އިންޓަނެޓުގެ އަގު ހެޔޮ ކުރަން މަޝްވަރާތައް ކުރަމުން އައި ނަމަވެސް އަގުތަކަށް ގެންނާނެ ބަދަލު އަދި ފައިނަލް ނުވާ ކަމަށް އިކޮނޮމިކް މިނިސްޓަރު ފައްޔާޒް އިސްމާއިލް ރޭ ވިދާޅުވެއްޖެ އެވެ.
ސަރުކާރުން ހުށަހަޅާފައިވާ ގޮތަށް ޖުލައި 1 އިން ފެށިގެން އިންޓަނެޓްގެ އަގު ހެޔޮ ކުރަން ނިންމާފައިވާ ކަމަށް ބުނެ މީޑިއާގައި ދައުރުކުރި ވާހަކަތަކާ ގުޅިގެން މިނިސްޓަރު ފައްޔާޒު "އަދަދު"އަށް ވިދާޅުވީ، "ދައުރު ވަމުން ދަނީ މުޅިން ރަނގަޅު މައުލޫމާތެއް ނޫން" ކަމަށެވެ.
އިންޓަނެޓުގެ އަގު ގަބޫލުކުރެވޭ މިންވަރަކަށް ގެނައުމާ އަދި އިންޓަނެޓުގެ ހިދުމަތަށް އިންވެސްޓްކުރާ ފަރާތްތައް ވެސް ރާއްޖޭގައި އިންވެސްޓްމަންޓުގެ ޔަގީންކަން ލިބޭ ގޮތަކަށް ހައްލު ހޯދުމުގެ މަސައްކަތް ކުރެވެމުންދާތާ ދެ މަސް. ރަނގަޅު ބަދަލު އަންނާނެ. އަދި ވަކި ގޮތަކަށް ނުނިމޭ. -- ފައްޔާޒް
ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ޖަމާލުގެ އިތުބާރު ނެތް ކަމަށް މާޗު 1 ގައި ރައްޔިތުންގެ މަޖިލީހުން ފާސްކޮށް މަގާމުން ދުރުކުރުމާ އެކު އެ މިނިސްޓްރީ ހިންގެވުމާ ހަވާލުވެ ހުންނެވި ފައްޔާޒު ވިދާޅުވީ އިންޓަނެޓްގެ އަގު ހެޔޮކުރާ މިންވަރު ފައިނަލްކުރާނެ ކަމަށެވެ.
"މަޝްވަރާތައް ކުރިއަށް ގޮސް ވަރަށް އަވަހަށް ނިންމާނެ. މިރޭ (ހޮނިހިރު ދުވަހުގެ ރޭ) ޓެކް އިންޓަސްޓްރީގެ ބޭފުޅުންނާއެކު އިތުރަށް މަޝްވަރާކުރެވުނު. މިހާރު ސަރުކާރުން ވިސްނަމުންދާ ބަދަލުތަކާ ގުޅޭ ގޮތުން އެ ބޭފުޅުން ދެކޭ ގޮތް ވެސް ވަރަށް ރަނގަޅު،" ފައްޔާޒު ވިދާޅުވި އެވެ.
ރިޔާސީ ވައުދެއް، ޝަކުވާ ބޮޑުވެފައި
އިންޓަނެޓްގެ އަގު ހެޔޮކުރުމަކީ 2018 ވަނަ އަހަރު ވެރިކަމަށް ވަޑައިގެންނެވި ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ. ވިޔަފާރި އާއި އާންމު ދިރިއުޅުމުގެ ގިނަ ކަންތައްތަކާއި މުނިފޫހިފިލުވުން ވެސް އިންޓަނެޓާ ގުޅިލާމެހިފައި ވާއިރު، ރިޔާސީ ވައުދާ އެއްގޮތަށް އިންޓަނެޓްގެ އަގުތައް ހެޔޮކުރުން ލަސްވަމުންދާތީ ވަރަށް ބޮޑަށް ފާޑުކިޔުން ވަނީ އަމާޒުވެފަ އެވެ. އިންޓަނެޓްގެ އަގު ހެޔޮ ކުރާނެ ގޮތަކާއި މިންވަރެއް އަދި އަގު ހެޔޮ ރޭޓް ތަންފީޒުކުރަން ފަށާނެ ދުވަހެއް ވެސް ރަސްމީކޮށް އިއުލާނެއް ނުކުރެ އެވެ.
ފެބްރުއަރީ 10 ގައި ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސްގެ ތަރުޖަމާނު މަބްރޫކް އަބްދުލް އަޒީޒް ވިދާޅުވީ ދުރު ރާސްތާ ވިސްނުމުގެ ތެރެއިން އިންޓަނެޓްގެ އަގު ހެޔޮ ކުރެވޭނެ ކަަމަށެވެ. އެކަމުގެ ތަފުސީލެއް ނުދެއްވަ އެވެ.
ސަރުކާރުން އަގަށް ބަދަލު ގެންނަން ހުށަހަޅާ ގޮތް
- 5 އެމްބީޕީއެސްގެ ސްޕީޑްގައި މަހަކު 250ރ. އަށް 30 ޖީބީ
- 15 އެމްބީޕީއެސްގެ ސްޕީޑްގައި މަހަކު 500ރ. އަށް 100 ޖީބީ
- 25 އެމްބީޕީއެސްގެ ސްޕީޑްގައި މަހަކު 750ރ. އަށް 200 ޖީބީ
މިއީ ފިކްސް ބްރޯޑްބޭންޑަށް ހުށަހަޅާފައިވާ އަގުތަކެވެ. މި ބަދަލު ގެނައުމުން ގޭގޭގަ އާއި ވިޔަފާރިތަކުގައި ބޭނުންކުރާ އިންޓަނެޓްގެ އަގު ވަރަށް ބޮޑަށް ހެޔޮވެގެންދާނެ އެވެ. ޑޭޓާ ހުސްވުމުން، މިހާރު އިންޓަނެޓް އެއްކޮށް ކެނޑު ނަމަވެސް، އާ ބަދަލު ތަންފީޒުކުރަން ފެށުމާއެކު ގޭގޭގައި ހުންނަ ފިކްސް ބްރޯޑްބޭންޑްގެ ހިދުމަތް މުޅިން ކެނޑިގެން ދިއުމުގެ ބަދަލުގައި ސްޕީޑް ދަށްކޮށްލަ އެވެ. އެގޮތުން 250ރ. ގެ ޕެކޭޖަށް ހުށަހަޅާފައިވާ ޑޭޓާ ހުސްވި ނަމަވެސް، އިންޓަނެޓްގެ ސްޕީޑް ދަށްވާނީ 2 އެމްބީޕީއެސް އަށެވެ. އަލަށް ހުށަހަޅާފައިވާ އެހެން ޕެކޭޖްގެތަކުގެ ޑޭޓާ ހުސްވުމުން ސްޕީޑް ދަށް ވާނީ 5 އެމްބީޕީއެސްއަށެވެ.
އިންޓަނެޓްގެ ހިދުމަތް ފޯރުކޮށްދޭ އެންމެ ބޮޑު ދެ ކުންފުނި ކަމުގައިވާ އުރޫދީ މޯލްޑިވްސްގެ ޕެކޭޖާއި ދިރާގުގެ ޕެކޭޖުގެ އަގުތަކަށް ބަލާއިރު، މަޝްވަރާގެ މޭޒުގައި މިހާރު އޮތް ސަރުކާރުގެ ހުށަހެޅުމުގައި ހިމެނޭ އިންޓަނެޓްގެ އަގުތައް ވަރަށް ބޮޑުތަން ކުޑަ އެވެ.
