދިން ޓެރަރިޒަމް ހަމަލާއެއް ކަމަށް ފުލުހުން ވެސް މިހާރު ބުނެފައިވާއިރު، އެމްއެންޑީއެފްގެ ނޫސްވެރިންގެ ބައްދަލުވުމެއް މިރޭއަށް މިހާރު ވަނީ ތާވަލުކޮށްފަ އެވެ.
އެ ހަމަލާދިން މީހުން ކަމަށް ޝަައްކު ކުރެވޭ ހަތަރު މީހަކު މިހާރު ފާހަގަކުރެވިފައިވާ ކަމަށާއި އެމީހުން ހައްޔަރުކުރުމުގެ މަސައްކަތް ކުރެވެމުންދާކަމަށް ވެސް ފުލުހުން މިއަދު ވަނީ ބުނެފަ އެވެ.
ރޭގެ ހަމަލާގައި ރައީސް ނަޝީދަށް ލިބުނު ޒަހަމްތަކަށް އަދިވެސް އޭޑީކޭ ހޮސްޕިޓަލުގައި ފަރުވާދެމުންދާއިރު، އެމަނިކުފާނުގެ ހާލު އަދިވެސް ސީރިއަސް ކަމަށާއި، އޮންނެވީ އައިސީޔޫގައި ކަމަށް ވެސް ހޮސްޕިޓަލުން ބުނެފައިވެ އެވެ.
