ލޯކަލް ޓޫރިޒަމުގައި ރަސްކަން ކުރަމުން އަންނަ ކ. މާފުށީގައި ރާއްޖޭގެ އެންމެ އުސް ހޮޓާ، "އައިކޮމް ގްރޭންޑް ހޮޓެލް" ހުޅުވަން ތައްޔާރުވެއްޖެ އެވެ.
ބާރަ ފަންގިފިލާއަށް ހަދާފައިވާ މި ހޮޓަލުގައި ބިމު އަޑިން ހަދާފައިވާ ބިންގަރާހެއް ވެސް ހުރެ އެވެ. ބިމު އަޑިއަށް ހަދާފައި ހުންނަ ބައި ހިމަނައިގެން މި 13 ބުރީގެ ހޮޓަލުގެ މަސައްކަތް ނިމުމުން ވެގެން ދާނީ މާލޭން ބޭރުގައި ހުރި އެންމެ އުސް އިމާރާތަށެވެ.
ހޮޓެލް މުޅިން ތަފާތު، ވަށައިގެން ހުސް ބިއްލޫރި
މި ހޮޓަލަކީ މާފުށީގައި ފުޅާ ދާއިރާއެއްގައި ދަތުރުފަތުރާއި އިންޓަނެޓުގެ ހިދުމަތްދޭ "އައިކޮމް"ގެ ހޮޓެލެކެވެ.
މި ހޮޓެލު އަޅަން ހިޔާލު އައި ގޮތް ހިއްސާ ކުރައްވަމުން އައިކޮމްގެ ބާނީ އަލީ ރަމީޒު "އަދަދު"އަށް ވިދާޅުވީ ހޮޓެލު އަޅަން ނިންމީ ވިޔަފާރި ފުޅާކުރުމުގެ ބޭނުމުގައި ކަމަށެވެ.
"ބޭނުންވީ ހޮޓާ އެޅުމުގެ ޕްރޮޖެކްޓަކީ ވެސް ތަފާތު ޕްރޮޖެކްޓަކަށް ހަދަން،" ރަމީޒު ވިދާޅުވި އެވެ.
އައިކޮމް ގްރޭންޑް ހޮޓެލުގެ ކުރެހުމެއް
"މި ޕްރޮޖެކްޓުގެ އަޅުގަނޑުމެންނަށް ޑިޒައިން ހަދައިދިނީ ޔެޗް ޕްރައިވެޓް ލިމިޓެޑުން، ދެން އަޅުގަނޑުމެން ބޭނުންވާ ގޮތަށް ބެލްކަނީތައް ހަދާފައި ހުންނާނީ،" ހޮޓެލުގެ ތަފާތު ފަރުމާއާ ގުޅޭ ގޮތުން ރަޒީމު ވިދާޅުވި އެވެ.
ހޮޓެލުގެ ސްޓްރަކްޗާ ވަށައިގެން މައިގަނޑު ގޮތެއްގައި ބިއްލޫރި ބޭނުންކޮށްފައިވާއިރު، އެއީ އެތަނުގެ ކޮޓަރިތަކަށް ވިއު، ތަފާތުވެފައި ހިތްގައިމު ކުރުމުގެ ގޮތުންނެވެ.
ހޮޓެލުގައި ހުންނަ ފަސް ކެޓެގަރީގެ ރޫމްތަކުގެ ތެރޭގައި ސީވިއު ރޫމްތައް ހިމެނެ އެވެ.
ފުރަތަމަ ފަހަރަށް ގެސްޓްހައުސްއެއްގައި ސްމާޓް ރޫމްސް
މި ހޮޓެލުގައި 130 އެނދުގެ 50 ކޮޓަރި ހުރިއިރު، އެންމެ ތިރީ، ތިން ފްލޯގައި އެއްވެސް ކޮޓަރިއެއް ނުހުރެ އެވެ. އެންމެ ތިރީ ބޭސްމަންޓު ފްލޯގައި ހުންނަނީ ބަދިގެ އެވެ. އެއްވަނަ ބުރީގައި ލޮބީ އަދި ރިސެޕްޝަން އޭރިއާއަށް ހާއްސަކުރިއިރު، ދެ ވަނަ ބުރީގައި ހުންނަނީ ރެސްޓޯރަންޓަކާއި ސްޕާއެކެވެ. އެންމަ މަތީ ފްލޯގައި ހުންނަނީ 180 ޑިގްރީ ވިއުގެ އިންފިނިޓީ ޕޫލަކާއި 360 ޑިގްރީ ވިއުގެ ރޫފްޓޮޕް ރެސްޓޯރަންޓެކެވެ.
