މާލެ ސަރަހައްދުގައި ކާބޯތަކެތީގެ ހިދުމަތްދޭ ތަންތަން އިންސްޕެކްޓު ކުރުމުގެ ބޮޑު ހަރަކާތެއް ހިންގުމަށް މާލެ ސިޓީ ކައުންސިލުން މިއަދު ފާސްކޮށްފި އެވެ.
އެ ގޮތަށް ހުށަހެޅުއްވީ މައްޗަންގޮޅި މެދު ދާއިރާގެ ކައުންސިލަރު، ހައްވާ ޝިފާނާ އެވެ. އޭނާ ހުށަހެޅުއްވީ ފުލުހުންނާއި އެޗްޕީއޭ އަދި، އެ ނޫނަސް ކަމާ ގުޅުންހުރި އިދާރާތައް ގުޅިގެން އެ ހަރަކާތް ހިންގުމަށެވެ.
"އަޅުގަނޑު މިއަދު މި ހުށަހަޅާލަނީ މާލެ، ވިލިމާލެ އަދި ހުޅުމާލޭގައި ހިންގާ ކާބޯތަކެތީގެ ހިދުމަތްދޭ އެންމެހައި ތަންތަން އިންސްޕެކްޓު ކުރުމުގެ އެންމެހައި ތަންތަން އިންސްޕެކްޓު ކުރުމުގެ ބިޔަ ހަރަކާތެއް ހެލްތު ޕްރޮޓެކްޝަން އޭޖެންސީ އާއި ދިވެހި ފުލުހުންގެ ހިދުމަތާއި މޯލްޑިވްސް އިމިގްރޭޝަނާ ގުޅިގެން މާލެ ސިޓީ ކައުންސިލުން ހިންގުމަށް،" ޝިފާނާ ވިދާޅުވި އެވެ.
އޭނާގެ އެ ހުށަހެޅުން ފާސްކުރީ ވޯޓުގައި ބައިވެރިވި ހުރިހާ ކައުންސިލަރުންގެ ވޯޓުންނެވެ.
އެ ހުށަހެޅުން ތަޅުމަށް ހުށަހެޅުމުން މާލެ ސިޓީގެ މޭޔަރު، އާދަމް އާޒިމް ވިދާޅުވީ އެ ކައުންސިލުން މިހާރު ވެސް އެފަދަ ހަރަކާތެއް ހިންގަމުންދާ ކަމަށެވެ. އެހެންނަމަވެސް، އެހެން އިދާރާތަކާއި ގުޅިގެން ފުރިހަމަ ގޮތެއްގައި އެ ހަރަކާތް ކުރިއަށް ގެންދަން ފެނިވަޑައިގަންނަވާ ކަމަށް އާޒިމް ވިދާޅުވި އެވެ.
