ތ. ކަނޑޫދޫގެ ރަށު ކައުންސިލަށް މެންބަރުން ހޮވުމަށް ބޭއްވި އިންތިހާބަކީ ބާތިލް އިންތިހާބެއް ކަމަށް ކަނޑައަޅައިދިނުމަށް އެދި ހައިކޯޓަށް މައްސަލަ ހުށަހަޅައިފި އެވެ.
ހައި ކޯޓަށް ހުށަހަޅާފައިވާ މައްސަލާގައި ބުނެފައިވަނީ އެ ރަށު ކައުންސިލަށް މެންބަރުންނަށް ހޮވުމަށް ބޭއްވި އިންތިހާބަކީ ގާނޫނު އަސާސީއާ ހިލާފަށް ހާއްސަކޮށް، 171 ވަނަ މާއްދާއާ ހިލާފުވާ ގޮތަށް ކުރިއަށް ދިޔަ އިންތިހާބެއް ކަމަށެވެ.
އެ މާއްދާގައި ބުނަނީ، އިލެކްޝަންސް ކޮމިޝަނުގެ ބެލުމުގެ ދަށުން ބާއްވާ އިންތިހާބުތަކާއި، ރައްޔިތުންގެ ހިޔާލު ހޯދުމުގެ އާންމު ވޯޓުތަކުގައި ނަގާނީ ސިއްރު ވޯޓެއް ކަމެވެ.
އަދި ކޮންމެ ވޯޓެއް ނަގައި ނިމުމާ އެކު، ވޯޓުލާ ކޮންމެ މަރުކަޒެއްގައިމެ، އިލެކްޝަންސް ކޮމިޝަނުން އެ މަރުކަޒެއް ހަވާލުކޮށްފައިވާ މީހަކު، ކުރިމަތިލީ ކެންޑިޑޭޓުން ނުވަތަ ކެންޑިޑޭޓުން ކަނޑައަޅާ މީހުން ތިބި ނަމަ، އެ ބައެއްގެ ހާޒިރުގައި އަދި އެ ވޯޓެއް ގުނުމުގެ ކަންތައްތައް ބެލުމަށް ގާނޫނު ހުއްދަކުރާ އެ ނޫން ވެސް ބައެއްގެ ހާޒިރުގައި އެ މަރުކަޒެއްގެ ވޯޓު ގުނައި، ކޮންމެ ކެންޑިޑޭޓަކަށް އެ މަރުކަޒަކުން ލިބުނު ވޯޓުގެ އަދަދު ނުވަތަ ރައްޔިތުންގެ ހިޔާލު ހޯދުމުގެ އާންމު ވޯޓަށް ހުށަހެޅިފައިވާ ސުވާލަށް ލިބިފައިވާ ވޯޓުގެ އަދަދު ލިޔެ ބަލަހައްޓައި، އެ މަރުކަޒެއްގައި ނެގުނު ވޯޓުގެ ނަތީޖާ އެ މަރުކަޒެއްގައި އިއުލާން ކުރަން ވާނެ ކަމެވެ.
އެ ރަށުގެ އިންތިހާބު ކުރިއަށް ދިޔަ ގޮތް މި މައްދާއާ ހިލާފުވީ ގޮތެއް ސާފެއް ނުވެ އެވެ.
ކަނޑޫދޫގެ އިންތިހާބާ ގުޅިގެން ހައި ކޯޓަށް ހުށަހެޅި މައްސަލަ އެ ކޯޓުން މިހާރު ވަނީ ބަލައިގެންފަ އެވެ. މައުލޫމާތު ލިބިފައިވާ ގޮތުގައި، އަންނަ ހަފުތާއަށް މައްސަލާގެ އަޑުއެހުމެއް ތާވަލުކުރުމުގެ މަސައްކަަތް ދަނީ ކުރަމުންނެވެ.
ކައުންސިލް އިންތިހާބު ބޭއްވުމަށް ކައިރިވެފައިވަނިކޮށް ވެސް ކަނޑޫދޫގެ ރައްޔިތުންގެ ފަރާތުން ކަމަށް ބުނެ ހައި ކޯޓަށް މައްސަލައެއް ހުށަހެޅި އެވެ. އެ މައްސަލަ ހުށަހެޅީ، އެ ރަށު ކައުންސިލްގެ ރައީސް ހޮވުމަށް ރައްޔިތުންނަށް ފުރުސަތު ނުލިބޭތީ އެއީ ޑިމޮކްރަޓިކް އުސޫލެއް ނޫން ކަމަށް ބުނެ އެވެ.
ނަމަވެސް، އެ މައްސަލަ ހައިކޯޓުން ބަލައެއް ނުގަތެވެ.
އެ މައްސަލަ އުފަންވީ، ރަށު ކައުންސިލްގެ ރައީސްގެ މަގާމަށް ވާދަކުރި ޕީޕީއެމްގެ ކެންޑިޑެންސީ ސުޕްރީމް ކޯޓުން ބާތިލް ކުރުމާއެކު، އެމްޑީޕީގެ ކެންޑިޑޭޓް އޮޓޯއިން އިންތިހާބުވުމުންނެވެ.