އައިކޮމް ގްރޭންޑްގެ ރޫފްޓޮޕް ރެސްޓޯރަންޓް އަދި އިންފިނިޓީ ޕޫލް ހުންނާނީ އެންމެ މަތީ ބުރީގައި
ހޮޓަލްގެ ކޮޓަރިތަކުގެ ތެރެއިން ދިހަ ކޮޓަރިއަކީ "ސްމާޓް ރޫމްސް" އެވެ. އެ ކޮޓަރިތައް ހުންނާނީ ގޫގްލް ހޯމް ނުވަތަ އެލެކްސާ ބޭނުން ކޮށްގެން "ވޮއިސް ކޮމާންޑްސް" އެކްޓިވޭޓްކޮށްފަ އެވެ. މިއީ ރާއްޖޭގައި މިފަދަ ފުރަތަމަ ކޮޓަރިތަކެވެ.
މި ހޮޓަލް ހިންގަނީ ކްލަބް ސްޓައިލަށް، ހޮޓަލުގެ ތެރެއިން ކެއިންބުއިމާއި މުނިފޫހިފިލުވުމުގެ ހިދުމަތްތައް ލިބޭ ގޮތަށެވެ.
35 މިލިއަން ރުފިޔާ އިންވެސްޓުމަންޓެއް، ފައިދާގެ ޔަގީންކަން އެބައޮތް
މި ހޮޓަލް އެޅުމުގެ މަސައްކަތް އައިކޮމުން ފެށީ 2019 ވަނަ އަހަރުގެ ފަހުކޮޅެވެ. އޭރު އަމާޒު ހިފީ މި އަހަރުގެ ފަހުކޮޅަށް ހުޅުވުމަށް ކަމަށްވީ ނަމަވެސް، ކޮވިޑުގެ ސަބަބުން ކޮންސްޓްރަކްޝަން ހުއްޓި މަސައްކަތް ލަސްވީ ކަމަށް ރަމީޒު މައުލޫމާތު ދެއްވި އެވެ.
މިހާތަނަށް މި ޕްރޮޖެކްޓަށް 10 މިލިއަން ރުފިޔާ ހޭދަކޮށްފައިވާއިރު، ފިނިޝިން މަސައްކަތާއެކު 35 މިލިއަން ރުފިޔާ ހޭދާ ވާނެ ކަމަށް ވަނީ ލަފާކޮށްފަ އެވެ.
މާފުށީގެ މަލަމަތި: އެންމެ ގިނަ ގެސްޓްހައުސް ހުންނަނީ މާފުށީގައި
މި ވަރުގަދަ ހޮޓެލް ކާމިޔާބުވެގެންދާނެ ކަމާއެކު ރަމީޒުގެ ޔަގީންކަން އެބަ އޮތެވެ. އޭނާގެ އެހާ ބޮޑު ޔަގީން ކަމެއް ހޯދީ މާފުއްޓަށެވެ.
"މޯލްޑިވްސް ނޭނގުނަސް ގެސްޓުންނަށް މިހާރު މާފުށި އެނގޭނެ،" ރަމީޒު ވިދާޅުވި އެވެ.
އޭނާ ވިދާޅުވި ގޮތުގައި، މިހާރު ހޮޓަލް ހުޅުވިޔަސް، 50 ޕަސެންޓާ ހަމައަށް އޮކިއުޕަންސީ ގެންދެވޭނެ އެވެ.
ރަމީޒު މިހާރު އުއްމީދުކޮށްގެން ހުރީ އަންނަ އަހަރުގެ ފަހުކޮޅަށް "އައިކޮމް ގްރޭންޑް ހޮޓެލް" ގެސްޓުންނަށް ހުޅުވާލެވޭނެ ކަަމަށެވެ.
