ލަންޑަން (އޭޕްރީލް 21) - އިނގިރޭސި ހުރިހާ ކްލަބްތަކުން ރަސްމީކޮށް ޔޫރަޕިއަން ސުޕަ ލީގުން ވަކިވެފައިވާއިރު، އިތުރު ކްލަބްތަކެއް ވެސް ލީގުން ވަކިވާން ނިންމާފައިވާތީ ސުޕަ ލީގުގެ ފޯމެޓަށް ބަދަލުތަކެއް ގެންނަން ނިންމައިފި އެވެ.
ފީފާ އާއި ޔުއެފާގެ އިންޒާރުތަކަށް ބެލުމެއް ނެތި މިދިޔަ އާދިއްތަ ދުވަހު ސުޕަ ލީގު އިއުލާނުކުރީ 12 ފައުންޑާ ކްލަބާ އެކު އެވެ. އެ ކްލަބްތަކަކީ ރެއާލް މެޑްރިޑް، ބާސެލޯނާ، އެތުލެޓިކޯ މެޑްރިޑް، މެންޗެސްޓާ ޔުނައިޓެޑް، މެންޗެސްޓާ ސިޓީ، ލިވަޕޫލް، އާސެނަލް، ޗެލްސީ، ޓޮޓެންހަމް ހޮޓްސްޕާސް، ޔުވެންޓަސް، އޭސީ މިލާން އަދި އިންޓަ މިލާން އެެވެ.
ދެ ފެޑެރޭޝަނާއި އިނގިރޭސި ސަރުކާރާއި ސަޕޯޓަރުންގެ ޕްރެޝަރާ ހެދި ރޭ އިނގިރޭސި ކްލަބްތަކުން ވަނީ ރަސްމީކޮށް ސުޕަ ލީގުން ވަކިވެފަ އެވެ. ބާސެލޯނާ، އެތުލެޓިކޯ، މިލާން އަދި އިންޓަ ސުޕަ ލީގުން ވަކިވިކަން ރަސްމީކޮށް މިއަދު އިއުލާނުކުރާނެ އެވެ.
ސުޕަ ލީގުން ރޭ ނެރުނު ބަޔާނެއްގައި ބުނެފައިވަނީ އެ ލީގުން އަދިވެސް ގަބޫލުކުރަނީ ޔޫރަޕްގެ ފުޓްބޯޅަ އަށް ބޮޑު ބަދަލެއް ގެންނަން ޖެހޭ ކަމަށް އަދި ގަބޫލުކުރަން ޖެހޭ ކަމަށެވެ. ފުޓްބޯޅަ ޕިރަމިޑްގެ ތެރެއިން ވެސް ކްލަބްތަކަށް ހައްގުވާ މާލީ މަންފާ އިންސާފުވެރިކަމާ އެކީ ލިބެން ޖެހޭނެ ކަމަށެވެ.
މެޑްރިޑްގެ ކޯޓަކުން އިއްޔެ ވަނީ ސުޕަ ލީގުގެ މަސައްކަތް ކުރިއަށް ގެންދަން ހުރަހެއް ނެތް ކަމަށާއި ޔުއެފާ އާއި ފީފާ އަށް އެކަން ނުހުއްޓުވޭނެ ކަމަށް ބުނެ އަމުރެއް ނެރެފަ އެވެ. ސުޕަ ލީގުން ބުނީ އެ އަމުރުން އެނގޭ ކަަމަކީ ސުޕަ ލީގު އުފައްދަން މަސައްކަތްކޮށްފައިވަނީ އެއްވެސް ގާނޫނަކާ ހިލާފުނުވެ ކަމަށާއި ގަވާއިދުތަކުގެ ތެރެއިން ކަން ސާފުވާ ކަމަށެެވެ.
"އެކަމަކު މެދުކެނޑުމެއްނެތި ކުރިމަތިކުރުވަމުން މި އަންނަ ޕްރެޝަރުގެ ސަބަބުން އިނގިރޭސި ކްލަބްތައް މި ވަނީ ވަކިވެފައި. އިތުރު ކްލަބްތައް ވެސް ވަކިވުމުގެ ފުރުސަތު އެބައޮތް. އެހެންވީމަ މި ހިސާބުން ވިސްނަންވީ މިކަން ދެން ކުރެވޭނެ އިތުރު ގޮތްތަކެއް ހޯދަން. އެގޮތުން ދެން ދިރާސާކުރަންވީ ފޯމެޓަށް ގެނެވޭނެ ބަދަލުތަކަށް،" ސުޕަ ލީގުގެ ބަޔާނުގައިވެ އެވެ.
އެންމެ ފުރަތަމަ ރަސްމީކޮށް ސުޕަ ލީގުން ވަކިވީ ސިޓީ އެވެ. މިހާތަނަށް ރަސްމީކޮށާއި ނުރަސްމީކޮށް ލީގުން ވަކިވާން ނިންމި ކްލަބްތަކުގެ އަދަދު އުޅެނީ 10 ގައި ކަމަށް ރިޕޯޓްތައް ބުނެ އެވެ. މެޑްރިޑްގެ އޮފިޝަލުންނާ ހަވާލާދީ އިއްޔެ ސްޕެއިނުގެ މީޑިއާ ރިޕޯޓްތައް ބުނާގޮތުން ފައުންޑަރު މެމްބަރުންގެ ގޮތުގައި ތިބި ކްލަބްތަކުގެ މެޖޯރިޓީ އޭގެއިން ވަކިވެއްޖެނަމަ މުބާރާތް ޖެހޭނީ ހުއްޓާލާށެވެ. އެ ހިސާބުން އެ ޕްރޮޖެކްޓަށް ނިމުން އައީ އެވެ.
ގިނަ ބަޔަކަށް ސުޕަ ލީގާ ދެކޮޅުވާން ޖެހުނު އެންމެ ބޮޑު ސަބަބަކީ ޗެމްޕިއަންސް ލީގުން ވަކިވެ އަމިއްލަ ލީގެއް އުފައްދާއިރު އެމެރިކާގެ އިންވެސްޓްމަންޓް ބޭންކް ޖޭޕީ މޯގަންގެ ފަންޑެއް ބޭނުންކުރާއިރު، މުސްތަގުބަލުގައި ފުޓްބޯޅައިގެ މާކެޓްގެ ބޮޑު ކޮންްޓްރޯލެއް އެމެރިކާގެ ވޯލް ސްޓްރީޓް އަށް ލިބިދާނެ މައްސަލައިގަ އެވެ. އަދި ފުޓްބޯޅަ ކޯޗުންގެ ކަންބޮޑުވުމަކީ ސަޕޯޓަރުން ހިތްހަމަނުޖެހޭ ލީގެއްގައި ކްލަބްތައް ކުޅޭއިރު، އެ ލީގުގެ ފޯމެޓްގައި ފައުންޑާ ކްލަބްތައް ރެލިގޭޓްނުވާ ގޮތަށް ގަވާއިދު އޮތުމަކީ ކުޅިވަރުގެ ރޫހާ ހިލާފު ކަމެއް ކަމަށްވާތީ އެވެ.
