ޒިއުރިކް (އޭޕްރީލް 22) - މި އަހަރުގެ ޔޫރޯ ފުޓްބޯޅަ މުބާރާތުގައި އިންސާފުކުރުމުގެ ފުރުސަތު ހޯދައި މަޝްހޫރު އަންހެން ރެފްރީ ސްޓެފަނީ ފްރަޕާޓް އިތުރު ރެކޯޑެއް ގާއިމްކޮށްފި އެވެ.
އޭނާ އަކީ ފިރިހެނުންގެ ޔޫރޯ ފުޓްބޯޅަ މުބާރާތެއްގައި ރެފްރީގެ ޒިންމާ ނަގާނެ ފުރަތަމަ އަންހެން ރެފްރީ އެވެ. އޭނާ އަކީ ޗެމްޕިއަންސް ލީގާއި ޔޫރޮޕާ ލީގާއި ވޯލްޑް ކަޕް ކޮލިފައިން (ޔޫރަޕް) އަދި ޔުރޯ ކޮލިފައިންގައި ރެފްރީކަން ކުރި ފުރަތަމަ އަންހެން ރެފްރީ އެވެ. އަދި މި އަހަރުގެ ކްލަބް ވޯލްޑް ކަޕް މެޗެއްގައި ރެފްރީކަން ކޮށް އެ މުބާރާތުގައި ފުރަތަމަ ރެފްރީކަން ކުރި އަންހެން ރެފްރީގެ ޝަރަފް ވެސް ހޯދި އެވެ.
ޔުއެފާ އިން އެންމެ ފުރަތަމަ ފިރިހެން މެޗަކަށް އަންހެން ރެފްރީ އަކު ހަމަޖެއްސީ 2004 ވަނަ އަހަރު އެވެ. އެ ގޮތުން ސްވިޒަލެންޑުގެ އަންހެން ރެފްރީ ނިކޯލް ޕެޓީނިޔާޓް ވަނީ 2004 އިން 2009 އަށް ޔުއެފާ ކަޕް (ޔޫރޮޕާ ލީގު)ގެ ތިން ކޮލިފައިން މެޗެއްގައި އިންސާފުކޮށްފަ އެވެ.
އޭގެ ފަހުން މެދުކެނޑުމަކަށް ފަހު އަންހެން ރެފްރީ އަކު ފިރިހެން މެޗެއްގައި އިންސާފުކުރީ 2017 ވަނަ އަހަރުގެ ސެޕްޓެމްބަރު މަހު ޖަރުމަނުގެ ފުރަތަމަ ޑިވިޝަނު މެޗެއްގަ އެވެ. ވާޑާ ބްރެމެން އާއި ހާތާ ބާލިން ކުޅުނު މެޗުގައި ރެފްރީކަން ކުރީ ޖަރުމަނުގެ އަންހެން ރެފްރީ ބިބިއާނާ ސްޓޭންހޯސް އެވެ.
މި ފަހުން އެންމެ ބޮޑަށް ފާހަގަވާ އަންހެން ރެފްރީ އަކީ އުމުރުން 37 އަހަރުގެ ފްރާންސަށް އުފަން ފްރަޕާޓް އެވެ. މީގެ ދެ ވަރަކަށް އަހަރު ކުރިން ފަށައިގެން ފްރަޕާޓް އަންނަނީ ފްރާންސް ފުރަތަމަ ޑިވިޝަން މެޗުތަކުގައި ވެސް ރެފްރީކަން ކުރަމުންނެވެ. އޭނާ އެންމެ ބޮޑަށް ފާހަގަވާން ފެށީ 2019 ވަނަ އަހަރުގެ ޔުއެފާ ސުޕަ ކަޕްގައި ޗެލްސީ އާއި ލިވަޕޫލް ކުޅުނު މެޗުގައި ރެފްރީކަން ކުރި ފަހުންނެވެ. އޭގެ ފަހުން އޭނާ ވަނީ ފިރިހެން ފުޓްބޯޅައިގެ ޔޫރަޕްގެ ގިނަ މެޗުތަކެއްގައި އިންސާފުކުރަމުންނެވެ.
