ރިޔާސީ ކޮމިޝަނަށް ހާޒިރުކުރީ އޭނާއާ ދެކޮޅަށް ތުހުމަތުތަކެއް އުފައްދައިގެން ކަަމަށާއި އެމްއެމްޕީއާރުސީގެ ހިޔާނާތުގައި އެއްވެސް ބައިވެރިވުމެއް ނޯންނާނެ ކަަމަށް މަޖިލީހުގެ މައިނޯރިޓީ ލީޑަރު އަހްމަދު ސަލީމް (ރެޑް ވޭވް ސަލީމް) މިއަދު ވިދާޅުވެއްޖެ އެވެ.
ސަލީމް ކޮމިޝަނަށް ހާޒިރުކުރީ އެސެޓް ރިކަވަރީ ކޮމިޝަނާއި ފުލުހުންނާއި އެންޓި ކޮރަޕްޝަން ކޮމިޝަނުން ހިންގާ ތަހުގީގަށެވެ. ސަލީމަށް ކުރާ ތުހުމަތު ސާފުކޮށްދީފައި އޭނާ އަށް ވަކީލަކު އައްޔަންކުރަން ފަސް ދުވަހުގެ މުއްދަތެއް ކޮމިޝަނުން ވަނީ ދީފަ އެވެ.
ރިޔާސީ ކޮމިޝަނަށް ހާޒިރުކުރި މައްސަލައިގައި ސަލީމް "އަދަދު"އަށް ވިދާޅުވީ މިހާރު ކުރިއަށް ދަނީ އިދިކޮޅުގެ ޕާލަމެންޓްރީ ގްރޫޕްގެ ލީޑަރު މަގާމުގައި އޭނާ ހުންނެވީތީ ބަދުނާމުކުރަން ކުރާ ކަންކަން ކަމަށެވެ. އޭނާއާ ހިޔާނާތަކާ ގުޅުވޭނެ ގޮތެއް ނޯންނާނެ ކަަމަށް ވިދާޅުވި އެވެ.
"އެ ހިޔާނާތުގައި ނޯންނާނެ ބައިވެރިވުމެއް، އަދި އެހެން ހިޔާނާތެއްގައި ވެސް ނުދެއްކޭނެ،" މަޖިލީހުގެ އޭދަފުށީ ދާއިރާގެ މެމްބަރު ސަލީމް ވިދާޅުވި އެވެ.
އޭނާ ވިދާޅުވި ގޮތުގައި ކުރީގެ ނައިބު ރައީސް އަހްމަދު އަދީބުގެ އަތުން ޑޮލަރު ގަންނަން ފައިސާދިނީ 2013ގެ ރިޔާސީ އިންތިހާބުގެ ކުރިންނެވެ. އޭރު އެއްފަހަރަކު 500،000 ޑޮލަރު އަދި އޭގެ ފަހުން 300،000 ޑޮލަރު ގަތުމަށް ފައިސާ ދެއްވި ކަމަށް ވިދާޅުވި އެވެ.
އެ މުއްދަތުގައި އަދީބު ހުންނެވީ ޓޫރިޒަމް މިނިސްޓަރުގެ މަގާމުގަ އެވެ.
"އެޑްވާންސްކޮށް އަޅުގަނޑު ފައިސާ ދިނީ، އަނބުރާދޭ ގޮތަށް އޭރު ޕީޕީއެމްގެ ހަރަކާތްތަކަށް ވެސް ފައިސާ ބޭނުންވެގެން އުޅުނީމަ،" ސަލީމް ވިދާޅުވި އެވެ.
މި ފައިސާ އަދީބާ ހަވާލުކުރި ހެކިން ވެސް އެބަތިބި ކަމަށާއި އެސެޓް ރިކަވަރީ ކޮމިޝަނަށް ވެސް އެކަން އެންގެވި ކަމަށް ވިދާޅުވި އެވެ. ހިޔާނާތުގައި އޭނާ ބައިވެރިވި ކަމަށް ދެއްކޭނެ ހެއްކެއް ނޯންނާނެ ކަމަށް ސަލީމް ވިދާޅުވި އެވެ.
ސަލީމްގެ އިތުރުން ވެސް ބައެއް ބޭފުޅުން ތަހުގީގަށް ރިޔާސީ ކޮމިޝަނަށް ހާޒިރުކުރި އެވެ. އޭގެތޭރޭގައި ހިޔާނާތުން މަންފާވި ކަމަށް ތުހުމަތުކުރާ ރައްޔިތުންގެ މަޖިލީހުގެ ކުރީގެ މެމްބަރުން ހިމެނިވަޑައިގަންނަ އެވެ.
ފުލުހުންނާއި އޭސީސީ އާއި އެސެޓް ރިކަވަރީ ކޮމިޝަނުން އޮކްޓޯބަރު، 24، 2019 ގައި ބޭއްވި ނިއުސް ކޮންފަރެންސްގައި، ކުރީގެ ނައިބު ރައީސް އަހްމަދު އަދީބު އިސްވެ ހުންނަވައި އެމްއެމްޕީއާރުސީގެ ޖަރީމާ ހިންގި ގޮތާއި ފައިސާ ބައި އެޅި ގޮތާއި މަންފާ ލިބުނު މީހުންގެ އާ މައުލޫމާތާއި ހެކިތައް ވެސް ތަހުގީގަށް ލިބިފައިވާ ކަމަށް ބުނެ 267 މީހުންގެ ލިސްޓެއް އޮތް ކަން ހާމަކުރި އެވެ. އޭގެތެރެއިން އެންމެ އިސްކަންދީގެން ބަލަން ޖެހޭ މައްސަލަތަކުގެ ތަރުތީބެއް އެކުލަވާލާފައިވާ ކަމަށް ތަހުގީގީ އިދާރާތަކުން ބުންޏެވެ.
ތަހުގީގީ އިދާރާތަކުގެ ލިސްޓުގައި މަޖިލީހުގެ ކުރީގެ 44 މެމްބަރުންނާއި މިހާރުގެ 16 މެމްބަރުންނާއި ސަރުކާރުގައި މިހާރު ވެސް ހިމެނޭ ހަތް ބޭފުޅުންނާއި ކުރީގެ ސަރުކާރުގެ އިސް މަގާމްތަކުގައި ތިއްބެވި 30 ބޭފުޅުންނާއި މިނިވަން މުއައްސަސާތަކުގައި ކުރިން އުޅުއްވި ފަސް މެމްބަރުންނާއި ފަސް ފަނޑިޔާރުންގެ އިތުރުން ސަލާމަތީ ހިދުމަތްތަކާ ބެހޭ ހަތް އޮފިސަރުން ހިމެނިވަޑައިގަންނަވަ އެވެ.
ހިޔާނާތުގެ ތަހުގީގު ލަސްވެފައިވާ މައްސަލައިގައި ރައްޔިތުންގެ މަޖިލީހުން މީގެ ހަފުތާއެއްހާ ދުވަސް ކުރިން ވަނީ ކަންބޮޑުވުންފާޅުކޮށްފަ އެވެ. ހިޔާނާތުން މަންފާވި ލިސްޓު ހޯދަން ވެސް ތަހުގީގީ އިދާރާތަކުގައި ވަނީ އެދިފަ އެވެ.
