ދިރާގު ދިވެހި ޕްރިމިއާ ލީގުގެ ތާވަލު މި ވަގުތަށް ބަލާއިރު، ދަ ގްރާންޑޭ އޮތް މަގާމުގެ ގޮތުން އަދި އެ ޓީމަށް އެހާ ބޮޑު ޕްރެޝަރެއް އޮތް ކަމަށް ގަބޫލުނުކުރާ ކަމަށް އެ ޓީމުގެ ކޯޗު އިސްމާއިލް މަހަފޫޒް (އިންމަ) ބުނެފި އެވެ.
ލީގު ފަށައިގެން ރަނގަޅު ފޯމެއްގައި އޮތް ދަ ގްރާންޑޭ އެންމެ ފަހުން ކުޅުނު ތިން މެޗުން ވަނީ ބަލިވެފަ އެވެ. އެންމެ ފަހުން އެ ޓީމު މެޗަކުން މޮޅުވެފައިވަނީ ފަސް މެޗު ކުރިންނެވެ. ދަ ގްރާންޑޭ މި ވަގުތު އޮތީ 13 މެޗުން 16 ޕޮއިންޓާ އެކު ހަތަރެއްގަ އެވެ.
މިރޭ ސުޕަ ޔުނައިޓެޑް ސްޕޯޓްސް (ސަސް)އާ ދެކޮޅަށް ދަ ގްރާންޑޭގެ ކުޅޭ މެޗުގެ ކުރިން އޮތް އިއްޔެ ބޭއްވި ނޫސްވެރިންގެ ބައްދަލުވުމުގައި އިންމަ ބުނީ ބޮޑު އަމާޒަކީ ކުރެވެން ހުރި މަސައްކަތެއް ކޮށްގެން ވިޔަސް ސަސް ބަލިކޮށް މޮޅަކާ އެކު ދެ ވަނަ ބުރު ނިންމާލުން ކަމަށެވެ.
"ބްރޭކެއް އައުމުގެ ކުރިން ކުޅޭ އެންމެ ފަހު މެޗު މިއީ. އެހެންވީމަ އެގޮތަށް ވެސް ވަރަށް މުހިއްމު. އޭގެ އިތުރުން ދެ ވަނަ ބުރުގެ ކުޅުން ފައްޓައިގެން އެހާ ރަނގަޅު ނަތީޖާތަކެއް ނުނެރެވޭ. އެހެންވެ ރަނގަޅު ނަތީޖާއާ އެކު ދެ ވަނަ ބުރު ނިންމާލުން ވެސް ވަރަށް މުހިއްމު ކަމެއްގެ ގޮތުގައި ދެކެނީ. (އެހެންވެއްޖެނަމަ) ކުޅުންތެރިންނަށް ލިބޭ އިތުބާރާ އެއްޗެހި ބޮޑުވާނެ،" އިންމަ ބުންޏެވެ.
އިންމަ ވަނީ އެ ޓީމަށް މި ވަގުތު ވަކިން ބޮޑު ޕްރެޝަރެއް ނެތް ސަބަބު ކިޔައިދީފަ އެވެ.
"ސަބަބަކީ ޕާފޯމަންސް ރަނގަޅުވަމުން އަންނާތީ. ފުރަތަމަ ބުރުގައި ވެސް ފުދޭ ވަރަކަށް ޕޮއިންޓް ހޯދާފައިވާ ޓީމަކަށްވާތީ. މިހާރު މި އޮތް ޕޮޒިޝަނުން ޕްރެޝަރެއް ނެތް،" މާޒިޔާގެ ހެޑް ކޯޗުކަން ދެ ފަހަރު އަދި ގައުމީ ޓީމުގެ އެސިސްޓަންޓަކަށް މަސައްކަތްކުރި އިންމަ ބުންޏެވެ.
ދަ ގްރާންޑޭ އަށް މި ބުރު ދިމާވި އެއް ކަމަކީ ކުޅުންތެރިންނަށް މުސާރަ ނުދެވުމުގެ މައްސަލައިގެ ސަބަބުން ކުރިމަތިވި އެކި ކަންކަމެވެ. އިންމަ ވަނީ އެ ހުރި ކަންކަން ކުރިއަށް އޮތް މެޗުގެ ކުރިން ހައްލުވާނެ ކަމަށް ޓީމުގެ މެނޭޖްމަންޓުން ބުނެފައިވާ ކަމަށެވެ.
ސަސް ވެސް އެންމެ ފަހުން ކުޅުނު ތިން މެޗުން މޮޅެއް ނުލިބި އޮތްއިރު، އެންމެ ފަހުން ފަސް މެޗުގެ ތެރެއިން އެ ޓީމަށް ލިބިފައިވަނީ އެންމެ މޮޅެކެެވެ. އެއީ މުޅި މުބާރާތުގައި އެ ޓީމު ހޯދި ދެ ވަނަ މޮޅެެވެ. ލީގުގައި އެންމެ މަދުން މޮޅުވި ޓީމަކީ މިހާރު ސަސް އެވެ.
"އަޅުގަނޑު އިދިކޮޅު ޓީމުގެ އެ ލެވަލް އެ އޮތް ހިސާބަށް ނުވިސްނަން. އަޅުގަނޑު ގަބޫލުކުރަނީ އަޅުގަނޑުމެން ޓީމަށް މުހިއްމީ މިހާރު އޮތް ޕޮޒިޝަނުން އެހެން ޕޮޒިޝަނަކަށް (މަގާމަކަށް) ދިއުން،" އިންމަ ބުންޏެވެ.
ރޭ ޔުނައިޓެޑް ވިކްޓްރީން ވެލެންސިއާ ބަލިކުރުމުން ސަސް ވަނީ އެންމެ ފުލަށް ވެއްޓިފަ އެވެ. ގްރާންޑޭ އަތުން ބަލިނުވެ ފަރުޖައްސާލައިގެން ސަސް އަލުން ހަތް ވަނަ އަށް އަރާނެ އެވެ. މި ވަގުތު ސަސް އާއި ޔުނައިޓެޑް ވިކްޓްރީ އަށް ލިބިފައިވަނީ 12 ޕޮއިންޓެވެ.
ގްރާންޑޭ މޮޅުވެއްޖެނަމަ ތިން ވަނައިގައި އޮތް ގްރީން ސްޓްރީޓްސްއާ ޕޮއިންޓުގެ ގޮތުން ހަމަކުރެވޭނެ އެވެ. ސަސް އަތުން ބޮޑު ތަފާތަކުން މޮޅުވެގެން ގްރާންޑޭ އަށް ތިން ވަނަ އަށް އެރޭނެ އެވެ. ސަސް އާއި ގްރާންޑޭ ކުޅޭ މެޗު ފަށާނީ މިރޭ 22:00 ގަ އެވެ.
