ޓިއުރިން (އޭޕްރީލް 21) - ޔޫރަޕިިއަން ސުޕަ ލީގު ކުރިއަށް ގެންދަން ބޭނުންވި ކަމުގައި ވިޔަސް ފައުންޑާ މެމްބަރުންގެ ތެރެއިން ގިނަ ކްލަބްތަކެއް ލީގުން ވަކިވެފައިވުމުން ދެން މި ލީގު އިތުރަށް ކުރިއަށް ނުދާނެ ކަމަށް ޔުވެންޓަސްގެ ރައީސް އަންދްރެއާ އަގްނެލީ ވިދާޅުވެއްޖެ އެވެ.
ޔުއެފާ އާއި ފީފާގެ އިތުރުން ސަޕޯޓަރުންގެ ޕްރެޝަރާ ހެދި ސުޕަ ލީގު މި ވަގުތަށް ސަސްޕެންޑްކޮށްފައިވާއިރު، ރޭ ޔުވެންޓަސްގެ ރައީސްކަމުން އަގްނެލީ އިސްތިއުފާދިން ކަމަށް މީޑިއާގައި އަޑުފެތުރުނެވެ. އެކަމަކު ޔުވެންޓަސް އިން ވަނީ އެކަން ދޮގުކޮށްފަ އެވެ.
ފައުންޑަ މެމްބަރުންގެ ތެރޭގައި ހިމެނޭ 12 ކްލަބްގެ ތެރެއިން ރަސްމީކޮށް އެ ލީގުން ވަކިވެފައިވަނީ ރޭ ރަސްމީކޮށް އެކަން އިއުލާނުކުރި އިންގްލެންޑްގެ ހަ ކްލަބް ކަމަށްވާ މެންޗެސްޓާ ޔުނައިޓެޑާއި މެންޗެސްޓާ ސިޓީ، ލިވަޕޫލް، އާސެނަލް، ޓޮޓެންހަމް އަދި ޗެލްސީގެ އިތުރުން މިއަދު ރަސްމީކޮށް ސުޕަ ލީގުން ވަކިވިކަން އިއުލާނުކުރި އިޓަލީގެ އޭސީ މިލާނާއި އިންޓަ މިލާން އަދި ސްޕެއިނުގެ އެތުލެޓިކޯ މެޑްރިޑް އެވެ.
މި ވަގުތު ލީގުން ވަކިވިކަން ރަސްމީކޮށް އިއުލާނުނުކޮށް އޮތީ ބާސެލޯނާ އާއި ޔުވެންޓަސް އަދި ރެއާލް މެޑްރިޑް އެވެ. އެމެރިކާގެ ވޯލް ސްޓްރީޓްގެ ވިޔަފާރިތައް ފަހަތު އޮވެގެން ފަށަން އަމާޒުހިފާފައިވާ ސުޕަ ލީގުގެ ޗެއާމަނަކީ ރެއާލްގެ ރައީސް ފްލޮރެންޓީނޯ ޕެރޭޒް އެވެ.
ސުޕަ ލީގު ފަށަން ވެގެން ދާދި ފަހުން ޔޫރަޕިއަން ކްލަބް އެސޯސިއޭޝަން (އީސީއޭ) އިން އިސްތިއުފާ ދެއްވި އަގްނެލީ ވިދާޅުވީ މިހާރު އޮތްގޮތަށް ސުޕަ ލީގު ކުރިއަށްދާނެ ކަމަށް ނުބެލެވޭ ކަމަށެވެ.
"އަހަރެން އަދިވެސް ގަބޫލުކުރަނީ ސުޕަ ލީގަކީ ވަރަށް ފުރިހަމަ ޕްރޮޖެކްޓެއް ކަމަށް. އެކަމަކު މިހާރު މި އޮތް ގޮތުން އަހަރެމެން ކިިހިނެއް މިކަން ކުރަނީ. ކްލަބްތަކުން ވަކިވެ ގޮސްފި. އަހަރެން ގަބޫލެއް ނުކުރަން މި ޕްރޮޖެކްޓް މިހާރު ކުރިއަށްދާ ކަމަށެއް،" އަގްނެލީ ވިދާޅުވި އެވެ.
