ކ. މާފުށީގައި ކޮވިޑް-19 ފެތުރެމުންދިޔަ ނަމަވެސް ރަށުގެ ހާލަތު ގޯސް ނޫން ކަމަށް މާފުށީ ހެލްތު ސެންޓަރުގެ މެނޭޖަރު ސަލްމާން ރަޝީދު މިއަދު ވިދާޅުވެއްޖެ އެވެ.
މާފުށީގައި އާންމުންގެ ތެރޭގައި ކޮވިޑް-19 ފެތުރެން ފެށުމުން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ އެ ރަށަށް ދިވެހިން އަރައި ފޭބުން މަނާކޮށްފަ އެވެ. ނަމަވެސް ޓޫރިސްޓުންނަށް ރަށަށް އަރައި ފޭބުން މަނައެއް ނޫނެވެ.
މާފުށިން މިހާތަނަށް 15 މީހަކު ވަނީ ކޮވިޑް-19 އަށް ޕޮޒިޓިވްވެފަ އެވެ. ބަލިޖެހިފައި ވަނީ ރަށުގެ މީހުންނާއި ރަށުގައި މަސައްކަތް ކުރާ ރަށުން ބޭރު ބިދޭސީ ތިން މީހަކަށެވެ.
"މިހާރު އަޅުގަނޑުމެން މި ކުރަމުންދާ ކަމަކީ ސާމްޕަލް ނެގުމާއި ކޮންޓެކްޓް ޓްރޭސް ކުރުން. މިހާތަނަށް އަދި އެ މަސައްކަތް ދަނީ ރަނގަޅަށް،" ސަލްމާން ވިދާޅުވި އެވެ.
މާފުށި ހެލްތު ސެންޓަރުން ބުނީ ރަށު ތެރޭގައި ކޮންމެވެސް ވަރަކަށް ރޯގާގެ އަލާމާތްތައް ވެސް ފެންނަމުންދާ ކަމަށެވެ.
"ރަށު ތެރޭގައި ބައެއް މީހުން އެބަ އުޅޭ ރޯގާ ޖެހިގެން. ހެލްތު ސެންޓަރަށް އަންނަ އެންމެން އަޅުގަނޑުމެން ޓެސްޓު ކުރަމުން މި ދަނީ. އަދި އެހާ ހާލަތު ގޯހެއް ނޫން،" އޭނާ ވިދާޅުވި އެވެ.
މާފުށީގައި ބަލި ފެތުރެން ދިމާވި ސަބަބު ހޯދިފައެއް ނުވެ އެވެ. ބަލި ފެތުރުނީ އިންޑިއާއިން އައި ފަތުރުވެރިންތަކެއްގެ ގައިން ކަމަށް ބައެއް މީޑިއާތަކުގައި ބުނެފައިވެ އެވެ. ނަމަވެސް އެއީ ދޮގެއް ކަމަށް ހެލްތު ސެންޓަރުން ބުނެ އެވެ.
"ހުރިހާ ފަތުރުވެރިން ވެސް މި އަންނަނީ ނެގަޓިވް ރިސަލްޓެއް ލިބުނީމަ. އެހެންވީމަ ހަގީގަތުގައި ނޭނގޭ ބަލި ފެތުރެން ދިމާވި ސަބަބެއް،" ސަލްމާން ވިދާޅުވި އެވެ.
މިހާތަނަށް ރާއްޖޭގެ 26،600 ވުރެ ގިނަ މީހުންނަށް ވަނީ ކޮވިޑް-19 ޖެހިފަ އެވެ. އޭގެ ތެރެއިން 71 މީހަކު ވަނީ ބަލި ޖެހިގެން މަރުވެފަ އެވެ. މިހާތަނަށް 280،000 ވުރެ ގިނަ މީހުންނަށް ވަނީ ވެކްސިންގެ އެއް ޑޯޒު މަދުވެގެން ޖަހައިފަ އެވެ.
