ރާއްޖޭގައި ސިނޯފާމް ވެކްސިންގެ ފުރަތަމަ ޑޯޒު ޖެހި މީހަކަށް ދެ ވަނަ ޑޯޒުގެ ގޮތުގައި ކޮވިޝީލްޑް ވެކްސިން ދީފި އެވެ.
އޭނާގެ ވެކްސިން ކާޑު ސޯޝަލްމީޑިއާގައި އާއްމުވެ ކަންބޮޑުވުންފާޅުކުރަމުން ދަނިކޮށް، ހެލްތު އިމަޖެންސީ އޮޕަރޭޝަން ސެންޓަރުން (އެޗްއީއޯސީ)ން މިއަދު ވަނީ އެކަން ހިނގި ކަން ކަށަވަރުކޮށްދީފަ އެވެ.
އެމްއޭސީއެލްގައި މަސައްކަތް ކުރާ އެ މުވައްޒަފަށް ސިނޯފާމްގެ ފުރަތަމަ ޑޯޒު ޖެހީ މާޗް، 22 ގަ އެވެ. މި ވެކްސިންގެ ދެ ވަނަ ޑޯޒު ޖަހަން ޖެހެނީ ހަތަރު ހަފުތާ ފަހުންނެވެ. މުއްދަތު ހަމަވެ ދެ ވަނަ ޑޯޒު ޖަހަން ރޭ ހުޅުމާލެ ހޮސްޕިޓަލަށް ދިއުމުން އޭނާގެ ގަޔަށް ޖެހީ ރާއްޖޭގައި ގިނަ ބަޔަކަށް ދެމުން އަންނަ ކޮވިޝީލްޑުގެ ދެ ވަނަ ޑޯޒެވެ.
އެއެޗްއީއޯސީން ބޭއްވި ނޫސްވެރިންގެ ބައްދަލުވުމެއްގައި އެޗްޕީއޭގެ ޑިރެކްޓަރު އަހްމަދު ނާސިރު ވިދާޅުވީ ތަފާތު ދެ ވެކްސިނެއް ޖެހުނު މީހާގެ ކަންކަން ގާތުން ބަލަމުން އަންނަ ކަމަށެވެ. އެޗްޕީއޭ އިން މަސައްކަތް ކުރަމުން އަންނަނީ އެފަދަ ކަމެއް ތަކުރާރުވިޔަ ނުދޭން ކަމަށް ވިދާޅުވި އެވެ.
ސޯޝަލްމީޑިއާގައި އާއްމުވާ ވެކްސިން ކާޑު: އެޗްޕީއޭ އިން ބުނީ ދެ ވައްތަރުގެ ވެކްސިން ޖެހުނު މީހާގެ ހާލު ގާތުން ބަލަމުން އަންނަ ކަމަށް.
"މިކަން ވަރަށް ކައިރިން އަޅުގަނޑުމެން އެބަ ބަލަން، އުސޫލާ ހިލާފަށް ދިޔަ ކަމެއް،" ނާސިރު ވިދާޅުވި އެވެ.
މިކަމުގައި ޑަބްލިއުއެޗްއޯއާ ވެސް މަޝްވަރާކޮށްފައިވާ ކަމަށް އެޗްޕީއޭ އިން ބުންޏެވެ.
މިހާތަނަށް ހެދިފައިވާ ދިރާސާތަކަށް ބަލާއިރު ދެ ވައްތަރެއްގެ ވެކްސިން ޖެހުނަސް ގެއްލުމެއް ލިބޭކަން އެނގިފައި ނެތް ކަމަށް ނާސިރު ވިދާޅުވި އެވެ.
