ދިރާސާ އާ އަހަރަށް ދާދި ފަހުން ގެނައި ބަދަލާއެކު ސްކޫލްތައް ޗުއްޓީއަށްދާ ދުވަސްތަކާ އެއްގޮތް ކުރަން ރައްޔިތުންގެ މަޖިލިސް ޗުއްޓީއަށްދާ ދުވަސްތަކަށް ބަދަލު ގެންނަން މިއަދު ފާސްކޮށްފި އެވެ.
މަޖިލީހުގެ ގަވައިދުގައި ބުނާ ގޮތުން މަޖިލީހުގެ ޖަލްސާތައް އަހަރެއްގެ ތެރޭގައި ބެހިގެންދާނީ ތިން ދައުރަކަށެވެ.
އެގޮތުން، ފުރަތަމަ ދައުރު ފެބުރުއަރީ މަހުގެ ފުރަތަަމަ ދުވަހުން ފެށީގެން އެޕްރީލް މަހުގެ ނިޔަލަށް ހިނގާއިރު ދެވަނަ ދައުރު ހިނގާނީ ޖޫން މަހުގެ ފުރަތަމަ ދުވަހުން ފެށިގެން އޯގަސްޓް މަހުގެ ނިޔަލަށެވެ.
އަދި ތިންވަނަ ދައުރު ހިނގާނީ އޮކްޓޯބަރު މަހުގެ ފުރަތަމަ ދުވަހުން ފެށިގެން ނޮވެމްބަރު މަހުގެ ނިޔަލަށެވެ.
ނަމަވެސް، ދިރާސީ އާ އަހަރުގެ ކިޔެވުން ފެށުން ކޮންމެ އަހަރެއްގެ އޯގަސްޓު މަހަށް އެޑިޔުކޭޝަން މިނިސްޓްރީން ބަދަލު ކުރުމާ ގުޅިގެން، މަޖިލީހުގެ ޗުއްޓީއާ ދިރާސީ އާ އަހަރުގެ ޗުއްޓީއާ ދިމާކުރުމަށް މަޖިލީހުގެ އާއްމު ކޮމިޓީން ވަނީ މަޖިލީހުގެ ގަވައިދު އިސްލާހުކޮށްފަ އެވެ.
މިގޮތުން، ކޮމިޓީން ބަދަލުގެނެސްފައި ވަނީ މަޖިލީހުގެ ދެވަނަ ދައުރާއި ތިންވަނަ ދައުރު ހިނގާ ދުވަސްތަކަށެވެ.
އެ އިސްލާހުގައި ވާގޮތުން މަޖިލީހުގެ ދެވަނަ ދައުރު ދެން ހިނގާނީ މޭ މަހުގެ 17 ވަނަ ދުވަހުން ފެށިގެން ޖޫން މަހުގެ ނިޔަލަށެވެ.
އަދި ތިންވަނަ ދައުރު ހިނގާނީ އޯގަސްޓު މަހުގެ 16 ވަނަ ދުވަހުން ފެށިގެން ނޮވެމްބަރު މަހުގެ ނިޔަލަށް ކަމަށް ކޮމިޓީން ގެނައި އިސްލާހުގައި ބުނެފައިވެ އެވެ.
އާއްމު ކޮމިޓީން ގެނައި އިސްލާހާ ގުޅޭގޮތުން ވާހަކަ ދެއްކެވި މެމްބަރުން މިއަދު މަޖިލީހުގެ ވިދާޅުވީ މަޖިލީހުގެ ގަވައިދު މިހާރު އޮތްގޮތުން ދިރާސީ އަހަރުގެ ކިޔެވުން ނިމިގެން ދަރިވަރުންނަށް ލިބޭ ޗުއްޓީ ދިމާވަނީ މަޖިލީހުގެ ދެވަނަ ދައުރުގެ މެދުތެރެއާ ކަމަށެވެ.
އަދި އެކަމުގެ ސަބަބުން ދަތިތައް ކުރިމަތިވަނީ ހަމައެކަނި މަޖިލީހުގެ 87 މެމްބަރުންނަށް ނޫން ކަމަށާއި، އެކަމުގެ އުނދަގޫ މަޖިލީހުގައި މަސައްކަތްކުރާ ހުރިހާ މުވައްޒަފުންނަށް ވެސް ކުރިމަތިވާނެ ކަމަށެވެ.
އެހެންކަމުން، ކޮމިޓީން ގެނައި އިސްލާހު މިއަދުގެ ޖަލްސާގައި ފާސްކޮށްފައިވަނީ އެކަމަށް ނެގުނު ވޯޓުގައި ބައިވެރިވެވަޑައިގެންނެވި 69 މެމްބަރުންގެ އިއްތިފާގުންނެވެ.