އިންގްލެންޑްގެ ކްލަބްތަކުން ރޭ ސުޕަ ލީގުން ވަކިވުމާ އެކު އެ ލީގުން ނެރުނު ބަޔާނެއްގައި ބުނެފައިވަނީ އެހެން ފޯމެޓަކަށް ވިޔަސް އެ ލީގުގެ ކަންކަން ކުރިއަށްގެންދަން ބޭނުންވާ ކަމަށެވެ.
ޔުއެފާގެ ރައީސް އަލެކްސަންޑަ ކެފެރިން ވަނީ ސުޕަ ލީގުގެ މައްސަލައިގައި އަގްނެލީ އަށް ވަރަށް ބޮޑަށް ފާޑުކިޔައިފަ އެވެ. ކެފެރިން ވަނީ އަގްނެލީ އަކީ ދޮގު ހަދާ މީހެއްގެ އިތުރުން އޭނާ އަކީ "ހަރުފައެއް"ގެ ގޮތުގައި ސިފަކުރައްވައިފަ އެވެ.
އަގްނެލީ ވިދާޅުވީ އޭނާ ސުޕަ ލީގަށް ތާއީދުކުރާ ގިނަ ސަބަބުތަކެއް އެބަހުރި ކަަމަށާއި އޭގެ އެންމެ ބޮޑު ކަމަކީ ކްލަބްތައް ޔުއެފާގެ އަޅުވެތިކަމެއްގެ ތެރޭގައި މުބާރާތް ކުޅެފައި ލިބޭ އާމްދަނީ ކުޑަވުން ކަމަށެވެ. އަދި ބޮޑެތި ކްލަބްތަކުން ކުރާ ހަރަދާ ނުބައްދަލު އަދަދެއްގެ ފައިސާއެއް މުބާރާތުން ދޭއިރު މިއީ ފުޓްބޯޅަ ކަހަލަ ބޮޑު ހޭދައެއް ކުރާ އިންޑަސްޓްރީގައި ހުރި މައްސަލަތައްކަން އަގްނެލީ ފާހަގަކުރެއްވި އެވެ.
"މިސާލަކަށް ބަލަމާ ޔޫރަޕްގެ އެންމެ އަގުބޮޑު މެޗަކީ ޗެމްޕިއަންސް ލީގުގެ ފައިނަލެއް ނޫން. އެންމެ އަގުބޮޑު މެޗަކީ އިނގިރޭސި ޕްލޭއޮފް މެޗު. އޭގެއިން އެބަ ލިބޭ 150 މިލިއަން ޑޮލަރު. މާލީ ގޮތުން ބަލާއިރު ޗެމްޕިއަންސް ލީގު ވެސް ޖެހޭ އޭގެ ހައިބަތާ އެއްވަރުވާން،" އަގްނެލީ ވިދާޅުވި އެވެ.
"އަހަރަމެންނަށް ފެންނަ ފެނުމުގައި 15 އަހަރާއި 24 އަހަރުގެ ދެމެދުގެ ކުދިން ފުޓްބޯޅަ އަށް ޝައުގުވެރިކަމެއް ނެތް. އެ މީހުންނަށް މާ ކަމުދޭ ޑިޖިޓަލް ގޭމެއް ކުޅެލަން ވެސް. މިއީ ފުޓްބޯޅަ އިންޑަސްޓްރީ ފަހަތަށް ދާކަމުގެ ހެކި،"
ސުޕަ ލީގުގެ ދިފާއުގައި އެންމެ ބޮޑަށް ވާހަކަ ދެއްކެވީ ރެއާލްގެ ރައީސް ޕެރޭޒް އެވެ. ޕެރޭޒް ވަނީ ސުޕަ ލީގުގެ މަސައްކަތް ނުހިއްޓި ކުރިއަށްދާނެ ކަމުގެ ޔަގީންކަން އެބައޮތް ކަމަށް ކުރިން ވިދާޅުވެފަ އެވެ. އެކަމަކު ސުޕަ ލީގުން ޓީމުތައް ވަކިވި ފަހުން ޕެރޭޒް އަދި މީޑިއާ އަށް އިންޓަވިއުއެއް ނުދެއްވަ އެވެ.
