ކޮވިޑުގެ ސަބަބުން އިންޑިއާ އަށް ކުރިމަތިވެފައިވާ ހާލަތާ މެދު ކަންބޮޑުވާ ކަމަށާއި އެކަމުން އަރައިގަތުމަށް ބޮޑުވަޒީރު ނަރެންދުރަ މޯދީގެ ސަރުކާރުން ކުރަމުން ގެންދަވަނީ ހަރުދަނާ މަސައްކަތްތަކެއް ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ކޮވިޑުގެ ހާލަތު އިންޑިއާގެ އުތުރުގެ ސްޓޭޓްތަކުގައި، ހާއްސަކޮށް ވެރިރަށް ނިއު ދިއްލީގައި ވަނީ ކޮންޓްރޯލުން ނެއްޓިފަ އެވެ. އާ ވޭރިއެންޓެއް ފެތުރި އެތައް ބަޔަކު ބަލިވެ، ހޮސްޕިޓަލްތައް ފުރި އޮކްސިޖަނަށް ވަނީ ޖެހިފަ އެވެ. އެއާ އެކު އިންޑިއާގެ އިތުރުން ބައިނަލްއަގްވާމީ މުޖުތަމައުގެ ފާޑުކިޔުން މޯދީގެ ސަރުކާރަށް ވަނީ ވަރަށް ބޮޑަށް އަމާޒުވެފަ އެވެ.
ރައީސް ސޯލިހު މިއަދު މެންދުރުފަހު ކުރެއްވި ޓްވީޓެއްގައި ވިދާޅުވީ، ކޮވިޑް 19 ގެ އިތުރު ރާޅަކާ ހަނގުރާމަކުރަމުންދާ އަވަށްޓެރި އިންޑިއާއާ މެދު ދެރަވެ ކަންބޮޑުވާ ކަމަށެވެ. ދިވެހިރާއްޖޭން އިންޑިއާ ރައްޔިތުންނާ އެކު ތިބިކަން ހާމަކޮށް ރައީސް ވިދާޅުވީ، ހާލަތު ރަނގަޅުކުރަން ބޮޑުވަޒީރު މޯދީ އާއި އިންޑިއާގެ މުއައްސަސާތަކުން ކުރަމުން އަންނަ ހަރުދަނާ މަސައްކަތް ފާހަގަކުރައްވާ ކަމަށެވެ.
ގާތްގަނޑަކަށް 1.3 ބިލިއަން މީހުންގެ އާބާދީއެއް އޮންނަ އިންޑިއާގައި އިއްޔެއާ ހަމައަށް ޖުމްލަ 17.64 މިލިއަން މީހުން ކޮވިޑަށް ވަނީ ޕޮޒިޓިވްވެފަ އެވެ. އަދި 197،894 މީހުން ވަނީ މަރުވެފަ އެވެ. ނަމަވެސް ތަޖުރިބާކާރުން ދެކޭ ގޮތުގައި މަރުވި މީހުންގެ އަދަދު އެއަށް ވުރެ މާ މަތިވާނެ އެވެ.
