ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް އަމާޒުކޮށް މިރޭ ދިން ހަމަލާގައި އެމަނިކުފާނަށް އެކިވަރުގެ ޒަހަމްތައް ލިބި ހޮސްޕިޓަލުގައި ފަރުވާދެމުންދާއިރު، އެމަނިކުފާނުގެ ސިއްހީ ހާލުކޮޅާބެހޭ ގޮތުން ސީދާ އެއްޗެއް ސާފު ވަންދެން މަޖިލީހުން މިރޭ ކުއްލި ގޮތަކަށް ބޭއްވި ހާއްސަ ޖަލްސާ ކުރިއަށް ގެންދަން ނިންމައިފި އެވެ.
ރައީސް ނަޝީދުގެ ގެކޮޅު. ގ. ކެނެރީގެއިން ނުކުމެވަޑައިގެން އެމަނިކުފާނު ކާރުކޮޅަށް އަރައިވަޑައިގަންނަވަނިކޮށް ދިން ހަމަލާއާ ގުޅިގެން މިވަގުތު ޗުއްޓީގައި އޮތް މަޖިލީހުން ވަނީ ހާއްސަ ޖަލްސާއެއް ތާވަލުކޮށްފަ އެވެ.
އެ ޖަލްސާ ފެށުމާއެކު ރިޔާސަތުގައި އިންނެވި މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވަނީ ރިޔާސަތުން އަންގާ އެންގުމެއްގެ ގޮތުގައި ރައީސް ނަޝީދަށް ދިން ހަމަލާ ހުށަހަޅުއްވައިފަ އެވެ.
އީވާ ވިދާޅުވީ ރައީސް ނަޝީދުގެ ފުރާނައަށް އަމާޒުކޮށް ދީފައިވަނީ ޓެރަރިސްޓް ހަމަލާއެއް ކަމަށާއި، އެކަން މަޖިލީހުގެ ނަމުގައި ހަރުކަށި އިބާރާތުން ކުށްވެރި ކުރައްވާ ކަމަށެވެ.
"މި ފިނޑި ޓެރަރިސްޓް ހަމަލާ ރައްޔިތުންގެ މަޖިލީހުން ކުށްވެރިކުރަން،" އީވާ ވިދާޅުވި އެވެ.
އިތުރަށް ވިދާޅުވީ އެ ހަމަލާގައި ރައީސް ނަޝީދަށް ލިބިވަޑައިގެންނެވި ޒަހަމްތަކަށް އޭޑީކޭ ހޮސްޕިޓަލުގެ ޑޮކްޓަރުންގެ ހާއްސަ ޓީމަކުން ފަރުވާދެމުން އަންނަ ކަމަށާއި، އަދި އެމަނިކުފާނުގެ ސިއްހީ ހާލުކޮޅާ ބެހޭގޮތުން ޑޮކްޓަރުންގެ ޓީމުން މައުލޫމާތު ހިއްސާކުރާ މިންވަރަކުން މެމްބަރުންނަށް ފޯރުކޮށްދެއްވާނެ ކަމަށެވެ.
އީވާ ވިދާޅުވި ގޮތުގައި އެ ހަމަލާ ފުލުހުންގެ އިތުރުން އެމްއެންޑީއެފުން ތަހުގީގުކުރަމުން ގެންދާ ކަމަށާއި، ތަހުގީގާގުޅޭ މައުލޫމާތުތައް ވެސް ލިބުނު މިންވަރަކުން މެމްބަރުންނާ ހިއްސާ ކުރައްވަމުން ގެންދަވާނެ ކަމަށެވެ.
އަދި ރައީސް ނަޝީދުގެ ސިއްހީ ހާލުކޮޅާބެހޭ ފުރިހަމަ މައުލޫމާތު ލިބެންދެން، ޖަލްސާ ނިންމާނުލައި ކުރިއަށް ގެންދަން ގަސްދުކުރައްވާ ކަމަށް އީވާ އިއުލާނުކުރެއްވި އެވެ.
