ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ ރެފްރީސް އަދި ކޯޗިން ކޮމިޝަންގެ އިންތިހާބުގައި ވާދަކުރުމުގެ ފުރުސަތު ހުޅުވާލައި, އަންނަ ހުކުރު ދުވަހު އިންތިހާބު ބާއްވަން ތާވަލުކޮށްފި އެވެ.
ވީއޭއެމް އިން މިއަދު ގެޒެޓްކުރި ދެ އިއުލާނެއްގައިވާ ގޮތުން ރެފްރީސް ކޮމިޝަނާއި ކޯޗިން ކޮމިޝަންގެ އިންތިހާބު ހުކުރު ދުވަހުގެ ރޭ ހެންވޭރު ބޯޅަ ގޭގެ ސެމިނާ ރޫމުގައި ބޭއްވުމަށް ހަމަޖެހިފައިވާ ކަމަށެެވެ. އަދި ވީއޭއެމްގެ މި ދެ ކޮމިޝަނަށް ކުރިމަތިލަން ބޭނުންވާ ފަރާތްތަކުން ބުރާސްފަތި ދުވަހުގެ މެންދުރު 12:00 ގެ ކުރިން ފޯމް ފުރުމަށް ފަހު ވީއޭއެމް އޮފީހަށް ހުށަހެޅުމަށް އެދޭ ކަމަށެވެ.
އިންތިހާބުގައު ވޯޓުލާން ރެފްރީންނާއި ކޯޗުންގެ ގޮތުގައި ރާއްޖޭގައި ހަރަކާތްތެރިވާ މީހުން ދާދި ފަހުން ވަނީ ރީ ރަޖިސްޓްރީކޮށްފަ އެވެ. މި މަހު 15 ގައި ރީ ރަޖިސްޓްރޭޝަނަށް ހުޅުވާލިއިރު މުއްދަތު ހަމަވެފައިވަނީ އިއްޔެގެ ނިޔަލަށެވެ. އިއުލާންގެ ދަށުން ރީ ރަޖިސްޓްރީ ކުރެވިފައިވާ ފަރާތްތަކުގެ ވަނަވަރު ހިމެނޭ ލިސްޓް ވަނީ އާންމުކޮށްފަ އެވެ. އެ ގޮތުން މި އިންތިހާބުތަކުގައި 71 ރެފްރީންނާއި 38 ކޯޗުން ވޯޓުލާނެ އެވެ.
އިންތިހާބާ ގުޅޭގޮތުން ޝަކުވާ ހުށަހަޅަށް ބޭނުންވާ ފަރާތްތަކުން ބުރާސްފަތި ދުވަހު 12:00 ގެ ކުރިން ލިޔުމަކުން ވީއޭއެމަށް ހުށަަހަޅަން ޖެހޭނެ ކަމަށް ވީއޭއެމްގެ އިއުލާނުގައިވެ އެވެ.
މި މަހު އެއް ވަނަ ދުވަހު ބޭއްވި ވީއޭއެމްގެ ރައީސަކު ހޮވަން ބޭއްވި އިންތިހާބު ކާމިޔާބުުކުރެއްވީ ކުރީގެ އެއް ވަނަ ކުޅުންތެރިޔާ މުހައްމަދު ރަނޭޝް އެވެ. ކުރީގެ ނައިބު ރައީސް އިލްޔާސް ވަހީދު (އިއްލަ)އާ ވާދަކޮށް ރަނޭ ކުރި ހޯދީ އިންތިހާބުގައި ވޯޓު ލި ހަ ކްލަބްގެ ވޯޓާ އެކު އެވެ. ވޯޓު ލުމުގެ ފުރުސަތު ލިބުނު ނަމަވެސް ތިން ކްލަބެއް އެ އިންތިހާބުގައި ވޯޓުނުލާން ނިންމި އެވެ. އެއީ އިއްލަ އަށް ތާއީދުކުރާ ކްލަބްތަކުންނެވެ.
