"ހަމަ ހީވީ މުޅި މަޖީދީމަގު ގޮއްވާލިހެން. ވަރަށް ބާރު ގޮވުމެއް އެއީ،"
ބާރުގަދަ އެ އަޑާ އެކު ސިއްސައިގެން ގޮސް ބޭރަށް ނުކުމެވުނު މުހައްމަދު ރާމިޒް (ތުއްތު) އެ ހާދިސާ ސިފަކޮށްދިނެވެ.
ކެނެރީގެ ކައިރީގައި ދިރިއުޅޭ ރާމިޒަށް އޭރު ވީ ގޮތެއް ސާފެއް ނުވެ އެވެ. އެއްޗެއް ގޮއްވާލި އެ ހާދިސާގައި އަނިޔާ ލިބިވަޑައިގަތީ ކުރީގެ ރައީސް މުހައްމަދު ނަޝީދަށް ކަން އޭނާއަށް އެނގުނީ ގިނަ ބަޔަކު އެއްވެފައި ތިބުމުންނެވެ. އޭނާ އަށް އެ ސަރަހައްދަށް ދެވުނު އިރު އޭޑީކޭގެ އެމްބިއުލަންސަށް ނަޝީދު އަރުވަނީ އެވެ.
އެ ހާދިސާ ހިނގީ މިރޭ 8:30 ހާއިރު ރައީސް ނަޝީދު ކެނެރީގެއިން ނުކުމެވަޑައިގެން މަޖީދީމަގުގައި އޮތް ކާރުކޮޅަށް އަރާވަޑައިގަންނަވަން ދިޔަ ވަގުތުގަ އެވެ. ނީލޯފަރުހިނގުމާ ދިމާލުން މަޖީދީމަގު އިރުދެކުނު ކަންމަތީ އޮތް ކާރުކޮޅަށް ރައީސް ނަޝީދު އަރާވަޑައިގަންނަވަން ކައިރިވުމާ އެކު ބާރުގަދަ ޑިވައިސްއެއް ވަނީ ކާރު ކައިރިން ގޮއްވާލައިފަ އެވެ.
މަންޒަރު ދުށް މީހަކު "އަދަދު" އަށް ބުނި ގޮތުގައި އެ ޑިވައިސް ހަރުކޮށްފައި ވަނީ ނީލޯފަރު ހިނގުމުން މަޖީދީމަގު ކަންމަތީ ޕާކްކޮށްފައި ހުރި ވޭވް ސައިކަލެއްގަ އެވެ.
"އެ ޑިވައިސް ގޮއްވާލުމުން ބުރައިގެން ދިޔަ ސައިކަލްގެ ބައިތައް ޖެންޑާ މިނިސްޓްރީ (މަޖީދީމަގުގައި ހުންނަ ބިއްލޫރިޖެހިގެ) އާ ހަމައަށް ބުރާފައި ހުރި،" މަންޒަރު ދުށް މީހަކު "އަދަދު" އަށް ބުންޏެވެ.
ފޮޓޯތަކުން ފެންނަ ގޮތުގައި ނޫކުލައިގެ ވޭވް ސައިކަލްގެ މަޑިވެސް ވަނީ ވިއްސައިގެން ގޮސްފަ އެވެ. ގޮއްވާލި ޑިވައިސް ވެސް ސައިކަލް ކައިރި އޮތެވެ. ބާރުގަދަ އެ ގޮވުމުގެ ސަބަބުން ކަންމަތީގައި ހުރި ފިހާރައަށާއި އެ ހިސާބު މަގަށް ވެސް އެކިވަރުގެ ގެއްލުންތައް ލިބިފައި ހުއްޓެވެ.
ގޮއްވާލި ޑިވައިސް ސައިކަލް ކައިރި ވެއްޓިފައި: ސައިކަލަށް ބޮޑެތި ގެއްލުންތަކެއް ވަނީ ވެފައި--
ކުރިން ވާހަކަ ދެއްކި ރާމިޒް "އަދަދު" އަށް ބުނިގޮތުގައި އެ ޑިވައިސް ގޮއްވާލި ވަގުތު ހަމަހީވީ ގެ ކައިރިން ބޮމެއް ގޮއްވާލިހެންނެވެ.
" (ގޮވި ވަގުތު) ވަރަށް ބާރު އަޑެއް އިވުނު. ހީވީ މުޅި މަޖީދީމަގު ގޮވިހެން. އަޅުގަނޑަށް ދެވުނުއިރު ބޮޑީގާޑާއި އިތުރު މީހަކު އޮތް ޒަހަމް ވެފައި. ލިބިފައި ހުރި ގެއްލުންތަކެއް އަޅުގަނޑަކަށް ނޭނގެ،" ރާމިޒް ބުންޏެވެ.
އެ ހާދިސާގައި ރައީސް ނަޝީދުގެ އިތުރުން އެމަނިކުފާނުގެ ތިން ބޮޑީގާޑުން ވަނީ ޒަހަމްވެފަ އެވެ. އަދި ބިދޭސީއަކާއި އާއްމު މީހަކަށް ވެސް ވަނީ އަނިޔާވެފަ އެވެ. އެ އެންމެންނަށް ވެސް ހޮސްޕިޓަލުގައި ފަރުވާ ދެމުން އަންނައިރު އެންމެންގެ ވެސް ހާލު މިހާރު އަންނަނީ ރަނގަޅުވަމުންނެވެ.
އެކަމަކު ނަޝީދަށް އަނިޔާ ލިބި އޭޑީކޭގައި އަންނަނީ ފަރުވާދެމުންނެވެ. ހޭނައްތައިގެން އެމަނިކުފާނުގެ އޮޕަރޭޝަނެއް ވެސް ކުރިއަށް ގެންދިޔަ އެވެ.
ޑިވައިސް ގޮއްވާލި ސަރަހައްދުގައި ސިފައިން ހަރަކާތްތެރިވަނީ: މި ހާދިސާގައި ސިފައިންގެ ތިން މީހަކަށް އަނިޔާވި-- ފޮޓޯ: ހުސައިން ވަހީދު/ އަދަދު
އެ ހާދިސާގައި އަނިޔާވި ސިފައިންގެ އެކަކަށް ފަރުވާ ދީފައިވަނީ ބާރު އަޑުގެ ސަބަބުން ކަންފަތަށް ތަދު ވާތީ އެވެ. އޭނާ މިހާރު ވަނީ ދޫކޮށްލައިފަ އެވެ.
ޓެރަރިޒަމްގެ މި އަމަލު ފުލުހުން އަންނަނީ ސީރިއަސް މައްސަލައެއްގެ ގޮތުގައި ތަހުގީގު ކުރަމުންނެވެ. ޑިވައިސް ގޮއްވާލި ސަރަހައްދުގައި ފުލުހުންގެ ތަހުގީގު ޓީމްތަކާއި ސިފައިން ހަތިޔާރާ އެކު އަންނަނީ ހަރަކާތްތެރިވަމުންނެވެ.
ނަޝީދުގެ ފުރާނަފުޅަށް ގެއްލުން ދޭން އަމާޒުކުރި މި ހަމަލާ ގިނަ ބަޔަކު ވަނީ ކުށްވެރިކޮށްފަ އެވެ.
