ކުރީގެ ރައީސް މުހައްމަދު ނަޝީދު އެމަނިކުފާނުގެ ކާރުކޮޅަށް އަރައިވަޑައިގަންނަވަނިކޮށް އެއްޗެއް ގޮއްވާލައި ދިން ހަމަލާ އެމެރިކާ އާއި އިންޑިއާ އިން ކުށްވެރިކޮށްފި އެވެ.
މަޖީދީ މަގާ ނީލޯއްފަރު މަގާ ވީ ކަންމަތީގަ ގޮއްވާލި އެ ގޮވުމުގެ ސަބަބުން ރައީސް ނަޝީދުގެ މޫނަށް އަނިޔާވެފައިވާކަން މައުލޫމާތު ލިބެ އެވެ. ނަޝީދުގެ އިތުރުން އެމަނިކުފާނުގެ ދެ ބޮޑީގާޑުންނާއި ކާރު ޑްރައިވަރާއި މަގުން ދިޔަ މީހަކާއި ޓޫރިސްޓަކަށް ވެސް ވަނީ އަނިޔާވެފަ އެވެ.
ރާއްޖެއަށް ކަނޑައަޅާފައި ހުންނަ އެމެރިކާ އެމްބެސަޑަރު އެލައިނާ ޓެޕްލިޓްޒް މިރޭ ކުރެއްވި ޓުވީޓެއްގައި ވިދާޅުވެފައި ވަނީ ރައީސް ނަޝީދަށް ދީފައިވާ ހަމަލާ ކުށްވެރިކުރާ ކަމަށާއި އެމަނިކުފާނަށް އަވަސް ޝިފާއެއް އެދޭ ކަމަށެވެ.
އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިޔަމް ޖަޔަޝަންކަރު ވިދާޅުވީ ރައީސް ނަޝީދަށް އަމާޒުކޮށް މިރޭ ދިން ހަމާލާގެ ސަބަބުން ކަންބޮޑުވެވަޑައިގެންފައިވާ ކަމަށެވެ. އަދި ކުރިމަތި ކުރުވާ ބިރެއްގެ ސަބަބުން ނަޝީދު ފަހަތަށްޖެހިވަޑައިނުގަންނަވާނެ ކަމުގެ ޔަގީންކަން އެބަ އޮތް ކަމަށް ވެސް އޭނާ ވަނީ ވިދާޅުވެފަ އެވެ.
ރައީސް ނަޝީދަށް ދިން ހަމަލާ އިންޑިއާގެ ރައްޔިތުންގެ މަޖިލީހުގެ ރައީސް އޯމް ބިރްލާ ވަނީ ކުށްވެރިކޮށްފަ އެވެ. އޭނާ ވިދާޅުވެފައި ވަނީ ރައީސް ނަޝީދަކީ ރާއްޖޭގެ ޑިމޮކްރަސީގެ ބާނީ ކަމަށާއި އެމަނިކުފާނަށް ދިން ހަމަލާގެ ސަބަބުން ސިހިވަޑައިގެންފައިވާ ކަމަށެވެ.
ރައީސް ނަޝީދަށް މިހާރު ވެސް އަންނަނީ އޭޑީކޭ ހޮސްޕިޓަލުގައި ހަރަކާތްތެރިވަމުންނެވެ. އެމަނިކުފާނުގެ ހާލުކޮޅު ރަނގަޅު ކަމަށް މައުލޫމާތު ލިބެ އެވެ. އަދި މުޅި މާލޭގެ ސަލާމަތީ ކަންކަން ވެސް ވަނީ އިތުރުކޮށްފަ އެވެ.
