އެމްއެމްޕީއާރުސީ މެދުވެރިކޮށް ރާއްޖޭގެ ތާރީހުގައި ހިނގި އެންމެ ބޮޑު ހިޔާނާތުގައި ޝާމިލުވާ ދައުލަތުގެ އެކި މުއައްސަސާތަކުގައި އޭރާއި މިހާރު ތިބި މީހުންގެ ނަންތައް ހޯދަން ރައްޔިތުންގެ މަޖިލީހުން އިސްނަގައިފި އެވެ.
މިއަދުގެ ޖަލްސާ ފައްޓަވަމުން ރިޔާސަތުގައި އިންނެވި ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވީ ކުރީ ސަރުކާރުގައި އެމްއެމްޕީއާރުސީ މެދުވެރިކޮށް ހިންގި ހިޔާނާތުގައި ހިމެނޭ މީހުންގެ ތަފްސީލުތަކާއި އެ މައްސަލަ ގޮސްފައިވާ ހިސާބެއް ހޯދައި ދިނުމަށް ހެންވޭރު ހުޅަނގު ދާއިރާގެ އެމްޑީޕީ މެމްބަރު ހަސަން ލަތީފު ސިޓީއަކުން މިދިޔަ މާޗު މަހު ރިޔާސަތުގައި އެދިވަޑައިގެންފައިވާ ކަމަށެވެ.
އެ ސިޓީގައި ހަސަން ލަތީފު ލިސްޓު ކުރައްވާފައިވަނީ ޝަރުއީ ދާއިރާ އާއި ސަލާމަތީ ހިދުމަތްތަކާއި މިނިވަން މުއައްސަސާތަކާއި މަޖިލީހާއި ވަޒީރުންގެ މަޖިލީހުގެ ކުރީގެ އަދި މިހާރުގެ ބޭފުޅުންނެވެ.
ނަޝީދު ވިދާޅުވީ އެ ސިޓީ މަޖިލީހުގެ ސަލާމަތީ ހިދުމަތްތަކާގުޅޭ ކޮމިޓީއަށް ފޮނުއްވި ކަމަށެވެ.
އެ މައުލޫމާތު ހޯދަން އެންމެ އައުލާކަންބޮޑީ މަޖިލީހުގެ 241 ކޮމިޓީއަށް ކަމަށް ވިދާޅުވެ ކޮމިޓީގެ މުގައްރިރު ޖަވާބު ދެއްވާފައިވާ ކަމަށް ނަޝީދު ވިދާޅުވި އެވެ.
ހިޔާނާތާގުޅޭ ހަގީގަތަކީ ރައްޔިތުންގެ ނަޒަރު ހުއްޓިވާފައިވާ މައްސަލައަކަށްވާތީ، އެ މައުލޫމާތު ހޯދަން އިއްޔެ އެދިފައިވާނެކަމަށް ނަޝީދު ވިދާޅުވި އެވެ.
"އަޅުގަނޑު އެދިއްޖައިން ޕްރޮސެކިޔުޓާ ޖެނެރަލް އަރިހުގަ އާއި އެސެޓް ރިކަވަރީ ކޮމިޝަނާއި އަދި ފުލުހުންގެ ކިބައިން ހެންވޭރު ހުޅަނގު ދާއިރާގެ މެމްބަރު އެ އެދިވަޑައިގަންނަވާ މައުލޫމާތު ސާފުކޮށް ދިނުމަށް،" އެމަނިކުފާނު ހާމަކުރެއްވި އެވެ.
އެ މައުލޫމާތު ލިބުމުން މަޖިލީހުގެ މެމްބަރުންގެ އިތުރުން ރައްޔިތުންނާ ވެސް ހިއްސާކުރައްވާނެ ކަމުގެ ޔަގީންކަން ނަޝީދު މިއަދު ދެއްވި އެވެ.
އެމްއެމްޕީއާރުސީގެ ފައިސާ ލިބުނު މީހުންގެ އަދަދު 300 އަށް ވުރެ އިތުރުވެފައިވާކަމަށް ހިޔާނާތްބަލާ ރިޔާސީ ކޮމިޝަނުން ދާދި ފަހުން ބުނެފައިވެ އެވެ. އޭގެ ތެރޭގައި މިހާރުގެ ސަރުކާރުގައި ތިއްބެވި މިހާރު އަދި ކުރީގެ މަޖިލީހުގެ މެމްބަރުންތަކަކާއި އަދި މިހާރު ކޯޓުތަކުގައި ތިއްބެވި ފަނޑިޔާރުންތަކަކަށް ހިޔާނާތުގެ ފައިސާ ލިބިފައިވާ ކަމަށް ފުލުހުން މީގެ ކުރިން ވަނީ ބުނެފަ އެވެ.
އެކަމާ ގުޅިގެން ބޮޑު މައްސަލަތަކެއް ކޯޓަށް ވަރަށް އަވަހަށް ފޮނުވޭނެ ކަމަށް ރިޔާސީ ކޮމިޝަނުން އެންމެ ފަހުން ބުނެފައިވަނީ މިދިޔަ އޮކްޓޯބަރު މަހު އެވެ.
ނަމަވެސް، އޭގެ ފަހުން އެކަމާ ގުޅޭ އެއްވެސް ދައުވާއެއް އުފުލައިފައެއް ނުވެ އެވެ. އެ ހިޔާނާތާ ގުޅިގެން ދައުވާކޮށް އަދި މިހާތަނަށް ހުކުމެއް އިއްވާފައިވަނީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ އިތުރުން އެ ހިޔާނާތުގެ މޭސްތިރިކަމަށް ބުނާ ކުރީގެ ނައިބު ރައީސް އަހުމަދު އަދީބާއި އެމްއެމްޕީއާރުސީގެ ކުރީގެ އެމްޑީ އަބްދުﷲ ޒިޔަތަށެވެ.
ނަމަވެސް ތަހުގީގަށް މައުލޫމާތު ފޯރުކޮށްދޭން ދައުލަތުން އެއްބަސްވުންތަކެއް ހަދާފައިވާ ކަމަށް ތުހުމަތުކުރެވޭއިރު، އަދީބާއި ޒިޔަތު ވެސް މިހާރު ތިބީ ގޭބަންދަށް ބަދަލުކޮށްފަ އެވެ. އެކަމާ ގުޅިގެން އިދިކޮޅުން ދަނީ ސަރުކާރަށް ވަރަށް ބޮޑަށް ފާޑުކިޔަމުންނެވެ. އަދި ރިޔާސީ ކޮމިޝަނު ހެދީ ހަމައެކަނި ޔާމީނަށް ހުކުމްކޮށް ޖަލަށްލުމަށް ކަމަށް ވެސް އިދިކޮޅުން ތުހުމަތުކުރެ އެވެ.