"އަޅުގަނޑު ގަސްދެއް ނުކުރަން މި ވަގުތު އެއްވެސް ކަހަލަ ބަހުސެއް ކުރިއަށް ގެންދާކަށް. އެހެން ނަމަވެސް އަޅުގަނޑުމެންނަށް ތަހުގީގުންނާއި އަދި ރައީސް ނަޝީދު ސިއްހީ ހާލުކޮޅާ ގުޅޭގޮތުން ފުރިހަމަ މައުލޫމާތު ލިބުނު މިންވަރަކުން އަޅުގަނޑު ހިއްސާކުރަމުން ގެންދާނަން. އަދި ފަހުގެ ވަގުތެއްގައި ވިޔަސް އެ މައުލޫމާތު އަޅުގަނޑު ހިއްސާ ކުރަމުން ގެންދާނަން،" އޭނާ ވިދާޅުވި އެވެ.
މި ވަގުތަށް ޖަލްސާ މެދުކަނޑާލި ނަމަވެސް، އެ މައުލޫމާތު ލިބެންދެން މެމްބަރުން ޖަލްސާގައި ތިއްބެވުމަށް އީވާ އެދިވަޑައިގެންނެވި އެވެ.
މަޖިލީހުގެ ޖަލްސާ ނިންމާ ނުލައި ކުރިއަށް ގެންދަން ނިންމާފައިވާއިރު، އޭޑީކޭ ހޮސްޕިޓަލުން ބުނެފައިވަނީ ރައީސް ނަޝީދު އެ ހޮސްޕިޓަލަށް ގެނައީ އެކި ޒަހަމްތަކާއެކު ކަމަށާއި ނަމަވެސް މިހާރު އެމަނިކުފާނުގެ ހާލުކޮޅު ސްޓޭބަލް ކަމަށެވެ.
"އަދަދު" އަށް އެނގިފައިވާ ގޮތުގައި ނަޝީދުގެ ހަށިކޮޅަށް އެކި ވަރުގެ ޒަހަމްތައް ލިބައިވީ ނަމަވެސް، އެއް އަތުގަ ފުންކޮށް އިން ޒަހަމެއް ފިޔަވައި މާ ސީރިއަސް ޒަހަމެއް ލިބިފައިނުވާ ކަމަށެވެ.
ނަމަވެސް، ޒަހަމްތައް ގިނަ ކަމުން ރައީސް ނަޝީދަށް ފަރުވާ ދީފައިވަނީ އެނެސްތީޒިއާ ދީގެން ކަމަށާއި، އަދި އެތެރެ ހައްޓަށް އެއްވެސް ގެއްލުމެއް ލިބިފައިނުވާ ކަމަށް ޑޮކްޓަރު ވިދާޅުވިކަން "އަދަދު"އަށް ވަނީ އެނގިފައި އެވެ.
ނަޝީދަށް އަމާޒުކޮށް މިރޭ ގޮއްވާލި ޑިވައިސް ހަރުކޮށްފައިވަނީ ސައިކަލެއްގައި ކަމަށް މައުލޫމާތު ލިބިފައިވެ އެވެ.
އަދި ސައިކަލްގައި ވަނީ ސައްހަ ނަމްބަރު ޕްލޭޓެއް ނޫން ކަން "އަދަދު"އަށް ވަނީ ކަށަވަރުވެފަ އެވެ.
އެ ހަމަލާގައި ރައީސް ނަޝީދުގެ އިތުރުން އެމަނިކުފާނު ދެ ބޮޑީގާޑަކަށާއި ޑްރައިވަރުގެ އިތުރުން އާއްމުންގެ މީހަކު ވެސް ވަނީ ޒަހަމްވެފަ އެވެ.
ޒަހަމްވި މީހުންގެ ތެރެއިން ދެ މީހަކު މިހާރު ފަރުވާ ދިނުމަށްފަހު ހޮސްޕިޓަލުން ދޫކޮށްލެވިފައިވާކަމަށް މައުލޫމާތު ވަނީ ލިބިފަ އެވެ.
ފުލުހުންނާއި ސިފައިން ގުޅިގެން އެ ހަމަލާ ސީރިއަސް މައްސަލައެއްގެ ގޮތުގައި ތަހުގީގު ކުރަމުން އަންނަ ކަމަށް ވަނީ ބުނެފަ އެވެ.
