ކުރީގެ ރައީސް މުހައްމަދު ނަޝީދަށް އަމާޒުކޮށް މިރޭ ދިން ހަމަލާ ކުއްވެރިކޮށް، ލަސްނުކޮށް އެ މައްސަލަ ތަހުގީގުކޮށް، ޝާމިލުވާ ކުށްވެރިންނަށް ފިޔަވަޅު އަޅަން އެމްޑީޕީން ގޮވާލައިފި އެވެ.
ނަޝީދުގެ ގެކޮޅު، ގ.ކެނެރީގޭ ކައިރީގައި އެއްޗެއް ގޮއްވާލައިގެން މީހަކު ދިން ހަމަލާއާ ގުޅިގެން އެމްޑީޕީން މިރޭ ނެރުނު ނޫސް ބަޔާނުގައި ބުނީ، ހަމަލާއަކީ ގަސްދުގައި އެމަނިކުފާނުގެ ހަށިކޮޅަށް ގެއްލުންދީ ފުރާނަފުޅު ދުއްވާލުމަށް ދިން ހަމަލާއެއް ގޮތުގައި އެ ޕާޓީން ދެކޭ ކަމަށެވެ.
އެހެންކަމުން އެކަން އެންމެ ހަރުކަށި އިބާރާތުން ކުށްވެރިކޮށް، އެކަމުގައި ޝާމިލުވާ މީހުން ވީ އެންމެ އަވަހަކަށް ތަހުގީގުކޮށް ހޯދައި، އެމީހުންނަށް ފިޔަވަޅު އެޅުމަށް ވެސް ވަނީ ގޮވާލާފަ އެވެ.
ރައީސް ނަޝީދަށް ލިބިފައިވާ އަނިޔާގެ ތަފްސީލެއް ލިބިފައިނުވާއިރު، އެމަނިކުފާނަށް އޭޑީކޭ ހޮސްޕިޓަލްގައި ގެންދަނީ ފަރުވާދެމުންނެވެ.
