ދިވެހިރާއްޖޭގައި ކޮވިޑް-19 ފެތުރޭ މިންވަރު ހައްދުން ނައްޓާފައި އޮއްވާ ވެސް ހެލްތު ޕްރޮޓެކްޝަން އެޖެންސީގެ އެންގުންތަކާ ހިލާފަށް އުޅުމަށް ބާރު އަޅައި، ފިތުނަ އުފައްދާ އިލްމުވެރިންނާ ދެކޮޅަށް ފިޔަވަޅު އަޅާނެ ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު މިއަދު ވިދާޅުވެއްޖެ އެވެ.
މިނިސްޓަރު އެ އިޝާރާތްކުރެއްވީ، މިސްކިތުގައި ސަފުހަދާއިރު، ކޮވިޑުން ރައްކާތެރިވުމަށްޓަކައި ގައިދުރުކުރަން އެޗްޕީއޭ އިން އެންގުމުން އެކަމާ ދެކޮޅަށް ބައެއް އިލްމުވެރިން ދައްކާ ވާހަކަތަކަށެވެ. މިނިސްޓަރު ޒާހިރު "އަދަދު" އަށް ދެއްވި އިންޓަވިއުއެއްގައި ވިދާޅުވީ ކޮވިޑް-19 އާ ގުޅިގެން ދީނީ ކަންކަމުގައި ފިޔަވަޅު އަޅާފައި ވާނީ ޑޮކްޓަރުން އަދި ރާއްޖޭގެ އިލްމުވެރިންގެ ވެސް މަޝްވަރާގެ މަތިން ކަމަށެވެ.
"ގައިދުރުކުރުމަށް އަޅުގަނޑުމެން މި ނިންމަނީ ދުނިޔޭގެ ފަތުވާ ދޭ މުއައްސަސާތަކުން ވެސް ދެއްވާފައިވާ ހުންނަ ފަތުވާ އާއި ރާއްޖޭގައި ތިއްބަވާ އިލްމުވެރިންނާ ވެސް މަޝްވަރާކޮށްފައި. މިއީ ހާލަތަށް ރިއާޔަތް ކޮށްފަ އަޅުގަނޑުމެން ކަނޑައަޅާ ކަނޑައެޅުމެއް،" މިނިސްޓަރު ވިދާޅުވި އެވެ.
މީގެ ކުރިން ވެސް ހާލަތު ގޯސްވުމުން މިސްކިތްތަކުގައި ގައިދުރުކޮށްގެން ނަމާދުކުރަން އެންގި އެވެ. ފަހުން ލުއި ދިނުމަށް ފަހު އަލުން އެގޮތަށް އަމަލުކުރަން އެންގީ ހާލަތު އަނެއްކާ ގޯސްވުމުންނެވެ. އެގޮތުން އިއްޔެ ރާއްޖޭން ރެކޯޑު އަދަދަކަށް 601 މީހަކު ވަނީ ކޮވިޑަށް ޕޮޒިޓިވްވެފަ އެވެ. ބަލިން ބޮޑުވަރުވެފައިވާ 181 މީހަކަށް މިވަގުތު ފަރުވާ ދެނީ އެނދުމަތިކޮށްގެނެވެ. އަދި ބައްޔާއެކު 6500 އަށް ވުރެ ގިނަ މީހުން ރާއްޖޭގައި އުޅެމުންދާއިރު 74 މީހަކު މި ބަލިޖެހިގެން ވަނީ މަރުވެފަ އެވެ.
ޑރ. ޒާހިރު ވިދާޅުވީ އެއްވެސް އިލްމުވެރިއަކު ދިވެހިރާއްޖޭގައި ފިތުނަ އުފެދޭ ގޮތަށް ވާހަކަ ދައްކައިގެން ނުވާނެ ކަމަށާއި އެގޮތަށް އުޅޭ ބައެއް މީހުން ހާޒިރުކޮށް އެމީހުންނަށް މިހާރު ވެސް އިސްލާމިކް މިނިސްޓްރީގެ ފަރާތުން ނަސޭހަތްދީފައި ވާނެ ކަމަށެވެ.
"ބައެއް އިލްމުވެރިން ހާޒިރުކޮށް އެކަންތައްތައް އެގޮތަށް ނުކުރުމަށް އަޅުގަނޑުމެން ނަސޭހަތްދީފަ ވާނީ. މިފަހަރު ވެސް އެގޮތަށް ތަކުރާރުވާ ނަމަ ގެނެސް ވާހަކަ ދައްކާނަން. އޭރުން އެ އޮތީ ފިޔަވަޅު އެޅުމުގެ މަރުހަލާތަކެއް،" މިނިސްޓަރު ވިދާޅުވި އެވެ. "ފިތުނަ އުފެދޭ ގޮތަށް ވާހަކަ ދައްކައިގެން ނުވާނެ."
