ތ. ގާދިއްފުއްޓާއި ލ. މާވަށުގެ ވޯޓު ފޮށިތަކެއްގެ ވޯޓު އަލުން ބޭއްވުމަށް އިލެކްޝަން ކޮމިޝަން (އީސީ)ން ނިންމައި، އެކަން އިއުލާންކޮށްފި އެވެ.
ލޯކަލް ކައުންސިލް އިންތިހާބުގެ އަލުން ވޯޓު ބޭއްވުމަށް އިލެކްޝަން ކޮމިޝަނުން ނިންމީ، އެ ވޯޓު ފޮށިތަކަށް ދާއިރާ ނޫން ބަޔަކު، އޮޅިގެން ވޯޓުލާފައިވާކަން ސާބިތުވުމާ ގުޅިގެންނެވެ.
އިލެކްޝަން ކޮމިޝަނުން މިރޭ ބޭއްވި ނޫސްވެރިންގެ ބައްދަލުވުމުގައި ކޮމިޝަންގެ ރައީސް އަހުމަދު ޝަރީފް ވިދާޅުވި ގޮތުގައި، އަލުން ވޯޓުލާން ޖެހޭ ފޮށިތަކަށް ދާއިރާ ނޫން ބަޔަކު ވޯޓުލާފައިވާއިރު އެއީ ނަތީޖާ ބަދަލުވެދާނެ ފަދަ ކަމެއް ކަމަށެވެ. އެއީ، އެންމެ މަތިން ވޯޓު ހޯދި ކެންޑިޑޭޓުންގެ ފަރަގު ކުޑަވެ އެވެ.
ގާދިއްފުށީގައި އަލުން ވޯޓު ބާއްވަން ޖެހެނީ އެ ރަށުގައި ބެހެއްޓި އެއް ވޯޓު ފޮށީގަ އެވެ. އެ އިންތިހާބު ކުރިއަށް ދާނީ، ނަތީޖާއަށް ބަދަލު އައިސްދާނެ ގޮތަކަށް ނަތީޖާ ލިބިފައިވާ ދެ އަންހެން ކެންޑިޑޭޓުންގެ މެދުގަ އެވެ.
މާވަށުގައި އަލުން ވޯޓުލުމަށް ހަމަޖެހިފައިވަނީ އެހެން ދާއިރާއެއްގެ ދެ މީހަކު ވޯޓުލާފައިވާ ވޯޓު ފޮއްޓެއްގައި ކައުންސިލް ރައީސް ކަމަށް ވާދަކުރި ދެ ކެންޑިޑޭޓުންގެ މެދުގަ އެވެ. އޭގެއިތުރުން ކައުންސިލް ދެ މެންބަރެއް ހޮވުމަށް ލާފައިވާ ވޯޓުގައި ވެސް ނަތީޖާ ބަދަލުވެދާނެފަދަ ފަރަގެއް އޮތުމުން އެ ދެ ކެންޑިޑޭޓުންގެ މެދުގައި ވެސް އިންތިހާބު އޮންނާނެ އެވެ.
މި ތިން އިންތިހާބު އޮންނާނެ ވަކި ދުވަހެއް ކަނޑަނާޅާ ކަމަށް ޝަރީފް ވިދާޅުވި އެވެ.
އަހުމަދު ޝަރީފް ވިދާޅުވި ގޮތުގައި، އަލުން ވޯޓުލުމަށް ބާއްވާ އިންތިހާބުގައި ވެސް ވޯޓު ލެވޭނީ އެ ފޮށިތަކަށް ވޯޓުލުމަށް ރަޖިސްޓްރީވެފައިވާ މީހުންނަށް އެކަންޏެވެ.
ނިމިދިޔަ ލޯކަލް ކައުންސިލް އިންތިހާބުގެ ވަގުތީ ނަތީޖާ އިއުލާންކޮށްފައިވާއިރު، އެ އިންތިހާބަކީ ޝަކުވާތައް ގިނަ އިންތިހާބަކަށް ވަނީ ވެފަ އެވެ. އެފަދަ ޝަކުވާތައް އިލެކްޝަން ކޮމިޝަނުން ބަލަމުންދާއިރު ބައެއް ފޮށިތަކުގެ ސެކިއުރިޓީ އުރަ ކެނޑުމަށް ވެސް ވަނީ ނިންމާފަ އެވެ.
ބާތިލް ވޯޓު ވެސް އިންތިހާބުގައި ގިނައިރު، އެ ގުނި ގޮތާމެދު އެމްޑީޕީން ވަނީ ކަންބޮޑުވެފަ އެވެ. އެ ޝަކުވާތައް ކޮމިޝަނަށް ވެސް އެމްޑީޕީން ވަނީ ހުށަހަޅާފަ އެވެ.
