ދިރާގާއި ވަށްމާފުށި ގުޅިގެން ކުރިއަށްގެންދާ ހާއްސަ ޒިޕްލައިން އެޑްވެންޗަރ ގިވްއަވޭގައި ބައިވެރިވުމުގެ ފުރުސަތު މިއަދުގެ ނިޔަލަށް ހަމަވާނެ އެވެ.
މި ހަރަކާތަކީ ރާއްޖޭގެ ފުރަތަމަ ޒިޕްލައިން ތަޖުރިބާކޮށްލުމުގެ ފުރުސަތު އާންމުންނަށް ހުޅުވައިލުމުގެ ގޮތުން ސޯޝަލް މީޑިއާގައި ކުރިއަށްގެންދާ ވަރަށް ހާއްސަ ހަރަކާތެކެވެ.
މި ގިވްއަވޭގެ ދަށުން ގުރުއަތުން ހޮވޭ ތިން ނަސީބުވެރިއަކަށް ވަށްމާފުށީގެ ޒިޕްލައިން އެޑްވެންޗަރ މުޅިން ހިލޭ ތަޖުރިބާކުރުމުގެ ފުރުސަތު ލިބިގެންދާނެ އެވެ. މި އިނާމު ލިބޭ ކޮންމެ ނަސީބުވެރިއަކަށް، އިތުރު އެކަކާއެކު ޖުމްލަ ދެ މީހަކަށް މި ހިތްގައިމު ކުޅިވަރުގައި ބައިވެރިވެވޭނެ އެވެ. މިއީ ރާއްޖޭގެ ގުދުރަތީ ރީތިކަން މަތިން ބަލައިލަމުން، ފޯރިގަދަ ތަޖުރިބާއެއް ކޮށްލުމަށް ލިބޭ ރަނގަޅު ފުރުސަތެކެވެ.
މި ގިވްއަވޭގައި ބައިވެރިވުމަށް ބޭނުންވާ ފަރާތްތަކުން ފުރިހަމަކުރަންޖެހޭ ވަކި ކަންތައްތަކެއް ދިރާގުން ވަނީ ކަނޑައަޅައިފަ އެވެ. އެގޮތުން، އިންސްޓަގްރާމް މެދުވެރިކޮށް ދިރާގާއި، ޒިޕްލައިން އެމްވީ އަދި ވިޒިޓް މާފުށީގެ ރަސްމީ އެކައުންޓްތައް ފޮލޯކުރަން ޖެހެ އެވެ. މީގެ އިތުރުން، ގިވްއަވޭއަށް ހާއްސަކޮށްފައިވާ ވީޑިއޯ ޕޯސްޓްގެ ކޮމެންޓް ސެކްޝަނުގައި ތިން ރައްޓެހިން ޓެގްކުރުމަށް ފަހު، އެ ޕޯސްޓް އަމިއްލަ އިންސްޓަގްރާމް ސްޓޯރީގައި ޝެއަރކޮށް ދިރާގާއި ޒިޕްލައިން އެމްވީ ޓެގްކުރަން ޖެހޭނެ އެވެ. މި ހުރިހާ ޝަރުތުތަކެއް ފުރިހަމަކުރުމުގެ އެންމެ ފަހު ވަގުތަކީ މިއަދު، ތިރީސް އެކެއް މޭ ދެހާސް ސައްބީސްގެ ނިޔަލަށެވެ.
ދިރާގުން ދާދި ފަހުން ވަނީ އެ ކުންފުނީގެ އެލީޓް ކްލަބްގެ އައު ޕާޓްނަރެއްގެ ގޮތުގައި ވަށްމާފުށި ރަސްމީކޮށް ހަމަޖައްސައިފަ އެވެ. މި ޕާޓްނަރޝިޕްގެ ދަށުން ދިރާގުގެ އެލީޓް މެންބަރުންނަށް ވަށްމާފުށީގެ ހިދުމަތްތަކުން ހާއްސަ ޑިސްކައުންޓްތަކެއް ލިބިގެންދާނެ އެވެ. އެގޮތުން އެލީޓް މެންބަރުންނަށް ފަސް އިންސައްތައިގެ ޑިސްކައުންޓެއް ލިބޭއިރު، އެލީޓް ޕްލެޓިނަމް މެންބަރުންނަށް ޒިޕްލައިން އެޑްވެންޗަރއިން ދިހަ އިންސައްތައިގެ ޑިސްކައުންޓެއް ލިބޭނެ އެވެ. މި ޑިސްކައުންޓްތައް ބޭނުންކުރުމަށްޓަކައި ބުކިންގް ހަދާއިރު ދިރާގު އެޕް މެދުވެރިކޮށް އެލީޓް ޑިޖިޓަލް ކާޑު ދައްކާލުމުން ފަސޭހަކަމާއެކު މި ހިދުމަތް ހޯދޭނެ އެވެ.
ދިރާގު އެލީޓް ކްލަބަކީ އެ ކުންފުނީގެ ވަފާތެރި ކަސްޓަމަރުންގެ އަގުވަޒަންކުރުމުގެ ގޮތުން ތައާރަފުކޮށްފައިވާ ޕްރޮގްރާމެކެވެ. މި ޕްރޮގްރާމްގެ މައިގަނޑު މަގުސަދަކީ ކަސްޓަމަރުންނަށް އަގުހުރި ފުރުސަތުތަކާއި އޮފަރތައް ފޯރުކޮށްދީ، އެ ފަރާތްތަކުގެ ދިރިއުޅުމަށް އިތުރު ފުރިހަމަކަމެއް ގެނެސްދިނުމެވެ. ދިރާގުން ދަނީ އެލީޓް ކްލަބްގެ ޕާޓްނަރުންނާ ގުޅިގެން ކަސްޓަމަރުންނަށް މިފަދަ ގިނަ ފައިދާތަކާއި އައު ތަޖުރިބާތައް ހޯދައިދިނުމަށް މެދުކެނޑުމެއްނެތި މަސައްކަތް ކުރަމުންނެވެ.