ރައްޔިތުންގެ މެދުގައި ފިތުނަ އުފައްދާ އިލްމުވެރިންނަށް ފިޔަވަޅު އަޅާނީ ދީނީ އެއްބައިވަންތަކަން ހިމާޔަތް ކުރުމުގެ ގާނޫނުގެ ދަށުން ކަމަށް މިނިސްޓަރު ވިދާޅުވި އެވެ.
"ރަސޫލާ ސ.އ.ވ ގެ ސުންނަތާ ހިލާފުވަނީ ކަމަށް އެބޭފުޅުން ބުނަނީ. އެކަމަކު އެއީ ހަގީގަތުގައި ރަނގަޅު ވާހަކައެއް ނޫން. އެކަންތައް އެގޮތަށް އަޅުގަނޑުމެން ކުރަމުންދާއިރު ބައެއް އިލްމުވެރިން އެޗްޕީއޭގެ ގަވާއިދުތަކާ އެއްގޮތަށް ނުއުޅުމަށް ވާހަކަ ދައްކައި ފިތުނަ އުފެދޭ ގޮތަށް ވާހަކަ ދައްކަމުން ދަނީ. އެކަންކަން ކުރުން ދީނީ އިލްމުވެރިންނަށް ވެސް މަނާ ގާނޫނުގެ ދަށުން. އެހެންކަމުން އެގޮތަށް ކަންތައް ކުރާ މީހުންނަށް އޮންނަ އުސޫލުން ފިޔަވަޅު އަޅާނަން،" ޑރ. ޒާހިރު ވިދާޅުވި އެވެ.
ޑރ. މުހައްމަދު އިޔާޒް:
މި ނޫހަށް އެނގިފައިވާ ގޮތުގައި މިނިސްޓްރީގެ ފަރާތުން ނަސޭހަތް ދިން މީހުންގެ ތެރޭގައި މޯލްޑިވްސް ނެޝަނަލް ޔުނިވާސިޓީގެ އެސިސްޓަންޓު ޕްރޮފެސަރު ޑރ. މުހައްމަދު އިޔާޒު ހިމެނެ އެވެ. ސަފު ހަދާއިރު ގައިދުރުކުރުން ބެހެއްޓުން ހަރާމް ކަމަށް ބުނެ ޑރ. އިޔާޒް ދަނީ އާންމުންނަށް ނަސޭހަތް ދެމުންނެވެ. އެގޮތަށް ވާހަކަ ދައްކާތީވެ އޭނާ ވަނީ މީގެ ކުރިން އެމްއެންޔޫ އިން ސަސްޕެންޑު ވެސް ކޮށްފަ އެވެ.
"ބިރަކާ ނުލައި މަޖާ ކުރަން ރަށް ރަށަށް ގޮސް، މުޑުދާރު ވައްތަރުތައް ޖައްސާފައި، ބަލި ބޮޑުވީމަ އަޅާ ބޭސް ގަނޑަކަށް މިސްކިތުގެ ސަފުތަކާ ކުޅެން ނުހައްދަވާ،" ބަލި ކޮންޓްރޯލް ކުރުމަށް ފިޔަވަޅު އަޅާ ވާހަކަ ދައްކަން ފެށުމުން އިޔާޒު ޓުވިޓަރުގައި ލިޔެފައިވެ އެވެ.
ކޮވިޑް-19 ގެ ބަލިމަޑުކަމުގެ ތެރޭގައި މިސްކިތުގެ ސަފު ހަދާއިރު ގައިދުރުކުރުން ބެހެއްޓުމަކީ މައްސަލައެއް ނޫން ކަމަށް އިސްލާމީ ފަތުވާ ދޭ އެންމެ މަތީ މަޖިލީހުން މިދިޔަ މާޗު މަހު ވަނީ ބުނެފަ އެވެ. ކޮވިޑުގެ ހާލަތު ގޯސްވެފައިވާ ހުރިހާ ގައުމުތަކެއްގައި ވެސް މިސްކިތުގައި ސަފު ހަދަނީ ގައިދުރުކޮށްގެނެވެ. ސައޫދީ އަރަބިއްޔާގެ މައްކާގައި ހުންނަ ﷲ ގެ ގެފުޅުގައި ވެސް ނަމާދު ކުރަމުންދަނީ ގައިދުރުކޮށްގެނެވެ.
